الەمنىڭ ءتۇرلى ەلدەرىندە بيزنەس جۇرگىزۋدىڭ جەڭىلدىگى ولاردىڭ ۇلتتىق ەكونوميكاسى باسەكەگە قابىلەتتىلىگىنىڭ ماڭىزدى كورسەتكىشى بولىپ سانالادى جانە ءاردايىم ينۆەستورلاردىڭ نازارىندا بولادى. الەمنىڭ بارىنشا باسەكەگە قابىلەتتى 30 ەلىنىڭ قاتارىنا كىرۋ جۇمىسىنىڭ شەڭبەرىندە قازاقستان جەكە كاپيتالعا جانە كاسىپكەرلىك باستاماعا مەيلىنشە وڭتايلى جاعدايلار جاساۋ ءۇشىن جۇيەلى شارالار قابىلداۋدا. قازىرگى ۋاقىتتا قازاقستان دۇنيەجۇزىلىك بانكتىڭ «Doing Business» رەيتينگىندە 36-شى پوزيتسيادا تۇر جانە سوڭعى جىلى ەڭ كوپ جاڭالىقتار ەنگىزگەن الەم مەملەكەتتەرىنىڭ تىزىمىندە ەكىنشى ورىندا. قازاقستان بۇل كورسەتكىش بويىنشا ورتالىق ازيا وڭىرىندە كوش باسىندا كەلەدى.
سوڭعى جىلدارى قازاقستاننىڭ «Doing Business» رەيتينگىندەگى, اتاپ ايتقاندا, «كاسىپورىندى اشۋ» ينديكاتورى بويىنشا پوزيتسياسىن جاقسارتۋ ءۇشىن ۇلتتىق بانك زاڭدى تۇلعاعا بانك شوتىن اشۋ پروتسەسىن بارىنشا جەڭىلدەتۋگە مۇمكىندىك بەرەتىن زاڭنامانىڭ ەداۋىر جۇيەلى رەفورمالارىن جۇرگىزدى. بۇل ورايدا بانك شوتىن اشۋ, ونىڭ ىشىندە بانكتىڭ وفيسىنە بارماي قاشىقتان اشۋ تاسىلىمەن قوسا العاندا, تالاپ ەتىلەتىن قۇجاتتار تىزبەسى بارىنشا ازايتىلدى.
قازىرگى كەزدە زاڭدى تۇلعا بانك شوتىن اشقان كەزدە بانككە كومپانيا جارعىسىن جانە مەملەكەتتىك تىركەۋدەن ءوتۋ تۋرالى قۇجاتتى ۇسىنۋ تالاپ ەتىلمەيدى. بانك شوتىن باسقاراتىن ۋاكىلەتتى تۇلعالاردىڭ, مىسالى, ۇيىم جەتەكشىسى, باس بۋحگالتەردىڭ قولدارىن نوتاريۋستا كۋالاندىرۋ قاجەتتىلىگى جوق, قولداردىڭ شىنايىلىعىن بانك قىزمەتكەرى كۋالاندىرادى. قازاقستان زاڭناماسى بويىنشا ءمورى بولۋعا ءتيىس زاڭدى تۇلعا – ۇيىمداردى قوسپاعاندا, زاڭدى تۇلعا-ۇيىمدا ءمور بولماسا, بانك قۇجاتتارىندا ونى قويۋ تالاپ ەتىلمەيدى. قازىرگى ۋاقىتتا زاڭنامادا بانك شوتىن بانككە بارماي, قاشىقتان, ياعني وفيستە نە ۇيدە وتىرىپ-اق اشۋ مۇمكىندىگى كوزدەلگەن. بانكپەن بانكتىك قىزمەت كورسەتۋ شارتى ونىڭ ەلەكتروندى تسيفرلى قولتاڭباسىن قويۋ ارقىلى جاسالادى. بانك شوتىن اشۋعا ءوتىنىش تە بانككە ەلەكتروندى نىساندا جىبەرىلەدى.
قازاقستان پرەزيدەنتى نۇرسۇلتان نازارباەۆ ءوزىنىڭ 2018 جىلعى 10 قاڭتارداعى قازاقستان حالقىنا جولداۋىندا حالىق پەن بيزنەس ءۇشىن تسيفرلى كورسەتىلەتىن قىزمەتتەردى جەتىلدىرۋدىڭ ماڭىزدىلىعىن ەرەكشە اتاپ ءوتتى.
«مەملەكەتتىك ورگانداردىڭ اقپاراتتىق جۇيەلەرىنىڭ ىقپالداسۋى جەكەلەگەن مەملەكەتتىك كورسەتىلەتىن قىزمەتتەردەن كەشەندى كورسەتىلەتىن قىزمەتتەرگە ء«بىر ءوتىنىش» قاعيداتى بويىنشا وتۋگە مۇمكىندىك بەرەدى», دەپ اتاپ ءوتتى مەملەكەت باسشىسى.
وسى ساياساتقا سايكەس, بيزنەس جۇرگىزۋدى جەڭىلدەتۋ ماقساتىندا زاڭدى تۇلعانى تىركەۋ ساتىسىندا ءبىر مەزگىلدە مەملەكەتتىك جانە قارجىلىق كورسەتىلەتىن قىزمەت الۋ مۇمكىندىگى ىسكە اسىرىلدى. ەگەر بۇرىن قۇرىلتايشى الدىمەن زاڭدى تۇلعانى تىركەپ, سودان كەيىن شوت اشۋ ءۇشىن تىركەۋ تۋرالى انىقتامانى بانككە بەرۋگە, سونداي-اق مىندەتتى ساقتاندىرۋ شارتىن جاساسۋ ءۇشىن ساقتاندىرۋ كومپانياسىنا بارۋعا ءتيىس بولسا, ەندى www.egov.kz «ەلەكتروندى ۇكىمەتتىڭ» پورتالىندا ىسكە اسىرىلعان «زاڭدى تۇلعانى بانك شوتىن اشۋ جانە قىزمەتكەردى ەڭبەك (قىزمەتتىك) مىندەتتەرىن اتقارعان كەزدە ونى جازاتايىم وقيعالاردان مiندەتتi ساقتاندىرۋدى ەسكەرە وتىرىپ تىركەۋ» جاڭا كومپوزيتتىك قىزمەت كورسەتۋدىڭ ارقاسىندا ازاماتتار ەكى جۇمىس كۇنى ىشىندە زاڭدى تۇلعانى مەملەكەتتىك تىركەۋ تۋرالى كۋالىك, بانك شوتىنىڭ ءنومىرىن جانە قىزمەتكەرلەردى جازاتايىم وقيعالاردان مىندەتتى ساقتاندىرۋ تۋرالى قول قويىلعان شارت الا الادى. بۇكىل وسى پروتسەستى ءوتىنىش بەرۋشى ءوزىنىڭ وفيسىنەن نە ۇيىنەن شىقپاي جۇزەگە اسىرادى. تۇتاستاي العاندا, ءراسىم بەس جۇمىس كۇنىنەن ەكى كۇنگە دەيىن قىسقاردى.
بۇگىنگى تاڭدا «egov» پورتالىندا اتالعان سەرۆيستى قولدانۋ ارقىلى مىناداي بانكتەردە بانك شوتىن اشۋ مۇمكىن – «ForteBank» اق, «تسەسنابانك» اق, «قازاقستان حالىق بانكى» اق جانە «الفا-بانك» اق. شارتتى «مەملەكەتتىك اننۋيتەتتىك كومپانيا» ءومىردى ساقتاندىرۋ كومپانياسى» اق-پەن جانە «ازيا Life» ءومىردى ساقتاندىرۋ كومپانياسى» اق-پەن جاساسۋعا بولادى. باسقا بانكتەر مەن ساقتاندىرۋ كومپانيالارى دا مۇنداي قىزمەت كورسەتۋدى ۇسىنۋ بويىنشا ءتيىستى جۇمىستار جۇرگىزىپ جاتىر.
اتالعان ء«بىر تەرەزەدەن» ونلاين-قىزمەت (زاڭدى تۇلعانى تىركەۋ, بانك شوتىن اشۋ جانە ساقتاندىرۋ شارتىن جاساسۋ) 2018 جىلعى 1 قاڭتاردان باستاپ كورسەتىلەدى. بۇل قىزمەتتى پايدالانۋ ءۇشىن قازاقستان رەسپۋبليكاسى زاڭناماسىنىڭ تالاپتارىنا سايكەس زاڭدى تۇلعانى تىركەۋ كەزەڭىندە بانك شوتىن اشۋ ءۇشىن ءوتىنىش بەرۋشىدەن: بانك شوتىن اشۋ شارتىنا قوسىلۋعا (بار بولسا) ءوتىنىش تولتىرۋ, تىزبەسىمەن ەلەكتروندى ۇكىمەتتىڭ سايتىندا تانىسۋعا بولاتىن قاجەتتى قۇجاتتاردى قوسا بەرۋ تالاپ ەتىلەدى.
قازاقستاننىڭ بيزنەسمەندەرى بۇل جاڭالىقتىڭ ىڭعايلىلىعىن جانە تيىمدىلىگىن باعالاپ وتىر. 2018 جىلعى قاڭتاردان باستاپ وسىنداي فۋنكتسيونال ارقىلى جاڭادان قۇرىلىپ جاتقان كومپانيالار «ەلەكتروندى ۇكىمەتتىڭ» پورتالى ارقىلى ەلەكتروندى تىركەۋ راسىمدەرىنەن ءوتۋ كەزىندە بانك شوتىن اشۋعا ەكىنشى دەڭگەيدەگى بانكتەرگە 199 ءوتىنىم كەلىپ ءتۇستى.
جانار ماماعۇلوۆا,
قازاقستان رەسپۋبليكاسى ۇلتتىق بانكىنىڭ تولەم جۇيەلەرى
دەپارتامەنتى تولەم جۇيەلەرىنىڭ
ساياساتى باسقارماسىنىڭ باس مامان-ەكونوميسى
