بۇدان كەيىن استانا قالاسىنىڭ اكىمى اسەت يسەكەشەۆ پەن قاراعاندى وبلىسىنىڭ اكىمى ەرلان قوشانوۆ كەنشىلەر استاناسىندا وتكەن «وڭىرارالىق ىنتىماقتاستىق: استانا قالاسى – قاراعاندى وبلىسى» اتتى بيزنەس-فورۋمعا قاتىستى.
ايماقارالىق ىنتىماقتاستىقتى دامىتۋ ماسەلەلەرى جان-جاقتى ءسوز بولعان جيىننىڭ سالتاناتتى اشىلۋىندا قاراعاندى وبلىسىنىڭ اكىمى ەرلان قوشانوۆ قوناقتاردى استانانىڭ الدا كەلە جاتقان مەرەيتويىمەن قۇتتىقتادى.
– استانانىڭ قۇرىلىسىنا قاراعاندى وبلىسى بەلسەنە قاتىستى. بۇگىندە ءبىزدىڭ كوپتەگەن جەرلەستەرىمىز ەلوردادا جۇمىس ىستەيدى. جالپى, استانا مەن قاراعاندى وبلىسىنىڭ سەرىكتەستىگى ءساتتى بولىپ وتىر. قاراعاندى وبلىسىنىڭ ورنالاسقان جەرى مەن ينفراقۇرىلىمى وتە قولايلى. بيىل استانا – قاراعاندى اۆتوبانىنىڭ قۇرىلىسى اياقتالادى, بۇل ءبىزدىڭ قالالارىمىزدى ودان ءارى جاقىنداتا تۇسەدى, – دەپ اتاپ ءوتتى ءوڭىر باسشىسى.
جالپى, القالى جيىندا «سمارت-سيتي» قاناتقاقتى جوباسى, دەنساۋلىق ساقتاۋ سالاسىنداعى تسيفرلاندىرۋ, مەملەكەت-جەكەمەنشىك ارىپتەستىگى مەحانيزمىن ىسكە اسىرۋ تاجىريبەسى, كووپەراتسيا جۇيەسى بويىنشا وندىرىستىك ونىمدەردى ءوندىرۋ جانە جەتكىزۋ, ەلوردانىڭ ازىق-ت ۇلىك بەلدەۋىنىڭ مۇمكىندىگىن ارتتىرۋ جانە ءوڭىردىڭ باسقا دا دامۋ باسىمدىقتارى نەگىزگى اڭگىمەگە ارقاۋ بولدى. قاراعاندى وبلىسىنىڭ اكىمى ەرلان قوشانوۆ Smart City جوباسىن ىسكە اسىرۋدا بىرلەسە جۇمىس ىستەۋدى ۇسىندى. ونىڭ پىكىرىنشە, ايماقارالىق ىنتىماقتاستىقتى تۋريزم, كاسىپكەرلىك جانە ساندىق تەحنولوگيالار سالالارىندا دامىتۋ كەرەك.
قازىرگى تاڭدا قاراعاندى وبلىسىنىڭ اۋىل شارۋاشىلىعى تاۋارلارىن ءوندىرۋشى ەكى مىڭنان استام كاسىپورىن ەلوردا نارىعىمەن تىعىز قارىم-قاتىناس ورناتقان. بىلتىر ولار استانا قالاسىنا 25 ميلليارد تەڭگەنىڭ ءونىمىن جەتكىزگەن ەكەن. ال كەلەسى جىلى بۇل كورسەتكىشتىڭ كولەمىن 40 پايىزعا ارتتىرۋ جوسپارلانىپتى.
جيىندا استانانىڭ اكىمى ەلوردانىڭ بۇگىنگى تىنىس-تىرشىلىگىنەن مول ماعلۇمات بەردى. قازىرگى تاڭدا ەلىمىزدىڭ باس قالاسىندا شاعىن جانە ورتا بيزنەستىڭ 100 مىڭنان استام سۋبەكتىلەرى جۇمىس ىستەيدى ەكەن. ولاردىڭ ەكونوميكالىق قۇرىلىمداعى ۇلەسى 58%-دى قۇرايدى. ۋربانيزاتسيا مەن كوشى-قون ۇدەرىسىن باستان كەشىپ جاتقان ەلوردادا حالىق سانى ارتىپ, قۇرىلىس بەلسەندى تۇردە جۇرگىزىلىپ جاتىر. جيىرما جىلدىڭ ىشىندە استاناعا 8 تريلليون تەڭگە ينۆەستيتسيا سالىنعان. اكىمنىڭ ايتۋىنشا, بيۋدجەتتەن بولىنگەن 3 تريلليون تەڭگە قارجى ەكى ەسەگە جۋىق وتەلگەن. «مەگاپوليستىڭ قارقىندى دامۋى ەڭبەك رەسۋرسىن قاجەت ەتەدى, كادرلارعا دەگەن سۇرانىس ارتادى. بىرقاتار ماماندىق يەلەرىنىڭ جەتىسپەۋشىلىگى سەزىلەدى. مىسالى, بۇگىندە اۆتوبۋس جۇرگىزۋشىلەرى كەرەك. الداعى بەس جىلدا استانادا 150 مىڭ جاڭا جۇمىس ورنىن اشۋ كوزدەلگەن», – دەدى اسەت يسەكەشەۆ.
فورۋم اياسىندا ءتورت بىردەي مەموراندۋمعا قول قويىلدى. اتاپ ايتقاندا, استانا قالاسىنىڭ اكىمدىگى مەن قاراعاندى وبلىسىنىڭ اكىمدىگى, «استانا كونۆەنشن بيۋروسى» جشس مەن قاراعاندى وبلىسىنىڭ كاسىپكەرلىك باسقارماسى, «استانا Innovations» اق پەن قاراعاندى وبلىسىنىڭ اقپاراتتاندىرۋ, مەملەكەتتىك قىزمەتتەر كورسەتۋ جانە مۇراعاتتار باسقارماسى, «استانا» اكك» ۇك» اق پەن «سارىارقا» اكك» ۇك» اق اراسىندا ءوزارا ىنتىماقتاستىق تۋرالى كەلىسىمدەرگە قول جەتكىزىلدى.
* * *
«استانا قالاسىنىڭ كۇندەرى» فەستيۆالىنىڭ اياسىندا بىرقاتار مادەني شارالار جۇزەگە اسىرىلدى. كەنشىلەردىڭ مادەنيەت سارايىندا «اق تىلەكپەن, استانا!» اتتى كورمە ءوتتى. وندا ەلورداداعى تاۋەلسىزدىك سارايىنىڭ قورىنان الىنعان قازاقستاندىق ونەر شەبەرلەرىنىڭ 60-قا جۋىق تۋىندىسى قويىلىپ, جۇرت نازارىنا ۇسىنىلدى.
كورمەدەن كەيىن قاراعاندىلىق ونەرسۇيەر قاۋىم «استانادان اق تىلەك!» اتتى ايتا جۇرەرلىك كونتسەرتتىڭ كۋاسى بولدى. كەشتە استانا قالاسىنىڭ مەملەكەتتىك اكادەميالىق فيلارمونياسىنىڭ قازاق وركەسترى, «شالقىما» حالىق ءبيى جانە ەسترادالىق بي انسامبلدەرى, كلاسسيكالىق جانە ەسترادالىق ۆوكال ءبولىمىنىڭ ءانشى-سوليستەرى ونەر كورسەتىپ, كورەرمەنگە ەستەتيكالىق ءلاززات سىيلادى.
قايرات ءابىلدا,
«ەگەمەن قازاقستان»
قاراعاندى وبلىسى
