ۋرۋگۆاي مەن رەسەي اراسىنداعى ويىندا قورعاۋشى سمولنيكوۆ الاڭنان قۋىلىپ, رەسەي كومانداسى 10 فۋتبولشىمەن قالدى. سونىڭ سالدارىنان جارىس قوجايىندارى 0:3 ەسەبىمەن جەڭىلدى. ستانيسلاۆ چەرچەسوۆ كومانداسى تەڭ ناتيجەگە قول جەتكىزىپ, توپتاعى ءبىرىنشى ورىننان دامەلى بولىپ ەدى. الايدا بار ويىن قۇردىمعا كەتىپ, لاتىن امەريكاسىنىڭ كومانداسى قارسىلاستان ءبىر باس جوعارى بولدى. «ا» توبىنداعى ءبىرىنشى ورىندى يەمدەنگەن ۋرۋگۆاي ەندى پلەي-وفف سىنىندا پورتۋگاليامەن كەزدەسەدى. سەبەبى, پيرەنەي تۇبەگىنىڭ كومانداسى ءوز توبىندا ەكىنشى ورىندى يەمدەندى. كريشتيانۋ رونالدۋ يران قاقپاسىنا پەنالتيدەن گول سوعا الماي, ريكاردۋ سانتۋش شاكىرتتەرى تەڭ ناتيجەنى قاناعات تۇتتى. تۋرنير باستالعالى بەرى قاقپاسىنا بىردە-ءبىر گول جىبەرمەگەن ۋرۋگۆاي پورتۋگاليانى اينالىپ وتەمىز دەپ وتىر. بۋكمەكەرلىك كەڭسەلەر دە وسىلاي ويلايدى.
ال «ۆ» توبىنداعى ەكىنشى ويىندا يسپانيا ماروككومەن تەڭ ويناپ, توپتاعى 1-ورنىن ساقتاپ قالدى. ەندى 2010 جىلعى الەم چەمپيونى رەسەيمەن كەزدەسەدى. 2008 جىلى ەۋرو دوداسىنىڭ جارتىلاي فينالىندا يسپانيا گۋس حيددينك باپتايتىن رەسەيدى 4:1 ەسەبىمەن ويسىراتا جەڭگەنى بار-تىن. ەندى قالاي بولارى بەلگىسىز. بۇل جولعى رەسەي نيدەرلاندىلىق ماماننىڭ كەزىندەگىدەي كۇشتى ەمەس. بىراق يسپانيا دا سول شاقتاعى قالپىنان وسالداۋ. دەگەنمەن جارىس رەسەي جەرىندە وتكەندىكتەن ورىس ويىنشىلارى تەگەۋرىندى قارسىلىق كورسەتەرى انىق. دەگەنمەن كەزدەسۋدىڭ باستى ءفاۆوريتى يسپانيا ەكەنىنە داۋ جوق.
پلەي-وففتىڭ العاشقى ساتىسىندا ءبىر-بىرىمەن قارسىلاس اتانىپ قالۋى مۇمكىن جۇپتارعا توقتالساق. ولاردىڭ ەڭ باستىسى – برازيليا مەن گەرمانيا. بۇل ەكى كوماندا 1/8 فينالدا جولىعۋى عاجاپ ەمەس. ەگەر برازيليا ءوزىنىڭ توبىنداعى ءبىرىنشى ورنىن ساقتاپ قالار بولسا, وندا كورشى توپتاعى ەكىنشى ورىن العان گەرمانيامەن كەزدەسەدى. ول توپتا 6 ۇپايى بار مەكسيكا كوش باستاپ تۇر. ال «H» توبىنداعى كوماندالاردىڭ جاعدايى قيىن. ءبىرىنشى ورىندا تۇرعان جاپونيا «G» توبىنىڭ ەكىنشى كومانداسى بەلگيامەن كەزدەسۋى مۇمكىن. ال كۇنشىعىس ەلى قۇراماسىنىڭ ءبىرىنشى ورىنعا شىعىپ كەتكەنىن انگليا دا پايدالانىپ قالعىسى كەلەدى. 3-تۋردا انگليا مەن بەلگيا اراسىنداعى كەزدەسۋدە جەڭىمپازدى انىقتاۋ قيىن بولاتىن سەكىلدى. ۇلىبريتانيالىق فۋتبولشىلار دا, بەلگيالىقتار دا ەكىنشى ورىنعا تالاسقىسى بار.
ءسوز سوڭىندا ايتا كەتسەك, «ا» توبىنىڭ ويىنى ساۋد ارابيا مەن مىسىر اراسىندا ءوتتى. تۋرنيرلىك كەستەگە ەش اسەر ەتپەيتىن بۇل ماتچتا ساۋديالىقتار سوڭعى مينۋتتاردا جەڭىستى ج ۇلىپ اكەتتى. وسى ويىندى مىسىردا تەلەارنادان جۇرگىزگەن كوممەنتاتور ابدەل راحىم مۇحاممەد ماتچ بىتكەن سوڭ جۇرەگى توقتاپ, ومىردەن وزدى. دارىگەرلەردىڭ ايتۋىنشا, ويىن بويى العان اسەرى مۇحاممەدكە اۋىر تيگەن ەكەن.
سونىمەن قاتار سەربيا-شۆەيتساريا ويىنىندا كوسوۆونىڭ تۋىن جابىستىرىپ, گول سوققان سوڭ ءتىپتى البانيانىڭ جالاۋىنداعى قىراندى قولمەن كورسەتكەن ەكى ويىنشى شەردان شاكيري مەن گرانيت دجاككا فيفا تاراپىنان ايىپقا كەسىلدى. ەندى ەكى ويىنشى 8,500 ەۋرو كولەمىندە ايىپپۇل تولەيدى. فۋتبولشىلار ۇلتارازدىق قاقتىعىس تۋدىراتىن وسىنداي ارەكەتتەرىن ەندى تاعى قايتالايتىن بولسا, وندا الەم چەمپيوناتىنان شەتتەتىلەتىن بولادى.
ەرمۇحامەد ماۋلەن,
«ەگەمەن قازاقستان»
