قىتاي, جاپونيا, فرانتسيا, يتاليا, گەرمانيا, انگليا, رەسەي, ارمەنيا سىندى ەلدەردەن كەلگەن كاسىبي فوتوگرافتاردىڭ بارلىعى – الەمگە تانىمال فوتوسۋرەتتەردىڭ اۆتورلارى. ولاردىڭ اراسىندا ارمەنيا پرەزيدەنتىنىڭ جەكە فوتوگرافى داۆيد اكوپيان بار. ول قازاقستان پرەزيدەنتى نۇرسۇلتان نازارباەۆتىڭ ەرەكشە سۋرەتىن ءتۇسىرىپ, الەۋمەتتىك جەلىدە بىردەن تانىمال بولدى. سۋرەتتى ءتۇسىرۋدىڭ ەرەكشە ادىستەرىمەن ءوز برەندتەرىن قالىپتاستىرىپ ۇلگەرگەن ماسكەۋلىك ۆالەرا جانە ناتاليا چەركاشينىلاردى دە دارالاۋعا تۇرارلىق.
بۇل جولى الەمگە ايگىلى فوتوگرافتاردىڭ وبەكتيۆىنە – قازاقستاننىڭ ەلورداسى – استانا ىلىكپەك. بيىلعى شارانىڭ ەرەكشەلىگى – 20 فوتوگراف, ناقتى 20 باعىت بويىنشا جۇمىس ىستەۋدە. ياعني, 5-8 شىلدە ارالىعىندا شاھاردىڭ الەۋمەتتىك-ەكونوميكالىق, مادەني-رۋحاني كەلبەتىن كەسكىندەپ, دۇنيە جۇزىنە پاش ەتەتىن بولادى.
شىلدەنىڭ 10-ى كۇنى «PHOTOfest.KZ» حالىقارالىق فوتوفەستيۆالى قورىتىندىلانادى. تۇسىرىلگەن فوتوكوللەكتسيا «بايتەرەك» مونۋمەنتىنىڭ الدىندا «استانا الەم فوتوگرافتارىنىڭ وبەكتيۆىندە» فوتوكورمەسىندە كورەرمەنگە ۇسىنىلادى.
ايت كەتەيىك, بىلتىر «ەكسپو-2017» حالىقارالىق مامانداندىرىلعان كورمەنىڭ مادەني باعدارلاماسى اياسىندا «PHOTOfest.KZ» حالىقارالىق فوتوفەستيۆالى تۇڭعىش رەت ۇيىمداستىرىلدى. شىلدە ايىنىڭ 1 مەن 7-ءسى ارالىعىندا وتكەن شاراعا رەسەي, تۇركيا, فرانتسيا, جاپونيا سياقتى الەمنىڭ تۇكپىر-تۇكپىرىنەن كەلگەن جانە وتاندىق كاسىبي فوتوگرافتاردىڭ تانىمال فوتوكوللەكتسيالارى ۇسىنىلدى. 200-دەن استام ۇزدىك سۋرەت كىتاپقا توپتاستىرىلىپ, 2017 جىلى, جەلتوقساننىڭ 11-15 ارالىعىندا تاۋەلسىزدىك كۇنى قارساڭىندا نيۋ-يوركتەگى بۇۇ زالىندا وتكەن «قازاقستان الەم فوتوگرافتارىنىڭ كوزىمەن» اتتى كورمەگە قويىلدى. تاڭعاجايىپ تۋىندىلار شەتەلدىكتەردىڭ جوعارى باعاسىن الدى.
