ءداستۇرلى جيىندا ۋنيۆەرسيتەت رەكتورى ەرلان سىدىقوۆ تانىمال مەديامەنەدجەرلەر مەن جەتەكشى جۋرناليستەردى ماراپاتتادى. قازاقستانداعى جەتەكشى جوعارى وقۋ ورىندارىنىڭ ءبىرى سانالاتىن ۋنيۆەرسيتەتتىڭ ەڭ جوعارى «كۇلتەگىن» توسبەلگىسىمەن «ەگەمەن قازاقستان» رگ» اق باسقارما توراعاسى دارحان قىدىرالى ماراپاتتالدى. سونداي-اق ەۇۋ-ءدىڭ باس ماراپاتىمەن «قازاقستان» رترك اق باسقارما توراعاسى ەرلان قارين, «حابار اگەنتتىگى» اق باسقارما توراعاسىنىڭ ورىنباسارى رينات دۋمان ۇلى, قازاق جۋرناليستيكاسىنىڭ حاس شەبەرى قاينار ولجاي, كورنەكتى تەلەجۋرناليست ءالىمجان سابىرجان ۇلى دا ماراپاتتالدى. سونىمەن قاتار ۋنيۆەرسيتەتتىڭ «گۋميلەۆ» توسبەلگىسىمەن «كازاحستانسكايا پراۆدا» گازەتى اق باسقارما توراعاسى ۆياچەسلاۆ پاششەنكو, «كازكونتەنت» اق باسقارما توراعاسى ەۆگەني كوچەتوۆ جانە جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى, پروفەسسور نامازالى وماش ۇلى ماراپاتتالدى.
سالتاناتتى كەشتە ءبىلىم ورداسىنىڭ جاعىمدى جاڭالىقتارى مەن جەمىستى جەتىستىكتەرىن جارقىراتىپ كورسەتىپ جۇرگەن «حابار 24», «قازاق راديوسى», «قازاقپارات», «Baq.kz», «استانا اقشامى» سەكىلدى اقپارات قۇرالدارىنىڭ ءبىر توپ وكىلدەرىنە رەكتوردىڭ «العىس حاتى» تاپسىرىلدى. مۇنداي ماراپاتتان ەۇۋ جۋرناليستيكا جانە ساياساتتانۋ فاكۋلتەتىنىڭ پروفەسسور-وقىتۋشىلارى دا شەت قالمادى.
مەرەكەلىك شارا اياسىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن «كازكونتەنت» اق اراسىنداعى قارىم-قاتىناستى نىعايتۋ ماقساتىندا مەموراندۋمعا قول قويىلدى. ءباسپاسوز مەرەكەسى قارساڭىندا جىل سايىن بيلياردتان وتەتىن اقسەلەۋ سەيدىمبەك اتىنداعى تۋرنير قورىتىندىلانىپ, تاستاياق جارىسىنىڭ باس جەڭىمپازدارى سەكەن تۇرىسبەك پەن ءالىمجان سابىرجان ۇلىنا كۋبوك جانە ديپلوم تابىس ەتىلدى.
