قادىرمەندى نۇرسۇلتان نازارباەۆتىڭ ايقىن ۇيعارىمى شامامەن ءجۇز جىل بۇرىن تۇركيا رەسپۋبليكاسىنىڭ اكىمشىلىك ورنىن انكاراعا كوشىرگەن ۇلى كوشباسشىمىز گازي مۇستافا كەمال اتاتۇرىكتىڭ بولجاعىشتىق قاسيەتىن ەسكە سالادى. استانا – ەل ورداسى بولىپ جاريالانعان كۇننەن باۋىرلاس شاھار انكارا سىندى جەدەل دامىپ, قازاقستاننىڭ سيمۆولىنا اينالدى, پرەزيدەنت نۇرسۇلتان نازارباەۆتىڭ دانالىعىمەن مودەرنيزاتسيالانعان ەلدىڭ الەمدىك ارەناداعى بەت-بەينەسىن تانىتتى.
قازاق تىلىندە «باس قالا» دەگەن ۇعىمدى بىلدىرەتىن «استانا» اتاۋى مەن وسمان يمپەرياسىنىڭ ورتالىعى بولعان ىستانبۇلعا تۇرىك تىلىندە قولدانىلعان «اسيتانە» ءسوزىنىڭ اراسىندا ۇقساستىق بايقالادى, سونىمەن قاتار تۇرىك ءتىلى مەن قازاق ءتىلى اراسىنداعى جاقىندىقتى كورسەتەدى.
استانا قۇرىلىسىنا قولدان كەلگەنشە قولداۋ كورسەتىپ, باۋىرلاس ەلدىڭ ەركىن دامۋ كەزەڭىنە ورتاقتاسا العانىمىزدى وزىمىزگە مارتەبە سانايمىز.
قالانىڭ ينفراقۇرىلىمىنان باستاپ, اكىمشىلىك كەڭسەلەر, قوناقۇيلەر, بەيبىتشىلىك جانە كەلىسىم سارايى, «ازىرەت سۇلتان» مەشىتى, «نازارباەۆ ۋنيۆەرسيتەتى» قالاشىعى, «قازمەديا» ورتالىعى سىندى نەگىزگى نىسانداردىڭ سالىنۋىنا تۇرىك قۇرىلىس كومپانيالارى مەن ارحيتەكتورلارى, ينجەنەرلەرى مەن قاراپايىم جۇمىسشىلارى تەر توكتى. بۇگىنگى تاڭدا باس شاھاردا پايدالانۋعا بەرىلگەن عيماراتتار قازاقستاننىڭ تۇرىك كومپانيالارىنا دەگەن سەنىمى مەن ەكى ەل بىرلەسىپ اتقارعان ءوزارا ءىس-قيمىلىنىڭ ناتيجەسىندە تۋعان سينەرگيانىڭ جەتىستىكتەرىن دالەلدەپ وتىر.
قۇرىلىسپەن قاتار, تاعام جانە سۋسىن ونىمىنە دەيىنگى ءتۇرلى سالانى قامتىپ وتىرعان كاسىپكەرلەرىمىز استانادا عانا ەمەس, قازاقستاننىڭ باسقا وڭىرلەرىندە دە قۇرعان وندىرىستىك ورىندارى, ورتاق كاسىپتەرى ارقىلى ەل دامۋىنا جانە ەكونوميكانىڭ ءارتاراپتاندىرىلۋىنا تەحنولوگيا مەن يننوۆاتسياعا نەگىزدەلگەن ينۆەستيتسيالارى مەن قىزمەتتەرى ارقىلى ەتەنە ارالاستى.
تاۋەلسىز قازاقستاننىڭ عالامدىق ساياسي كەلىسسوز الاڭىنا اينالىپ, بەيبىتشىلىكتى قولداۋ ميسسياسى, تۇيتكىلدى ءتۇيىندى تارقاتۋ جولدارى قازاق ديپلوماتياسىنىڭ دارەجەسىن ءوسىردى. استانا ءوزىن جاھاندىق جانە ايماقتىق ماسەلەلەر كوتەرىلەتىن بىرىڭعاي پلاتفورما رەتىندە كورسەتە ءبىلدى.
وتكەن ناۋرىز ايىندا سيريا ماسەلەسى جونىندەگى استانا پروتسەسىنە كەپىل ءۇش مەملەكەتتىڭ سىرتقى ىستەر ءمينيسترىنىڭ ءبىرى رەتىندە قاتىسقان كەزدەسۋىم قولايلى احۋال قالىپتاستىرۋعا كۇش سالدى. استانا الاڭى فورماتىندا جۇرگىزىلگەن كەلىسىمگە وراي ءبىر جارىم جىلدان بەرى قاقتىعىستى توقتاتىپ, وق اتپاۋ جونىندەگى بىرقاتار ۋاعدالاستىق ورىندالىپ كەلەدى.
استانا سيرياداعى سوعىستى شەشۋگە اتسالىسۋمەن قاتار, بىلتىر قىركۇيەك ايىندا جوعارى لاۋازىمدى پرەزيدەنتىمىزبەن بىرگە مەنىڭ دە قاتىسقان يسلام ىنتىماقتاستىعى ۇيىمى ءبىلىم جانە تەحنولوگيالار جونىندەگى ءسامميتىنىڭ, ورتالىق ازيا ەلدەرى كوشباسشىلارى قاتىسقان كونسۋلتاتيۆتىك جۇمىس كەزدەسۋىنىڭ ويداعىداي وتۋىنە مۇرىندىق بولدى.
وتكەن جىلى «بولاشاق ەنەرگياسى» تاقىرىبىمەن ۇيىمداستىرىلعان «استانا «ەكسپو-2017» مامانداندىرىلعان كورمەسىنە دە الەم قۇلاق ءتۇرىپ, كوز تىكتى. كورمەنىڭ كوركىن اشقان «نۇر الەم» شارى, جوبا ۇيىمداستىرىلعان اۋداننىڭ باسىم بولىگىن الىپ جاتقان ورتالىق ازيانىڭ ەڭ ءىرى ساۋدا ورتالىعى سانالاتىن «Mega Silk Way» تۇرىك كومپانيالارى تاراپىنان سالىندى. ۇلتتىق پاۆيلونىمىز كەلگەن قوناقتاردىڭ كوڭىلىنەن شىعىپ, تۇركيا ەكونوميكا مينيسترىنە «ەنەرگەتيكا سالاسىنا قوسقان ۇلەسى ءۇشىن» سىيلىعىنىڭ بەرىلۋى جاعىمدى اسەر قالدىردى.
قازاق باۋىرلارىمىزدى استانانىڭ ەل ورداسى اتانۋىنىڭ 20 جىلدىق مەرەكەسىمەن قۇتتىقتايمىن. الىپ قالانىڭ اقساقالى – پرەزيدەنت نۇرسۇلتان نازارباەۆ تاۋەلسىز, زاماناۋي جانە دامىعان قازاقستاننىڭ جارقىن بولاشاعىنىڭ ماڭگى-باقي كوشباسشىسى بولىپ قالارىنا سەنەمىن.
مەۆليۋت چاۆۋشوعلۋ,
تۇركيا رەسپۋبليكاسىنىڭ
سىرتقى ىستەر ءمينيسترى
