توپتىق كەزەڭنىڭ العاشقى قىزىعى 1-تۋردا باستالىپ ەدى. گەرمانيا جەڭىلىپ, برازيليا ءسۇرىنىپ, ارگەنتينا قيىندىقتارعا تاپ بولدى. لەونەل مەسسي باستاعان جىگىتتەر ءتىپتى 2-تۋردا دا ساتسىزدىكتەن ارىلا المادى. حورۆاتيادان 0:3 ەسەبىمەن جەڭىلدى. قالعان ەكى فاۆوريت – يسپانيا مەن پورتۋگاليا ءبىر-بىرىمەن تەڭ ءتۇسىپ, ەكىنشى ويىندارىندا 3 ۇپايدان يەمدەندى. ال پلەي-وففقا ەرتە باستان شىققان رەسەي مەن ۋرۋگۆايدىڭ جاعدايى جاقسى. كەيىننەن ولارعا حورۆاتيا مەن فرانتسيا قوسىلدى. ەندى بۇل تىزىمگە تاعى كىمدەر قوسىلادى؟
«س» توبىندا فرانتسيادان كەيىنگى ورىننان دانيانىڭ دامەسى زور. وعان باسەكەلەستىك تانىتىپ تۇرعان اۋستراليا عانا. سەبەبى پەرۋ ەكى ويىندا جەڭىلىپ, كەلەسى كەزەڭگە شىعۋ ماقساتىنان ايىرىلىپ قالعان. بىراق پەرۋاندىقتار سوڭعى ماتچتى جانكۇيەرلەر ءۇشىن, ەل ءۇشىن وينايمىز دەسە اۋستراليانىڭ اپشىسىن قۋىرارى انىق. ويىن مانەرى مەن جىلدام شابۋىلى كورەرمەندى ءتانتى ەتتى. تەك وزدەرى دانياعا قارسى ويىندا پەنالتي سوعا الماي, سورلاپ قالدى. ەندى سونىڭ زاردابىن تارتىپ, وتانعا ورالعالى وتىر. بولجام بويىنشا پەرۋ اۋستراليادان جەڭىلمەيدى. دانيا فرانتسيامەن تەڭ تۇسسە, ەكىنشى ورىندى يەمدەنىپ, جارىستى ودان ءارى جالعاستىرا بەرەدى. بۇل – توپتاعى 3 كوماندانى دا قاناعاتتاندىراتىن نۇسقا. دەمەك, كوپشىلىك وسىلاي قالاسا, وعان اۋستراليا قايراتسىز ويىنىمەن قارسىلىق بىلدىرە الماس.
ارگەنتينانىڭ كەلەسى اينالىمعا ءوتۋى تەك وزىنە عانا بايلانىستى ەمەس. ەڭ اۋىرى وسى بولىپ تۇر. الايدا ەگەر شابۋىل شەبىندەگى جىگىتتەر توپىرلاتىپ كوپ گول سوقسا, وندا «البيسەلەستە» كومانداسى كەلەسى اينالىمعا وتەدى. ارگەنتينانى قۇرتىپ تۇرعان دوپ ايىرماسى. دەمەك, يسلانديا حورۆاتيانى 1:0 ەسەبىمەن جەڭسە, ارگەنتينا نيگەريانى 2:0 ەسەبىمەن ۇتۋى ءتيىس. بىراق ودان كەيىن كورسەتكىشتەر بىردەي بولىپ قالىپ جاتسا, سارى قاعازدار سانى ەسەپتەلەدى. ديبالا, مەسسي, يگۋاين, اگۋەرو سەكىلدى جىگىتتەرگە مۇمكىندىك بولسا گول سوعا بەرگەنى دۇرىس. ونىڭ ۇستىنە 3-تۋردىڭ ويىندارى پارالەل, ءبىر ۋاقىتتا ءوتىپ جاتادى.
«ە» توبىنداعى شيەلەنىستىڭ دە شىرماۋى قاتتى. وتكەن جولعى بىرىنشىلىكتە اتوي سالعان كوستا-ريكا ەشقانداي شاراسىز قالدى. ەكى ويىندا جەڭىلىپ, ەندى ءۇشىنشى ماتچقا كۇش سالماق. ەگەر سوڭعى تۋردا كوستا-ريكا شۆەيتساريانى جەڭىپ كەتسە, وندا كەلەسى كەزەڭگە برازيليا مەن سەربيا ءوتىپ كەتەدى. ەگەر سەربيا برازيليانى ۇتىپ, شۆەيتساريا تەڭ تۇسسە, وندا نەيمار باستاعان سايىپقىراندار دا وپىق جەپ قالادى. سوندىقتان دا بۇل توپتاعى ەكى ويىندا سۇراپىل, جان الىسىپ, جان بەرىسكەن كەزدەسۋ بولارى حاق.
كوپ جاعدايدا 6 ۇپاي العان كوماندالار كەلەسى كەزەڭگە ءوتىپ جاتادى. بىراق «F» توبىندا ولاي ەمەس. ەكى ويىندا جەڭگەن مەكسيكا توپتان شىقپاي قالۋى مۇمكىن. ول ءۇشىن گەرمانيا وڭتۇستىك كورەيانى ۇتىپ, شۆەتسيا مەكسيكانى جەڭۋى ءتيىس. الەم چەمپيونىن جەڭىپ, ودان كەيىن ەكىنشى ماچتا دا جەڭىمپاز اتانىپ, توپتان شىعا الماي قالۋ – مەكسيكا فۋتبولشىلارىنا اۋىر تيەرى انىق. سوندىقتان دا كارلوس وساريو كومانداسىنا كەم دەگەندە تەڭ ءتۇسۋ كەرەك.
تارتىسى تاۋسىلىپ, قىزىعار تۇگى قالماعان «G» توبىندا انگليا مەن بەلگيا اراسىنداعى ماتچ ءبىراز جانكۇيەرگە قىزىقتى بولۋى مۇمكىن. بۇل ەكى كوماندانىڭ ساپىندا اعىلشىن پرەمەر-ليگاسىندا ونەر كورسەتەتىن فۋتبولشىلار وتە كوپ. جولداستىق ويىن دەپ ايتىلسا دا, قاي جەڭگەنى توپتاعى ءبىرىنشى ورىندى يەمدەنەدى.
ال سوڭعى توپتاعى جالعىز ەۋروپالىق ۇجىم – پولشا ەش مۇمكىندىكسىز قالدى. ەندى ولار سوڭعى ويىندا جاپونيانىڭ بار ماقسات-مۇددەسىنىڭ كۇل تالقانىن شىعارىپ كەتۋى مۇمكىن. سەبەبى سەنەگال مەن كولۋمبيانىڭ دا كەلەسى كەزەڭگە وتەتىن مۇمكىندىگى زور.
ەرمۇحامەد ماۋلەن,
«ەگەمەن قازاقستان»
