نۇرسۇلتان نازارباەۆ «سيلۋمين-ۆوستوك» جاۋاپكەرشىلىگى شەكتەۋلى سەرىكتەستىگىنە باردى
كاسىپورىن قۇرىلىس پەن ينفراقۇرىلىم, ماشينا جاساۋ, ەنەرگەتيكا, مەتاللۋرگيا, تاۋ-كەن جانە مۇناي حيمياسى ونەركاسىبى سالالارىندا ينجينيرينگتىك قىزمەت كورسەتۋ ىسىنە ماماندانعان.
كاسىپورىندى ارالاۋ بارىسىندا مەملەكەت باسشىسىنا قۇبىر جۇرگىزۋ كەزىندە قولدانىلاتىن ارماتۋرالاردى, ناسوستىق قۇرال-جابدىقتاردى, ەلەكتروتەحنيكالىق ءونىم مەن بلوكتى-مودۋلدىك عيماراتتاردى دايىنداۋ ۇدەرىسى تانىستىرىلدى.
نۇرسۇلتان نازارباەۆ كاسىپورىن ۇجىمىمەن دە كەزدەسىپ, اڭگىمەلەستى.
ەلباسى شىعىس قازاقستان وبلىسىنىڭ ونەركاسىپتىك الەۋەتى مەن دامۋ قارقىنىن اتاپ ءوتتى.
– وڭىردە ونەركاسىپ سالاسى وركەندەپ, يندۋستريالدى باعدارلاما اياسىندا 46 جوبا جۇزگە اسىرىلدى. جاڭا جۇمىس ورىندارىمەن قامتاماسىز ەتىپ جاتقان كاسىپورىندار سالىنۋدا. اتاپ ايتقاندا, 7500-گە جۋىق ادام جۇمىسقا ورنالاستى, – دەدى مەملەكەت باسشىسى.
سوڭىندا نۇرسۇلتان نازارباەۆ كاسىپورىن جۇمىسشىلارىنا تابىس تىلەپ, وندىرىستىك كورسەتكىشتەردىڭ ودان ءارى ارتا بەرۋىنە نيەتتەستىك ءبىلدىردى.
