سۋرەتتى تۇسىرگەن ەرلان ومار
2006 جىل
11 قاڭتار – 2005 جىلدىڭ 4 جەلتوقسانىندا وتكەن پرەزيدەنت سايلاۋىندا 91 پايىز داۋىسپەن جەڭىسكە جەتكەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتى ۇلىقتاۋ ءراسىمى استانا قالاسىندا ءوتتى. يناۋگۋراتسيا سالتاناتىنا: رەسەي پرەزيدەنتى ۆ.پۋتين, حورۆاتيا پرەزيدەنتى س.مەسيچ, وزبەكستان پرەزيدەنتى ي.كاريموۆ, ۋكراينا پرەزيدەنتى ۆ.يۋششەنكو, اۋعانستان پرەزيدەنتى ح.كارزاي, تاجىكستان پرەزيدەنتى ە.راحمون, گرۋزيا پرەزيدەنتى م.سااكاشۆيلي, قىرعىزستان پرەزيدەنتى ق.باكيەۆ, تاتارستان پرەزيدەنتى م.شايميەۆ, باشقۇرتستان پرەزيدەنتى م.راحيموۆ قاتىستى.
18 قاڭتار – ەلورداعى كونگرەسس-حولدا ايگىلى ءانشى ە.سەركەباەۆ, ر.باعلانوۆا باستاعان ءان الىپتارىنىڭ ءۇنى توپتاستىرىلعان «التىن داۋىستار» ەكسكليۋزيۆتى كومپاكت-ديسكىسىنىڭ تۇساۋى كەسىلدى.
20 قاڭتار – باس قالادا «استانا ساۋلەتى مەن قۇرىلىسىنىڭ فيلوسوفياسى» اتتى حالىقارالىق فورۋم باستالدى. شاراعا قاتىسۋشىلار اعىلشىن ارحيتەكتورى ن.فوستەردىڭ جوباسىمەن سالىنىپ جاتقان بەيبىتشىلىك جانە كەلىسىم سارايى قۇرىلىسىمەن تانىستى.
30 قاڭتار – ەلباسى «استاناباسجوسپار» مەكەمەسىنە بارىپ, الدا سالىنۋى ءتيىس حالىقارالىق نازارباەۆ ۋنيۆەرسيتەتى, جابىق كونكي سپورت ورتالىعى («الاۋ») مەن 30 مىڭ ورىندىق («استانا ارەنا») فۋتبول ستاديونىنىڭ جوباسىمەن تانىسىپ, ءوز ەسكەرتپەلەرىن ايتتى.
21 اقپان – استاناداعى ۇلتتىق كىتاپحانا عيماراتىندا «استانا – جاڭا قالا» ارنايى ەكونوميكالىق ايماعىنىڭ باسشىلارى ءباسپاسوز وكىلدەرى الدىندا ەسەپ بەردى. اەا قۇرىلعاننان بەرى ونىمەن سالالاس 660 كاسىپورىن تىركەۋگە الىنىپ, قالاداعى قۇرىلىس جۇمىستارىنا 193,9 ملرد تەڭگە جۇمسالىپتى. ناتيجەسىندە, ءىرى-ءىرى 62 نىسان ۋاقتىلى پايدالانۋعا بەرىلگەن.
22 اقپان – استانادا ەۋرازيالىق ىسكەر ايەلدەردىڭ ءسامميتى ءوتتى. وعان رەسەي, اقش, نورۆەگيا, گەرمانيا, يسپانيا, وڭتۇستىك كورەيا, وڭتۇستىك افريكا سىندى 20 ەلدە بەلسەندىلىك تانىتىپ جۇرگەن باسشى حانىمدار قاتىستى.
17 ناۋرىز – «قازاقستان-2030» ستراتەگياسى نەگىزىندە «استانا قالاسىن 2030 جىلعا دەيىن ورنىقتى دامىتۋ» تۋرالى پرەزيدەنت جارلىعى شىقتى.
17 ءcاۋىر – استانا اكىمى ومىرزاق شوكەەۆ وڭتۇستىك كورەيا استاناسى سەۋلگە رەسمي ساپارمەن بارىپ, قالا مەرى لي مەنگ باكپەن كەزدەسىپ, باۋىرلاس قالالار مەموراندۋمىنا قول قويدى.
16 مامىر – كونگرەسس-حولدا «اسقاقتا, استانا» رەسپۋبليكالىق اقىندار ايتىسى ءوتتى. باس جۇلدە اقىن امانجول التاەۆقا بۇيىرىپ, ول قالا اكىمىنىڭ جۇلدەسى – «ۆولگا» اۆتوكولىگىنە يە بولدى.
4 شىلدە – استانا كۇنى قارساڭىندا قالا اكىمى ءو.شوكەەۆ جاس وتباسىلار مەن مەملەكەتتىك قىزمەتكەر جانە الەۋمەتتىك سالا ماماندارى ساناتىنا جاتاتىن وتباسىلارعا پاتەر كىلتىن تابىستادى.
1 قىركۇيەك – ەلوردانىڭ كوركى بەيبىتشىلىك جانە كەلىسىم سارايى سالتاناتتى تۇردە اشىلدى. كورىكتى عيمارات ەلىمىزدەگى ەتنوسارالىق تاتۋلىق مەن كونفەسسياارالىق كەلىسىمنىڭ سيمۆولى رەتىندە تانىلدى.
8 قىركۇيەك – سول جاعالاۋداعى دوستىق شاعىن اۋدانىندا جەدەل جاردەم ستانساسى ىسكە قوسىلىپ, 35 بريگادا جۇمىسقا كىرىستى.
12 قىركۇيەك – ەلوردادا الەمدىك جانە ءداستۇرلى دىندەر كوشباسشىلارىنىڭ ءىى سەزى باستالدى.
21 قىركۇيەك – باس قالادا تۇڭعىش رەت «تەاتر الەمى» فەستيۆالى باستالدى. وعان استانا مەن الماتى جانە وبلىس تەاترلارىمەن قاتار, سانكت-پەتەربۋرگتەن «فونتانكاداعى» جاستار تەاترى, ماسكەۋدەن ن.ۆ.گوگول اتىنداعى دراما تەاترى, باشقۇرتستاننان م.كارىم اتىنداعى ۇلتتىق جاستار تەاترى جانە ت.ب. شەتەلدىك ترۋپپالار قاتىستى.
23 قىركۇيەك – استانا قالاسى اكىمى قىزمەتىنە اسقار مامين تاعايىندالدى.
3 قازان – قازاقستان پرەزيدەنتى نۇرسۇلتان نازارباەۆ يسپانيادا وتكەن «ۆۋەلتا» كوپكۇندىك ۆەلوجارىسىنىڭ جەڭىمپازى, «استانا» كومانداسىنىڭ كاپيتانى الەكساندر ۆينوكۋروۆتى قابىلداپ, ءىى دارەجەلى «بارىس» وردەنىمەن ماراپاتتادى.
9 جەلتوقسان – بەيبىتشىلىك جانە كەلىسىم سارايىندا ەلباسى نۇرسۇلتان نازارباەۆقا «حان شاتىر» ساۋدا ورتالىعى مەن بۋراباي شاڭعى كۋرورت-قورىعىنىڭ ينۆەستيتسيالىق جوبالارى تانىستىرىلدى.
13 جەلتوقسان – ەلباسى نۇرسۇلتان نازارباەۆ سول جاعالاۋىنداعى مينيسترلىكتەر ۇيىمەن ىرگەلەس ورنالاسقان «قازىنا تاۋەر» عيماراتىنىڭ تۇساۋكەسەر راسىمىنە قاتىستى.
13 جەلتوقسان – نۇرسۇلتان نازارباەۆ تۇرىكتىڭ «بايتۋر ينشاات تەاحيۋت» كومپانياسى سالىپ شىققان 260 ورىندىق اكۋشەرلىك-گينەكولوگيالىق جانە 240 ورىندىق پەدياترلىق بلوگى بار انا مەن بالا ۇلتتىق عىلىمي ورتالىعىنا بارىپ, قۇرىلىس نىسانىمەن تانىسىپ شىقتى.
دايىنداعان بەكەن قايرات ۇلى
«ەگەمەن قازاقستان»
