كەيىن تەكسەرۋ جۇمىستارى بەلگىسىز نىساننىڭ قاراسۋ مەن جۇلدىز اۋىلدارىنىڭ ارالىعىنا قۇلاعانىن ناقتىلادى. جالپاقتال پوليتسيا ءبولىمى باستىعىنىڭ ورىنباسارى ا.ساربالين باستاعان جەدەل وكىل ر.عاينەددەنوۆ, ۋچاسكەلىك ينسپەكتور ا.بوراشەۆ, ينسپەكتور ا.نۇعمانوۆتار وقيعا ورنىنا الدىمەن جەتكەن. اۋدان ورتالىعى قازتالوۆ اۋدانىنان اۋدان اكىمى ا.شىنىبەكوۆ, ورىنباسارى ن.قۇتقوجين, اۋداندىق ءىىب باستىعى ر.دەگەنباەۆ, توتەنشە جاعداي وكىلى ا.ناسيپوۆ جانە ءورت ءسوندىرۋ ماشيناسى دا «شاقىرىلماعان قوناق» قۇلاعان جەرگە جينالدى.
قازتالوۆ اۋداندىق ىشكى ىستەر ءبولىمىنىڭ باستىعى, پوليتسيا پودپولكوۆنيگى ر.دەگەنباەۆتىڭ حابارلاۋىنشا, بەلگىسىز نىسان جالپاقتال-قاراسۋ جولىنان 300 مەتر قاشىقتا, جۇلدىز اۋىلىنان 15 شاقىرىم جەرگە قۇلاعان. «شاردىڭ ديامەترى شامامەن 3 مەتردەي بولعان سياقتى, ماتا ءتارىزدى جۇمساق ماتەريالدان جاسالعانى بايقالادى. ورتا شاماسىندا ليۋك ءتارىزدى, قاز-قاتار 36 بۇراندامەن بەكىتىلگەن بولىگى ب ۇلىنبەي ساقتالعان, الدەبىر تۇربالار بەكىتىلگەن ورىندارى كورىنىپ تۇر. وقيعا ورنىندا ءارتۇرلى نارسەلەر شاشىلعان, جولدىڭ كەلەسى بەتىندە, شامامەن 1 شاقىرىمداي جەردە 2 ءتۇرلى شاعىن بولشەك قۇلاعان. نىساننىڭ قۇلاعان جەرىنەن ءورت شىعىپ, ول تۇنگى 1-دەن 20 مينۋت وتكەندە سوندىرىلگەن.
ءبىر تاڭعالارلىعى, «وتتى شار» قۇلاعان سوڭ سول ماڭداعى ۇيالى بايلانىس, تەلەفوندار ءالسىن-ءالى جاساماي, بايلانىس جۇيەسىندە اقاۋ بايقالعان.
«قازتالوۆ اۋدانىنىڭ تەرريتورياسىنا مەتالل بولشەگى تۇسكەنى راس. ادام نەمەسە مال شىعىنى جوق. مەتالل تۇسكەن جەرگە جاقىن ەلدى مەكەن 16 شاقىرىم. ءدال قازىر توتەنشە جاعدايلار مەن ەكولوگتاردان قۇرالعان كوميسسيا جۇمىس ىستەپ جاتىر. قورىتىندىسى بويىنشا قوسىمشا مالىمدەيمىز» دەپ حابارلايدى باتىس قازاقستان وبلىسى اكىمدىگىنىڭ ءباسپاسوز قىزمەتى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
