ەلىمىزدىڭ مەملەكەتتىك ءتاۋەلسىزدىگىنىڭ 20 جىلدىعى قارساڭىندا «قازاق ەنتسيكلوپەدياسى» باسپاسىنان قازاقستان رەسپۋبليكاسى پرەزيدەنتى كەڭسەسىنىڭ باستىعى, ساياسي عىلىمدار دوكتورى, پروفەسسور ماحمۇت قاسىمبەكوۆ جەتەكشىلىك ەتكەن شىعارماشىلىق توپتىڭ ءازىرلەۋىمەن «ءجۇرەكتەن جەتكەن جىرلار», «تۇلعا تۋرالى تولعامدار» جانە «رازمىشلەنيا و ليدەرە» دەپ اتالاتىن ءۇش جاڭا كىتاپ جارىققا شىقتى.
«جۇرەكتەن جەتكەن جىرلار» جيناعىنا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆقا ارنالىپ ءار جىلدارى جازىلعان پوەزيا جانرىنداعى شىعارمالار ەنگەن جانە وندا بەلگىلى قالام شەبەرلەرىنەن باستاپ, اۋەسقوي ادەبيەتشىلەرگە دەيىنگى 150-دەن استام اۆتوردىڭ تۋىندىلارى قامتىلعان.
«تۇلعا تۋرالى تولعامدار» مەن «رازمىشلەنيا و ليدەرە» جيناقتارىنا ەلباسىمىز تۋرالى ەلىمىزدىڭ باستى مەرزىمدى باسىلىمدارى بەتتەرىندە ءار كەزدەرى قازاق جانە ورىس تىلدەرىندە جارىق كورگەن تاڭداۋلى ماقالالار مەن سۇحباتتار ەنگىزىلگەن. جەكەلەگەن ماتەريالدار پرەزيدەنت مۇراعاتىنان الىنىپ, العاش رەت جاريالانىپ وتىر.
اتالعان كىتاپتاردا ءارتۇرلى جاستاعى, الۋان ۇلت پەن سان ءتۇرلى ماماندىق وكىلدەرى جانە بىرقاتار ساياسي كوزقاراستار مەن سەنىم-نانىم يەلەرى ازىرلەگەن قيلى سالانى قامتيتىن ماقالالارعا ورىن بەرىلگەن. ولاردىڭ قاتارىندا جۋرناليستەر, عالىمدار, پەداگوگتار, دارىگەرلەر, ادەبيەتشىلەر, ارتيستەر, سۋرەتشىلەر, ءساۋلەتشىلەر, ديپلوماتتار, ساياساتكەرلەر, كاسىپكەرلەر, فەرمەرلەر, مەملەكەتتىك قىزمەتشىلەر, پارتيالار مەن قوعامدىق بىرلەستىكتەردىڭ جەتەكشىلەرى, سوعىس جانە ەڭبەك ارداگەرلەرى, وقۋشى جاستار وكىلدەرى, ياعني ءىس جۇزىندە ءبىزدىڭ قوعامىمىزدىڭ الەۋمەتتىك قۇرىلىمىنىڭ بارلىق سپەكترى بار. بۇل پىكىرلەردىڭ قۇندىلىعى ونى ايتقان ادامداردىڭ وسى وقيعالاردى ءوز كوزدەرىمەن كورىپ, كوبىنە سولاردىڭ تىكەلەي قاتىسۋشىلارى بولىپ تابىلاتىندىعىندا دەر ەدىك.
تاريحي وقيعالاردى قالپىنا كەلتىرۋدە زامانداستاردىڭ ءوز اۋزىمەن بەرگەن, ءتىپتى قىسقا ءارى ءاتۇستى كۋالىكتەرىنىڭ ءوزى كەيدە بىتكەن ءىس تۋرالى تاپتىشتەي جاسالعان جۇيەلەۋ مەن يلاندىراتىن بايانداۋلارعا قاراعاندا الدەقايدا ۇلكەن اقپاراتتىق ماڭىزعا يە بولىپ تابىلاتىندىعى عىلىمعا جاقسى بەلگىلى.
كىتاپتىڭ مازمۇنى ىلگەرىلەۋ حرونولوگياسى بويىنشا – 1991 جىلدىڭ سوڭىنان بۇگىنگى كۇنگە دەيىن تۇزىلگەنىن ءارى ءار ماتەريالدىڭ رەسپۋبليكا دامۋىنىڭ بەلگىلى ءبىر كەزەڭىندە قالىپتاسقان جاعدايدىڭ وزىندىك ءبىر ۇندەس «كەسىندىسى» بولىپ تابىلاتىنىن ايتا كەتۋ كەرەك. مۇنىڭ ءوزى ەلدىڭ ەۆوليۋتسياسىن ديناميكالى تۇردە باقىلاۋعا ءارى ونىڭ الدىندا تۇرعان مىندەتتەردىڭ ءمانىن جانە ول مىندەتتەردىڭ قانداي جولدارمەن, قانداي ادىستەرمەن شەشىلىپ وتىرعانىن رەتروسپەكتيۆتى تۇردە قاراۋعا مۇمكىندىك بەرەدى. وقىرمان ن.ءا.نازارباەۆتىڭ ساياسي كوشباسشىلىق تاريحىنىڭ توركىنىنە وسى ارنادا زەر سالۋعا جانە بەدەلدىڭ, بۇكىلحالىقتىق سەنىم مەن حالىقارالىق تانىلۋدىڭ ءبىر كۇندە عانا كەلە قويمايتىنىنا, ول وتان يگىلىگى ءۇشىن كۇن سايىنعى جانە قاجىرلى ەڭبەكتىڭ زاڭدى ناتيجەسى ەكەندىگىنە كوپتەگەن مىسالداردىڭ نەگىزىندە كوز جەتكىزۋگە مۇمكىندىك الادى.
الايدا, اتالعان كىتاپتاردىڭ ەڭ باستى قۇندىلىعى ءبىر كەزدە كوڭىل قالاۋىمەن, جۇرەك امىرىمەن ايتىلعان بۇل ۇنقوسۋلار پرەزيدەنت تۋرالى ءسوز دەگەن ۇلكەن ۇعىمعا ۇلاسىپ, وندا ءبىزدىڭ ەلىمىزدىڭ الۋان قىرلى بەينەسىنىڭ – ءبىزدىڭ ارمانىمىزدىڭ, ءبىزدىڭ تاۋەلسىزدىگىمىزدىڭ الىپ پولوتنوسى شىنايى ءارى ايقىن سومداعاندىعى بولىپ تابىلادى.
كىتاپتار كوپشىلىك وقىرمان قاۋىمعا ارنالعان.
«ەگەمەن-اقپارات».
