شىمكەنت مەملەكەتتىك زوولوگيالىق ساياباعىن جاڭعىرتۋ ماقساتىندا قايتا قۇرۋ جۇمىستارى جۇرگىزىلىپ, كۇنى كەشە «افريكا» ايماعى اشىلدى. جالپى, «افريكا» زوولوگيالىق ايماعىنىڭ قۇرىلىس جۇمىسى وتكەن جىلدىڭ ءساۋىر ايىندا باستالعان. جوبا قۇنى – 627 114 000 تەڭگە. بۇل جاقتا كەمىرگىشتەر, سيراقتى قۇستار, جىرتقىش مىسىقتار مەن باۋىرىمەن جورعالاۋشىلار – افريكالىق ساۆاننادا مەكەندەيتىن جانۋارلار ءۇشىن 8 تۇراق سالىنعان. ۆولەرگە جاقىن جەرگە سۋسيىر ورنالاسقان. تابيعاتقا مەيلىنشە جاقىنداستىرىلىپ جاسالعان ايماق جانۋارلار ءۇشىن ىڭعايلى. پاۆيلوندار اشىق تابيعي ورتاعا بەيىمدەلگەن. زووباق ديرەكتورى نۇرعازى بۇحارباەۆتىڭ ايتۋىنشا, «افريكا» ايماعى ەلىمىز تۇرماق, تمد ەلدەرىندە جوق جوبا.
ايتا كەتەيىك, شىمكەنت زووباعى سيرەك كەزدەسەتىن جانە جويىلىپ بارا جاتقان جان-جانۋارلاردى ساقتاپ, ولاردى كوبەيتۋ ماقساتىندا 1980 جىلى قۇرىلعان. ول كەزدە زووباقتا 75 ءتۇرلى اڭ بولسا, بۇگىندە 249 ءتۇرلى 2 565 جانۋارعا جەتكەن. جالپى اۋماعى – 29 گەكتار, ونىڭ 19 گەكتارى ءتۇرلى ەكسپوزيتسياعا ارنالعان ساياباقتاعى «افريكا» ايماعىنىڭ اشىلۋىنا بايلانىستى جان-جانۋارلارمەن تولىقتىرۋ ماقساتىندا «ەۋرازيا» قۇرامىنداعى زووباقتاردان اڭدارعا تاعى سۇرانىس بەرىلگەن. ياعني اڭ تۇرلەرىنىڭ سانى تاعى دا ارتپاق. سونداي-اق مۇندا كەلۋشىلەر سانى دا جىل سايىن ارتا تۇسۋدە. مىسالى, 2017 جىلى كەلۋشىلەر سانى 426 مىڭعا جەتسە, وسى جىلدىڭ 3 ايىندا 60 مىڭنان استام ادام كەلگەن. ايتپاقشى ەلوردانىڭ 20 جىلدىعىنا شىمكەنت قالاسىنىڭ تۇرعىندارى اتىنان استانا قالاسىنا جانۋاردىڭ 20 ءتۇرى جەتكىزىلمەك. ناقتىراق ايتساق, ەلورداعا شىمكەنتتەن ارىستان, امۋر جولبارىسى, پۋما, قوڭىر ايۋ سەكىلدى جىرتقىشتار مەن كەزقۇيرىق, تىلەمىش, تازقارا, ۇكى قۇستارى جانە باسقا دا جانۋارلار تارتۋ ەتىلمەك.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
