شومىلۋ ماۋسىمى باستالماس بۇرىن, توتەنشە جاعدايلار دەپارتامەنتىنىڭ قۇتقارۋشىلار قىزمەتى كۇشەيتىلگەن رەجيمگە كوشەدى. ماماندار كۇن سايىن وزەن ارنالارىن ارالاپ, ازاماتتارعا سۋدا ءوزىن-ءوزى ۇستاۋ ەرەجەلەرى, العاشقى مەديتسينالىق كومەك كورسەتۋ ەرەجەلەرى بار جادىنامالاردى تاراتادى. استانا قالاسى توتەنشە جاعدايلار دەپارتامەنتىنىڭ ءبولىم باسشىسى, پودپولكوۆنيك ەلدور رايىمبەكوۆتىڭ ايتۋىنا قاراعاندا, قايعىلى وقيعالار نەگىزىنەن اتا-انالاردىڭ نەمقۇرايلىعىنان, بەلگىلەنبەگەن جەردە سۋعا تۇسۋىنەن, ازاماتتاردىڭ الكوگولدى ىشىمدىك ىشۋىنەن بولادى.
«استانا قالاسىندا شومىلۋعا رۇقسات ەتىلگەن جاعاجايلاردا ابىروي بولعاندا قايعىلى وقيعا تىركەلگەن جوق. ازاماتتار بەلگىلەنبەگەن جەردە شومىلۋ كەزىندە سۋعا باتىپ كەتكەن. بۇگىنگە دەيىن 17 ازاماتتى سۋدا ءوزىن-ءوزى ۇستاۋ ەرەجەلەرىن ساقتاماعانى ءۇشىن اكىمشىلىك جاۋاپكەرشىلىككە تارتتىق. ولاردىڭ كوبىسى تىيىم سالىنعان سۋ قويماسىندا شومىلىپ, الكوگولدى ىشىمدىك ىشكەن, بالالارىن قاراۋسىز قالدىرعان», – دەپ مالىمدەدى ەلدور رايىمبەكوۆ.
وسىنداي وقيعالاردى بولدىرماۋ, ولاردىڭ سانىن ازايتۋ ماقساتىندا استانا قالاسى تجد ماماندارى ەلوردا تۇرعىندارى مەن قوناقتارىن تىيىم سالىنعان جەرلەردە شومىلماۋعا شاقىرادى.
«شومىلۋعا رۇقسات بەرىلمەگەن جەرلەردەگى سۋدىڭ ءتۇبى قانداي ەكەنى بەلگىسىز. ءبىر جىلدىڭ وزىندە سۋ رەلەفى وزگەرۋى مۇمكىن. بىلەتىن ادامنىڭ ءوزى جۇرەك اۋرۋىنا شالدىققان بولسا, بۇلشىق ەتتەردىڭ تارتىلىپ قالۋىنان سۋعا باتىپ كەتەدى. ءبىز رۇقسات بەرىلگەن جەرلەردە شومىلۋعا كەڭەس بەرەمىز. سەبەبى, ونداي سۋ قويمالارى قاجەتتىنىڭ بارىمەن جابدىقتالىپ, قۇتقارۋشى مامانداردىڭ قىزمەتىمەن قامتاماسىز ەتىلگەن. بارلىق ەرەجەلەردى ساقتاۋ كەرەكتىگىن ەلوردالىقتاردىڭ ەسىنە تاعى دا ءبىر مارتە سالعىم كەلەدى, ەسكەرتىلگەن تالاپتاردى ورىنداعان ءجون», – دەدى تجد دەپارتامەنتىنىڭ ءبولىم باسشىسى.
ايتا كەتەيىك, شومىلۋ ماۋسىمى ەلىمىزدە 1 قىركۇيەكتە اياقتالادى.
