بۇگىنگى تاڭدا قازاق ءالىپبيىن لاتىن قارپىنە اۋىستىرۋ تۋرالى ماسەلە شەشىلىپ, جاڭا ءالىپبيدىڭ سوڭعى نۇسقاسى قابىلدانعانىمەن, ساراپشىلاردىڭ كەڭ تالقىلاۋىن تالاپ ەتەتىن باسقا دا بىرقاتار پراكتيكالىق سۇراقتاردىڭ ءالى دە تۋىنداپ وتىرعانى بەلگىلى. ماسەلەن, «جاڭا قازاق ءالىپبيىن ءتىلدىڭ بارلىق سالالارىنا تەز ارادا ءارى ءتيىمدى ەتىپ قالاي ەنگىزۋگە بولادى؟», «كوپتەگەن جىلدار بويى كيريلليتسادا جازىلىپ كەتكەن مۇرامىزدى اۋدارۋ ءۇشىن قانداي اۋقىمدى جۇمىستار اتقارىلۋى كەرەك؟», «كيريلليتسادان لاتىنعا كوشۋ كەزىندە پايدا بولاتىن مادەني, دەموگرافيالىق جانە ساياسي ماسەلەلەر قانداي؟», «بەكىتىلگەن ءالىپبي نۇسقاسىن مەملەكەتتىك ورگانداردىڭ قىزمەتى مەن قازاقستاندىقتاردىڭ كۇندەلىكتى ومىرىنە ەنگىزۋدىڭ تاجىريبەلىك اسپەكتىلەرى قانداي؟». مىنە, وسى جانە وزگە دە كوكەيكەستى ماسەلەلەر دوڭگەلەك ۇستەلدە كەڭىنەن تالقىلاندى.
– وسىدان ءبىر عاسىرعا جۋىق ۋاقىت بۇرىن مۇستافا كەمال اتاتۇرىك ءوز ەلىندە ۇلكەن رەفورما جاساپ, تۇرىك ءالىپبيىن اراب قارپىنەن لاتىنعا كوشىرگەنى بارشاعا ءمالىم. ول كەزدە دە جاڭاشىل يدەياعا قارسىلىق بىلدىرگەندەردىڭ قاتارى مول بولدى. بىراق ۇستانىمى نىق مەملەكەت باسشىسى العان بەتىنەن قايتپاي, ماقساتىن جۇزەگە اسىردى. اتاتۇرىكتىڭ وسى يدەياسى جانە ۇستانعان باعىتىنىڭ دۇرىستىعىن ۋاقىتتىڭ ءوزى دالەلدەدى. وسىنداي قادامعا بارعان تۇركيا ەكونوميكالىق تۇرعىدان كوپ نارسە ۇتتى», – دەيدى بەلگىلى الەۋمەتتانۋشى, اەسي-ءدىڭ «ىشكى ساياسات جانە الەۋمەتتىك زەرتتەۋلەر» باعدارلاماسىنىڭ جەتەكشىسى سەرىك بەيسەمباەۆ.
الماتىدا وتكەن جيىن بارىسىندا سۇلەيمەن دەميرەل ۋنيۆەرسيتەتىنىڭ ء«تىل, مادەنيەت جانە كوممۋنيكاتسيا» عىلىمي-زەرتتەۋ زەرتحاناسىنىڭ مەڭگەرۋشىسى, فيلولوگيا عىلىمدارىنىڭ دوكتورى, پروفەسسور زاۋرەش احمەتجانوۆا, «اق جول» پارتياسى توراعاسىنىڭ ورىنباسارى, «قازاق ءۇنى» گازەتىنىڭ باسشىسى قازىبەك يسا, احمەت بايتۇرسىنوۆ اتىنداعى ءتىل ءبىلىمى ينستيتۋتىنىڭ پروفەسسورى, فيلولوگيا عىلىمدارىنىڭ دوكتورى زەينەپ بازارباەۆا جانە تاعى دا باسقا عالىمدار مەن قوعام قايراتكەرلەرى, ساياساتتانۋشىلار مەن ساراپشىلار ءوز ويلارىن ورتاعا سالىپ, وزەكتى ماسەلەلەردى شەشۋدىڭ وڭتايلى جولدارىن ۇسىندى.
عالىم سۇلەيمەن,
«ەگەمەن قازاقستان»
الماتى
