سوڭعى كەزدە قازاقستان مەن وزبەكستان اراسىندا ەكونوميكالىق قارىم-قاتىناس ەرەكشە جانداندى. ەلباسى ن.نازارباەۆتىڭ 2018 جىلدى «وزبەكستاننىڭ قازاقستانداعى جىلى» دەپ جاريالاۋى دا باۋىرلاس ەكى ەلدىڭ اراسىنداعى الىس-بەرىستىڭ ەكىنشى تىنىسىن اشتى. وسى جيىنعا ارنايى قاتىسقان قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل بولات پالىمبەتوۆتىڭ ايتۋىنشا, بۇگىندە وزبەك جەرىندە جۇمىس ىستەپ جاتقان 350-دەي قازاقستاندىق كومپانيانىڭ 150-ءى سوڭعى رەفورما باستالعان ءبىر جىلدىڭ ىشىندە قۇرىلعان ەكەن.
– بۇگىندە 2,5 مىڭداي وزبەكستاندىق كومپانيا قازاقستاندا قىزمەت ەتەدى. ەندى مىنە, وزبەك جەرىندە دە قازاقستاندىق كاسىپكەرلەردىڭ ەمىن-ەركىن جۇمىس ىستەۋىنە بار جاعداي جاسالىپ جاتىر ەكەن. وزبەكستان پرەزيدەنتى جانىنداعى وكىلدىڭ اڭگىمەسىن تىڭداپ, شەتەلدىك كاسىپكەرلەرگە بەرىلەتىن جەڭىلدىكتەر تۋرالى ەستىپ تاڭعالىپ وتىرمىن. كەلەر جىلى كورشى ەلدە قازاقستان جىلى جاريالانباق. بۇل شارالار ەكى ەلدىڭ ەكونوميكالىق قارىم-قاتىناسىن ودان ءارى دامىتادى دەپ ويلايمىن, – دەدى بولات پالىمبەتوۆ.
وزبەكستان تاراپى جاريالاعان دەرەكتەرگە قاراعاندا, ەكى ەل اراسىنداعى تاۋار اينالىمى 2018 جىلدىڭ قاڭتار-مامىر ارالىعىندا 1 ملرد اقش دوللارىنان اسقان. بۇل وسىدان ءبىر جىل بۇرىنعى كورسەتكىشتەن 1,5 ەسە ارتىق ەكەن. وزبەكستان جاعى ءوز ەلىنىڭ ينۆەستيتسيالىق تارتىمدىلىعىن كوتەرۋ ءۇشىن تىڭ رەفورما باستاعان. وزبەكستان پرەزيدەنتىنىڭ ۇسىنىسىمەن 2017 جىلى پرەزيدەنت جانىنان كاسىپكەرلەردىڭ قۇقىقتارى مەن زاڭدى مۇددەلەرىن قورعاۋشى وكىل ينس-
تيتۋتى قۇرىلدى. كاسىپكەرلىككە قاتىستى بۇرىنعى شەكتەۋلەردىڭ كوبى جويىلعان. ماسەلەن, بۇل ەلگە 1-3 ملن اقش دوللارى كولەمىندە ينۆەستيتسيا سالاتىن شەتەلدىك كومپانيا ءۇش جىلعا دەيىن بارلىق تابىس, كەدەن سالىعىنان بوساتىلادى. ينۆەستيتسيا كولەمى ارتقان سايىن سالىق جەڭىلدىكتەرى دە ۇزارا بەرەدى. وزبەكستان 2025 جىلعا قاراي الەمنىڭ ەڭ دامىعان 30 ەلىنىڭ قاتارىنا ەنۋدى ماقسات ەتىپتى.
– قازاقستان پرەزيدەنتى نۇرسۇلتان ءابىش ۇلىنىڭ «قازىرگى زاماندا ەشبىر ەل, ەشبىر مەملەكەت توماعا-تۇيىق ءومىر ءسۇرىپ, وزدىگىنەن دامي المايدى» دەگەن قاناتتى ءسوزى بار. اسىرەسە ورتالىق ازياداعى كورشىلەس مەملەكەتتەردىڭ ينتەگراتسياسى الەمدى الاڭداتقان ەكونوميكالىق داعدارىستان وڭاي شىعۋعا اسەر ەتەدى. وڭىردەگى ەڭ ءىرى, ىرگەتاسى قالىپتاسقان ەكى مەملەكەت بۇكىل ايماقتىڭ ءوندىرىسىن العا سۇيرەيدى. وزبەكستان قازىر ەرەكشە وزگەرىس, سەرپىندى دامۋ قارساڭىندا. ەلدە 16 ەركىن ەكونوميكالىق ايماق قۇرىلدى. كاسىپكەرلىكتىڭ دامۋىنا بارلىق جاعداي جاسالعان. سوندىقتان قازاقستاندىق كاسىپكەرلەردى ءبىزدىڭ ەلگە شاقىرامىز, – دەيدى وزبەكستان وكىلى ميرشود ناسرۋللاەۆ.
وسى جيىنعا قاتىسقان وتاندىق بيزنەس وكىلدەرى وزبەكستانعا بارعان قازاق بيزنەسمەنىنىڭ العاشقى قادامىن نەدەن, قاي جەردەن باستاۋى كەرەكتىگى, الاياقتىق, باسقا دا زاڭسىزدىقتار كەزدەسكەن جاعدايدا شەتەلدىك كاسىپكەردىڭ قورعالۋى, سالىق جەڭىلدىكتەرىنىڭ ناقتى مىسالدارى جايلى ساۋالدار قويىپ, وعان تولىق جاۋاپ الدى. ەكى ەل ارا-
سىندا قىزمەت ەتۋشى كاسىپكەرلەرگە ارنالعان ينتەرنەت پورتال قۇرۋ جايى دا تالقىلاندى. قازىر قالىپتاسقان جىلى قارىم-قاتىناس, ىسكەرلىك بايلانىستاردى ودان ءارى دامىتۋ تۋرالى ۇسىنىستار ايتىلدى.
– وزبەكستان – بۇرىنعى وزبەكستان ەمەس, 360 گرادۋسقا وزگەردى. بىزدە ەڭبەك ەتىپ, جاقسى تابىس تابۋعا بارلىق جاعداي جاسالعان. ءتىپتى وزبەكستاندا شەتەلدىك كاسىپورىن رەتىندە تىركەلىپ, باسقا شەتەلگە يمپورت شىعارۋشى كومپانيالارعا دا مەملەكەتتىڭ ۇلكەن قولداۋى بار. كەلىڭىزدەر, كورىڭىزدەر! – دەيدى وزبەكستان پرەزيدەنتىنىڭ جانىنداعى كاسىپكەرلەردىڭ قۇقىقتارى مەن زاڭدى مۇددەلەرىن قورعاۋشى وكىل ديلمۋرود كاسيموۆ.
قازىبەك قۇتتىمۇرات ۇلى,
«ەگەمەن قازاقستان»
استانا
