شەرۋ سالدارىنان ەكونوميكاعا نۇقسان كەلدى
دۇيسەنبىدەن ارگەنتينادا جاپپاي شەرۋ بولىپ, كوپتەگەن قوعامدىق قىزمەت توقتاپ, ەكونوميكاعا ايتارلىقتاي نۇقسان كەلدى. شەرۋگە شىققاندار ايلىقتى كوتەرۋدى تالاپ ەتىپ, حالىقارالىق قارجى قورى مەن ەل بيلىگى اراسىنداعى قۇنى 50 ميللياردتىق كەلىسىمگە قارسىلىق ءبىلدىردى.
Al Jazeera ارناسىنىڭ حابارلاۋىنشا, نارازىلىقتىڭ كەسىرىنەن ارگەنتيناداعى قوعامدىق كولىك قىزمەتى توقتاعان. اۋەجاي جۇمىسشىلارىنىڭ ەرەۋىلگە شىعۋى سالدارىنان 600-گە جۋىق اۋە ساپارى كەيىنگە شەگەرىلىپ, 71 مىڭعا جۋىق جولاۋشى زارداپ شەككەن.
سونىمەن قاتار دۇكەندەر, جانارماي بەكەتتەرى, مەكتەپتەر, بانكتەر جانە پورتتار جۇمىسىن توقتاتقان. ەل استاناسى بۋەنوس-ايرەس كوشەلەرىندە كولىكتەر كەپتەلگەن.
ارگەنتينا بيلىگى تاياۋدا جالاقى مولشەرىن 15 پايىزعا عانا ۇلعايتۋ جونىندە شەشىم قابىلداعان بولاتىن. ال ەلدەگى ينفلياتسيا مولشەرى 26 پايىزعا جەتكەن. جۇمىسشىلار بيلىكتىڭ وسى شەشىمىنە نارازىلىق ءبىلدىرىپ وتىر.
سونىمەن قاتار پرەزيدەنت ماۋريسيو ماكري ۇلتتىق ۆاليۋتانى دەۆالۆاتسيادان ساقتاپ قالۋ ماقساتىندا حالىقارالىق قارجى قورىمەن كەلىسىپ, 50 ميلليارد دوللار كرەديت الۋعا قول جەتكىزدى. نەسيە شارتىنا سايكەس, 2019 جىلى قارجى تاپشىلىعىن 1,3 پايىزعا دەيىن ازايتۋ قاجەت. ءوز كەزەگىندە بۇل بيۋدجەتتىك قىزمەتكەرلەردى كوپتەپ قىسقارتۋعا اكەپ سوعىپ, جۇمىسسىزدار سانىن ارتتىرۋى مۇمكىن. قازىرگى تاڭدا ارگەنتينا حالقىنىڭ 9 پايىزى جۇمىسسىز.
جالپى, بۇل – ارگەنتينانىڭ بۇكىلحالىقتىق ەڭبەك كونفەرەنتسياسى ۇيىمداستىرىپ وتىرعان ءۇشىنشى شەرۋ. ۇيىم قۇرامىندا ءۇش ميلليوننان استام جۇمىسشى بار. بۇعان دەيىن ولار 2017 جىلعى ساۋىردە جانە جەلتوقساندا جاپپاي ەرەۋىلدەگەن بولاتىن.
قحر ايعا عارىش ستانساسىن جىبەرەدى
قىتاي بيلىگى عارىشتى يگەرۋ ءۇشىن بىرقاتار شارالار اتقارىپ جاتىر. سولاردىڭ ءبىرى – ايدى زەرتتەۋگە ارنالعان اپپارات جىبەرۋ. تاياۋدا ايدىڭ بىزگە كورىنبەيتىن بەتىن بارلاۋ ماقساتىندا Queqiao قوندىرعىسى جىبەرىلەتىنى ءمالىم بولعان-دى.
ChinaDaily سايتىنىڭ پايىمداۋىنشا, بۇل ساپار – ايدىڭ بىزگە كورىنبەيتىن بەتىن باعدارلاپ, ايدى زەرتتەۋ جۇمىستارىن جەتىلدىرۋگە وڭ ىقپالىن تيگىزبەك. عارىش اپپاراتتارى ايعا «چانە-4» عارىش ستانساسىمەن جەتكىزىلمەك. اتالعان ميسسيا 2016 جىلى جۇزەگە اسۋى ءتيىس بولعان. بىراق ءتۇرلى سەبەپتەرگە بايلانىستى كەيىنگە شەگەرىلدى.
ChinaDaily-گە سۇحبات بەرگەن بەيجىڭ عالىمى چجەن يۋنچۋننىڭ ايتۋىنشا, وسى قوندىرعىلار ارقىلى اسپان الەمىن كەڭىنەن زەرتتەۋگە مۇمكىندىك تۋادى. ويتكەنى ايدا اۋا بولماعاندىقتان, تەلەسكوپتار عارىشتى انىق كورۋگە جاعداي جاسايدى.
وڭتۇستىك كورەيا مەن كحدر كەلىسىمى
سولتۇستىك كورەيا مەن وڭتۇستىك كورەيا دەلەگاتسياسى ءتۇرلى جاعدايلارعا بايلانىستى وتباسىنان ايرىلىپ, شەكارانىڭ ەكى جاعىندا قالعان وتباسىلاردى تابىستىرۋ باعدارلاماسىن قايتا جالعاستىرۋعا قاتىستى كەلىسسوز وتكىزدى.
بۇل كەلىسىم ەكى ەل اراسىنداعى قارىم-قاتىناستى جاقسارتۋ ماقساتىندا ۇيىمداستىرىلىپ وتىر. ەستەرىڭىزدە بولسا, ساۋىردە وڭتۇستىك كورەيانىڭ پرەزيدەنتى چجە ين مۋن سولتۇستىك كورەيا باسشىسى كيم چەن ىنمەن كەزدەسكەن بولاتىن. اتالعان جيىندا پرەزيدەنتتەر قازىرگى تاڭدا تۋىنداعان قيىندىقتارعا توقتالىپ, بىرقاتار ماسەلەلەردى تالقىلاعان ەدى. سونىڭ ءبىرى – ەكى ەل اراسىنداعى قارىم-قاتىناستى جاقسارتۋ.
Reuters اگەنتتىگىنىڭ حابارلاۋىنشا, جيىن بارىسىندا كحدر دەلەگاتسياسىن باستاپ كەلگەن پاك يونگ: ء«بىز ءوزارا سەنىمدى نىعايتا وتىرىپ, جاقسى ناتيجەگە قول جەتكىزۋگە تالپىنامىز. باسشىلارىمىز باستاپ بەرگەن كەلىسىمدى ودان ءارى جالعاستىرۋ ءبىزدىڭ مىندەتىمىز» دەگەن ەكەن.
ءوز كەزەگىندە وڭتۇستىك كورەيا وكىلدەرى ءبولىنىپ كەتكەن وتباسىلاردى قايتا تابىستىرۋ باعدارلاماسىن جالعاستىرۋ ادام قۇقىعى ماسەلەسى ەكەنىن جەتكىزگەن.
ايتا كەتەرلىگى, كورەي تۇبەگىندەگى سوعىس كەزىندە كوپتەگەن كورەيلەر وتباسىنان اجىراپ, شەكارانىڭ ەكى جاعىندا قالىپ كەتكەن ەدى. ولاردى قايتا تابىستىرۋ جۇمىستارى بۇعان دەيىن دە بىرنەشە رەت وتكىزىلدى. 2000 جىلدان بەرى 23 676 ازامات قايتا تابىسقان ەكەن.
قازىرگى تاڭدا كورەي سوعىسىنىڭ زاردابىن تارتقانداردىڭ الدى 80-نەن اسىپ كەتكەن. Reuters اگەنتتىگىڭ حابارلاۋىنشا, وسى باعدارلاما اياسىندا اعايىن-تۋعانىمەن قايتا كەزدەسۋگە ءوتىنىش بىلدىرگەن 131 مىڭنان استام ادامنىڭ 56 پايىزى قايتىس بولىپ كەتكەن.
شولۋدى دايىنداعان اباي اسانكەلدى ۇلى,
«ەگەمەن قازاقستان»
