ميسسيا جەتەكشىسى م.حورتوننىڭ ايتۋىنشا, بۇگىنگى كۇنى قازاقستان ەكونوميكاسىندا ءوسىم بايقالادى. بيىلعى جىلعا جاسالعان بولجام بويىنشا ەكونوميكالىق ءوسىم 4 پايىز شاماسىندا بولماق.
– الايدا اتالعان كورسەتكىش ودان دا جوعارى بولۋى ابدەن مۇمكىن. شامامەن − 4,5 پايىز. ال مەملەكەتتىك ورگاندار جاساعان بولجام ءبىز كورسەتكەن مەجەدەن جوعارى بولىپ وتىر. وعان باستى سەبەپ, ەلدەگى جۇرگىزىلىپ وتىرعان رەفورمالاردىڭ ءساتتى ىسكە اسۋى, ەكونوميكانى ءارتاراپتاندىرۋدىڭ جولعا قويىلۋى دەپ باعامدايمىز. بۇعان قوسا, ەكىنشى دەڭگەيلى بانكتەردىڭ تۇراقتىلىعى مەن الەۋەتىنىڭ جوعارى بولۋى, ەكونوميكانىڭ نەگىزگى قوزعاۋشى كۇشتەرىنىڭ ءبىرى, – دەدى م.حورتون. ميسسيا جەتەكشىسى جاساعان بولجامىنا سايكەس, الداعى 4 جىلدا ەلدەگى ءىجو 5,5 پايىزدى قۇراۋى ىقتيمال. ول ءۇشىن مەملەكەت باسشىلىعى مەن ۇلتتىق بانك قۇرىلىمدىق رەفورمالاردىڭ جۇيەلى ىسكە اسۋىن نازارعا الۋى ءتيىس.
– 2000-2007 جىلدارى مۇناي رەسۋرستارى كوپتەپ اشىلىپ, استاناعا تارتىلعان ينۆەستيتسيا كولەمى ايتارلىقتاي ارتىپ, مەملەكەتتىك ينۆەستيتسيانىڭ قارقىن الىپ تۇرعان شاعىندا ەلدەگى ءىجو ۇلەسى 7,5 پايىزدى قۇراعان ەدى. بۇل كورسەتكىشكە قايتا قول جەتكىزۋ ءۇشىن جوسپارلى تۇردە جۇمىس جۇرگىزۋ قاجەت دەپ ەسەپتەيمىن, – دەدى ميسسيا جەتەكشىسى.
ونىڭ ايتۋىنشا, ءوسىمنىڭ ارتۋىنا سالىق سالاسىنداعى رەفورمالاردىڭ دا وڭ ىقپالى بار. حالىقارالىق ۆاليۋتا قورى جالاقىسى تومەن ازاماتتاردىڭ كىرىس سالىعىن تومەندەتۋ سياقتى شارالاردى قولدايتىندىعىن ءبىلدىردى. الايدا جوعارى جالاقى الاتىنداردىڭ پروگرەسسيۆتى مەجەسىن كوتەرۋ ارقىلى جەڭىلدىك شارالارىنا كەتكەن قاراجاتتى اقتاپ الۋعا بولاتىنىن ايتادى. ال ءبىلىم مەن دەنساۋلىق سالاسىندا ادام باسىنا قاراي قارجىلاندىرۋ تەتىگىن ەنگىزۋدىڭ ناتيجەسىندە بيۋدجەتتىڭ ءبىراز قاراجاتىن ۇنەمدەۋگە مۇمكىندىك بار.
– ۇلتتىق بانك ءوز جۇمىسىن ويداعىداي اتقارىپ كەلەدى. ينفلياتسيانىڭ دەڭگەيى 6 پايىزدىڭ اينالاسىندا. اتالعان كورسەتكىشتى تومەندەتۋ ماقساتىندا ءتيىستى شارالار اتقارىلۋدا. تەڭگە باعامى دا ايتارلىقتاي وزگەرگەن جوق. وعان كوپ جاعدايدا مۇناي باعاسى مەن ءرۋبلدىڭ باعامى اسەر ەتىپ وتىر. گەوساياسي فاكتورلاردىڭ ىقپالى دا بار. جالپى, بۇگىندە ەلدە ەكونوميكالىق ءوسىم بايقالادى. ەندى ۇلتتىق بانك پەن مەملەكەتتىك ورگاندارعا ەكونوميكانى قارجىلاندىرۋدى ازايتۋ قاجەت دەپ سانايمىن. بيزنەس ءبىرىنشى ورىنعا شىعۋى ءتيىس. وعان تاعى ءبىر-ەكى جىل كەرەك ەكەنى انىق. مەنىڭشە, ەلدەگى قولعا العان باستامالار سوڭىنا دەيىن ءساتتى جۇزەگە اساتىن بولسا, ەكونوميكالىق ءوسىمنىڭ كورسەتكىشى ارتادى, – دەدى حالىقارالىق ۆاليۋتا قورى قازاقستانداعى ميسسياسىنىڭ باسشىسى.
ەركەجان ايتقازى,
«ەگەمەن قازاقستان»
