– بۇگىن ءبىز ءۇشىن ايتۋلى كۇن. بۇعان دەيىن كىشكەنتاي ناۋقاستارىمىز بارلىق ءپان بويىنشا پالاتالارىندا ءبىلىم الىپ كەلسە, ەندى وسى سىنىپتا بىلىمدەرىن جالعاستىرىپ قانا قويماي, بوس ۋاقىتتارىن ءماندى وتكىزە الادى. سۋرەت سالۋ, كونسترۋكتور قۇراۋ, اعىلشىن ءتىلىن ۇيرەنۋ, دويبى, شاحمات ۇيىرمەلەرى جۇمىسىن باستايدى. بۇل بالالاردىڭ تەزىرەك جازىلىپ, ساۋىعىپ كەتۋىنە وڭ اسەرىن تيگىزەدى دەپ سەنەمىز, – دەدى يننوۆاتسيالىق سىنىپتىڭ تۇساۋكەسەرىندە ورتالىق ديرەكتورى ريزا بورانباەۆا.
يننوۆاتسيالىق وقۋ بولمەسى ونكولوگيالىق دەرتكە شالدىققان بالالارعا ارنالعان. ورتالىقتا بۇگىنگى كۇنى جۇزدەن استام بالا ەم قابىلداپ جاتىر.
عىلىمي ورتالىقتىڭ مۇنداي يگىلىككە قول جەتكىزۋىنە Samsung Electronics Central Eurasia كومپانياسى قولداۋ كورسەتتى. بۇگىنگە دەيىن كومپانيا ەلىمىزدىڭ مەكتەپتەرىندە وسى ىسپەتتى 13 سمارت سىنىپ اشقان.
– ءبىز وسىنداي وقۋ سىنىپتارىنىڭ ونكولوگيالىق اۋرۋلارعا شالدىققان بالالارعا وڭ اسەرى تيەتىنىن رەسەيدەگى روگاچەۆ اتىنداعى ونكولوگيا جانە گەماتولوگيا ورتالىعىنان بىلدىك. بالالاردىڭ ساۋىعىپ كەتۋىنە سەپتىگىمىزدى تيگىزۋ ءۇشىن ەم الاتىن بالالارعا سىيعا تارتۋدى ءجون كوردىك, – دەدى Samsung Electronics Central Eurasia كومپانيا وكىلى بەرىك وماروۆ.
وسى ارادا بۇل كاسىپورىن وتكەن جىلى انا مەن بالا ۇلتتىق عىلىمي ورتالىعىنا ءدال وسىنداي سمارت سىنىپتى سىيعا تارتقانىن ايتا كەتۋ كەرەك.
زاماناۋي قۇرالدارمەن جابدىقتالعان وقۋ سىنىبىندا بالالار ماتەماتيكا, تاريح, اعىلشىن ءتىلى سياقتى جالپى پاندەرمەن قاتار, شىعارماشىلىقپەن دە اينالىسا الادى. سونداي-اق مۋزىكا مەن ەرتەگىلەردىڭ كومەگىمەن تەراپيا سەانستارى وتكىزىلەدى. ورتالىققا كەلىپ ءدارىس بەرەتىن مۇعالىمدەر ساباقتاردى ءتيىمدى جانە قىزىقتى ەتىپ ونلاين رەجىمدە دە جۇرگىزە الادى. ونلاين تۇرىندە وتەتىن ساباقتارعا ەندى توسەككە تاڭىلعان بالالار دا قاتىسا الادى. سىنىپ ۇلكەن ينتەراكتيۆتى تاقتامەن, ەكولوگيالىق تازا جيھازدارمەن قامتاماسىز ەتىلگەن. ءىشى زامان تالابىنا ساي ارلەنىپ, بەزەندىرىلگەن. ورتالىقتا ەمدەلۋشى بالالار ساباقتاردى جاڭا وقۋ جىلىنان جاڭا فورماتتا وقيتىن بولادى. سۋرەت سالۋ, كونسترۋكتور قۇراۋ, اعىلشىن ءتىلىن ۇيرەنۋ, دويبى, شاحمات ۇيىرمەلەرىن «HelpToday» قوعامدىق ۇيىمىنىڭ 10-عا جۋىق ەرىكتى وكىلدەرى تەگىن جۇرگىزەتىن بولادى.
ايناش ەسالي,
«ەگەمەن قازاقستان»
الماتى
