قىزىلوردا وبلىسىنا «حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى» كە اق دەلەگاتسياسى ىسساپارمەن كەلدى. ساپار بارىسىندا دەلەگاتسيا مۇشەلەرى سىر وڭىرىندە «جاسىل» تەحنولوگيالاردى ەنگىزۋ جونىندە ءماجىلىس پەن قىزىلوردا وبلىسىندا يننوۆاتسيالىق تەحنولوگيالاردى ەنگىزۋ بويىنشا ارىپتەستىك تۋرالى مەموراندۋمعا قول قويۋ راسىمىنە قاتىسىپ, ايماقتىڭ بىرقاتار نىسانىن ارالادى.
ءماجىلىستى اشقان وبلىس اكىمى قىرىمبەك كوشەرباەۆ وڭىردە «جاسىل» ەكونوميكاعا كوشۋ جانە ينۆەستيتسيالاردى تارتۋ بويىنشا جۇرگىزىلىپ جاتقان جۇمىستاردى اتاپ ءوتتى.
«جاسىل» ەكونوميكاعا كوشۋ جونىندەگى تۇجىرىمداماعا سايكەس وبلىسىمىزدا 7 باعىت بويىنشا جۇمىس جۇرگىزىلىپ جاتىر. وبلىستىق بيۋدجەتتەن قازالى جانە قارماقشى اۋداندارىندا قاتتى تۇرمىستىق قالدىقتار پوليگونىن سالۋعا قاجەتتى قاراجات ءبولىندى. وزدەرىڭىز بىلەتىندەي, ەلباسىنىڭ جولداۋىنان تۋىنداعان باستى مىندەتتەرىنىڭ ءبىرى – ينۆەستيتسيالاردى تارتۋ. وسى ماقساتتا وبلىسىمىزدا بارلىق قىزمەتتەردى ءبىر جەردەن الۋعا مۇمكىندىك بەرەتىن بىرىڭعاي كاسىپكەرلەرگە قىزمەت كورسەتۋ ورتالىعى جۇمىس ىستەيدى. 2018 ج. 5 ايىندا نەگىزگى كاپيتالعا تارتىلعان ينۆەستيتسيالار كولەمى 15,4 پايىزعا ءوسىپ, 65,9 ملرد.تەڭگەنى قۇرادى», - دەدى ايماق باسشىسى.
اتاپ وتەيىك, كاسىپكەرلەرگە قىزمەت كورسەتۋ ورتالىعىنىڭ جۇمىسى تولىقتاي اۆتوماتتاندىرىلعان, سوندىقتان تەحنيكالىق شارتتاردى ۇسىنۋ مەرزىمى 1 ايدان 3 جۇمىس كۇنىنە دەيىن قىسقاردى.
ماسەلەن, 7 باعىت شەڭبەرىندە ەلەكتر قۋاتىن ۇنەمدەۋ سالاسىندا قىزۋ شامدارىن قۋات ۇنەمدەيتىن شامدارعا اۋىستىرۋ جۇمىستارى بەلسەندى جۇرگىزىلىپ, ناتيجەسىندە كوشە جارىقتاندىرۋ شىعىندارى 12 % ازايدى. قالدىقتاردى باسقارۋ سالاسىندا قاتتى تۇرمىستىق قالدىقتاردى قايتا وندەيتىن كومپانيالار پايدالانىلعان اۆتوكولىك دوڭگەلەكتەرىن قايتا وندەپ, تروتۋار پليتالارى مەن چەرەپيتسا شىعارىپ, رەزەڭكە ۇنتاعى مەن تامشىلاتىپ سۋارۋ ءۇشىن پايدالانىلاتىن جەراستى قۇبىرلارىنىڭ ءوندىرىسىن قولعا الدى جانە ت.ب.
«ەكسپو-2017» كورمەسى كەزىندە تانىستىرىلعان جوبالار اياسىندا وبلىستا وسى جوبالاردى جۇزەگە اسىرۋ جۇمىستارى جۇرگىزىلىپ جاتىر. ماسەلەن, اتوم (ۋران) ونەركاسىبى سالاسىندا - 4 تەحنولوگيا («قىزىلقۇم» جشس, «رۋ-6» جشس, «بايكەن-U» جشس, «سەمىزباي-U» جشس), ەكولوگيا سالاسىندا – 2 تەحنولوگيا («بارساكەلمەس» قورىعى, ورمان شارۋاشىلىعى); تۇرعىن ءۇي-كوممۋنالدىق شارۋاشىلىق سالاسىندا – 1 جوبا (كەتك). اتاپ ايتقاندا, «كەتك» اق (ەلەكتر جۇيەلەرى كومپانياسى) مەن «Siemens» كومپانياسى اراسىندا «سمارت گريد» قۋاتتى ۇنەمدەۋ تەحنولوگياسىن ەنگىزۋ تۋرالى كەلىسىمگە قول قويىلدى.
ءوز كەزەگىندە, راپيل جوشىباەۆ حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعىنىڭ «جاسىل» جانە جاڭارتىلمالى قۋات كوزدەرى, قۋات تيىمدىلىگى مەن قۋاتتى ۇنەمدەۋ, قاتتى تۇرمىستىق قالدىقتاردى باسقارۋ, تۇرعىن ءۇي-كوممۋنالدىق شارۋاشىلىعى مەن اۋىل شارۋاشىلىعى ماسەلەلەرى بويىنشا جەرگىلىكتى اتقارۋشى ورگاندارمەن ارىپتەستىك ورناتۋدىڭ ماڭىزدىلىعىن اتاپ ءوتتى.
«تەحنيكالىق جانە اكىمشىلىك قولداۋ, سونداي-اق, جاسىل ينۆەستيتسيالىق جوبالاردى سۇيەمەلدەۋ اياسىندا ورتالىق قازاقستان ايماقتارىندا «بىرىڭعاي تەرەزە» قاعيداسىمەن جۇمىس ىستەيتىن بولادى. سونىمەن قاتار, جاسىل تەحنولوگيالار رەەسترىن قالىپتاستىرۋ جانە جۇرگىزۋ, ال جەرگىلىكتى اتقارۋشى ورگاندارىمەن ءوزارا ارەكەت ەتۋ اياسىندا وڭىرلىك «جاسىل جوبالار كارتاسىن» ازىرلەۋ جوسپارلانۋدا. بۇل جۇمىس قر ايماقتارىندا الەۋەتتى تومەن كومىرتەكتى جوبالاردى انىقتاپ, جاسىل جوبالاردى ىرىكتەۋ ءارى جۇزەگە اسىرۋ ماقساتىندا بيزنەس ءۇشىن تۇعىرناما جاساقتاۋعا جول اشادى» , - دەدى راپيل جوشىباەۆ.
جيىن قورىتىندىسىمەن قىزىلوردا وبلىسىندا «جاسىل تەحنولوگيالاردى» ەنگىزۋ جانە ينۆەستيتسيالاردى, ونىڭ ىشىندە حالىقارالىق ينۆەستيتسيالاردى تارتۋ جونىندە مەموراندۋمعا قول قويىلدى. مەموراندۋم تۇراقتى دامۋ, ەكولوگيا, «جاسىل» ەنەرگەتيكا مەن جاڭارتىلمالى قۋات كوزدەرى, قۋاتتى ۇنەمدەۋ جانە ءتيىمدى پايدالانۋ, تسيفرلاندىرۋ, قاتتى تۇرمىستىق قالدىقتاردى وندەۋ جانە اۋىل شارۋاشىلىعىنىڭ تۇراقتى دامۋى سالاسىندا جوبالاردى جۇزەگە اسىرۋ ماسەلەلەرى بويىنشا ءوزارا ارەكەت ەتۋدى كوزدەيدى.
قىزىلوردا وبلىسىنا جۇمىس ساپارى اياسىندا دەلەگاتسيا مۇشەلەرى سىرداريانىڭ سول جاعالاۋىنداعى جاڭا قالا نىساندارىن, اۆتوكولىك شينالارىن وندەۋمەن اينالىساتىن «سمارت راببەر» جشس, جانە وبلىس ورتالىعىنىڭ بىرقاتار وندىرىستىك, الەۋمەتتىك جانە مادەني نىساندارىن ارالادى.
