جىل سايىن وتكىزىلەتىن فەستيۆالگە اۋتەنتيكالىق مۋزىكانى ۇزدىك ورىنداۋشىلار جينالادى, ونىڭ ىشىندە كىشى جانە جويىلىپ بارا جاتقان تۇركى حالىقتارىنىڭ وكىلدەرى بار. وسىلايشا تۇركى مۋزىكالىق مادەنيەتىنىڭ باي مۇراسىن ساقتاۋ مەن كوبەيتۋگە ۇلەس قوسادى.
ەكى كۇن بويى «استانا وپەرا» تەاترىنىڭ كامەرالىق زالىندا ارتيستەر باقسى اندەرىن, كەڭىردەكپەن ايتىلاتىن اندەردى ورىندايدى, دومبىرا, حومۋس جانە ت.ب. ۇلتتىق اسپاپتاردا وينايدى. بيىل فەستيۆالگە قازاقستاندىق ورىنداۋشىلاردان باسقا, وزبەكستان, قىرعىزستان, تۇركيا, ازەربايجان, تاتارستان, يران, ۋكراينا, قاراقالپاقستان ەلدەرىنىڭ مۋزىكانتتارى قاتىسادى.
فەستيۆالدىڭ اشىلۋى بارىسىندا تەاتر فويەسىندە كۇندەلىكتى ومىردە كەزدەسە بەرمەيتىن مۋزىكالىق اسپاپتاردىڭ ءۇنى ەستىلىپ تۇردى. ۇلتتىق كيىمدەر كيگەن ارتيستەر ساحناعا شىعار الدىندا ءوز شىعارماشىلىعى مەن ءوز ەلدەرىنىڭ مۋزىكالىق مادەنيەتى تۋرالى ايتىپ جاتتى.
شاراعا بەلگىلى دومبىراشى, كومپوزيتور-كۇيشى ءشامىل ابىلتاەۆ تا قاتىستى. ونىڭ شىعارماشىلىعى دومبىرا مۋزىكاسىن ورىنداۋشىلاردىڭ بىرنەشە بۋىنىنىڭ اراسىنداعى كوپىر ىسپەتتى. بيىل كۇيشى ءوزىنىڭ 70 جىلدىعىن تويلادى مەرەيتويىنىڭ قۇرمەتىنە ساحنادا اقساقالعا ەلوردانىڭ اتىنان سىي رەتىندە شاپان جابىلدى.
قازاق ۇلتتىق ونەر ۋنيۆەرسيتەتىنىڭ وقىتۋشىسى اقجۋسان يمانعازىقىزى «استانا ارقاۋ» فەستيۆالىنىڭ تۇراقتى قاتىسۋشىسى. ول شارانىڭ اشىلۋىندا بايجىگىتتىڭ كۇيىن ورىندادى.
- مەن «استانا ارقاۋ» فەستيۆالى الاڭىندا جىل سايىن ونەر كورسەتەمىن. مۇندا تۇركى مۋزىكاسىنىڭ ۇزدىك ورىنداۋشىلارى جينالادى. تەك كورەرمەندەر عانا ەمەس, ءبىز – ورىنداۋشىلار دا باۋىرلاس حالىقتاردىڭ مازمۇنى جاعىنان باي, وزىندىك مۋزىكاسىن تىڭداۋ مۇمكىندىگىنە يە بولامىز. ءبىز تاجىريبە الماسىپ, جاڭالىقتاردى ەستيمىز, وسىلايشا, مۋزىكالىق مادەنيەتىمىزدى ارتتىرامىز, - دەيدى دومبىراشى.
حومۋستا وينايتىن يۆانيدا بۋگۋلوۆا استاناعا ساحا رەسپۋبليكاسىنان (ياكۋتيا) كەلگەن, ول وزىمەن بىرگە ءانسامبلىن الا كەلمەگەنىنە وكىنەدى.
- مەن استاناعا ءبىرىنشى رەت كەلىپ تۇرمىن, وسىنداي بىرەگەي فەستيۆالگە قاتىساتىنىما قۋانىشتىمىن, ونىڭ وتەتىنى تۋرالى قۇربىمنان ءبىلدىم. ول «استانا اركاۋ» فەستيۆالىنە بىرنەشە رەت قاتىسقان. مەن حومۋستا جانە كۇپسىردە وينايمىن – بۇل بارابان جانە حالىق ءانىن ايتامىن. جالپى, ءبىزدىڭ ءانسامبلىمىز بار, بۇل جولى جالعىز كەلگەنىم وكىنىشتى. كەلەسى جولى انسامبلمەن تولىق قۇرامدا كەلەمىز دەپ ويلايمىن, - دەيدى ياكۋتيالىق قوناق.
ەسكە سالايىق, فەستيۆال بۇگىن «استانا وپەرا» تەاترىندا كونتسەرتپەن اياقتالادى. باستالۋى ساعات 19.00-دە, كىرۋ تەگىن.
