قىزىلوردا وبلىسىنىڭ جاڭاقورعان جانە شيەلى اۋداندارىندا مۇددەلى مەملەكەتتىك ورگاندار مەن قارجى ينستيتۋتتارى وكىلدەرىنىڭ قاتىسۋىمەن كاسىپكەرلىكتى دامىتۋ بويىنشا كوشپەلى جيىندار ءوتتى.
جيىن باسىندا وبلىس اكىمى قىرىمبەك كوشەرباەۆ جاپپاي كاسىپكەرلىكتىڭ دامۋى تۇراقتى جۇمىس ورىندارىنىڭ قۇرىلۋىنا, سالىق بازاسىنىڭ كوبەيۋىنە جانە الەۋمەتتىك تۇراقتىلىقتى قامتاماسىز ەتۋگە تىكەلەي اسەر ەتەتىنىن اتاپ ءوتتى.
ء«بىزدىڭ مىندەتىمىز – اۋىلدىق جەرلەردە كاسىپكەرلىكتى دامىتۋ جانە قولداۋ, سوندىقتان جىل قورىتىندىسى بويىنشا بيىل كاسىبىن باستاعان ءار اۋدان مەن وبلىس ورتالىعىندا ۇزدىك ستارتاپ-كاسىپكەرلەردى, سونداي-اق, ۇزدىك اۋدان اكىمى مەن جاۋاپتى لاۋازىمدى تۇلعانى 1 ميلليون تەڭگە كولەمىندە سىياقىمەن ماراپاتتاۋ تۋرالى شەشىم قابىلدادىق», - دەدى ايماق باسشىسى.
سونىمەن قاتار, وبلىس اكىمى قويىلعان مىندەتتەرىن ورىنداي الماعان لاۋازىمدى تۇلعالار جاۋاپكەرشىلىككە تارتىلاتىنىن دا ەسكەرتتى.
ءوز كەزەگىندە, اۋدان اكىمدەرى مەن قارجى ينستيتۋتتارىنىڭ باسشىلارى شاعىن جانە ورتا بيزنەستى دامىتۋ بارىسى تۋرالى بايانداپ بەردى. اتاپ ايتقاندا, جاڭاقورعان اۋدانىنىڭ اكىمى عالىم امىرەەۆ جەرگىلىكتى ماماندار قىرعىزستان مەن وزبەكستاننىڭ جىلىجاي بيزنەسىن دامىتۋ بويىنشا تاجىريبەسىن, سونداي-اق, قازاق كارتوپ جانە كوكونىس شارۋاشىلىعى عىلىمي-زەرتتەۋ ينستيتۋتى مەن وزگە دە سالالىق ۇيىمداردىڭ وزىق تاجىريبەلەرىن ەنگىزىپ جاتقانىن باياندادى. ودان بولەك, اۋىلدىق جاستاردى «Zhasproject» ستارتاپ-جوبالاردى قولداۋ باعدارلاماسىنا قاتىسىپ, ءوز ءىسىن باستاۋعا گرانت جانە جوبانى جۇزەگە اسىرۋ كەزىندە قارجىلىق قولداۋ الۋعا تارتۋ بويىنشا جۇمىس جۇرگىزىلىپ جاتىر. جاڭادان كاسىبىن باستاعان بيزنەسمەندەر ءۇشىن تاجىريبە الماسىپ, ءوز ءىسىن اشۋدىڭ الگوريتمىن ۇيرەتۋ ماقساتىندا «اگروەكسپرەسس» سەمينارى ۇيىمداستىرىلدى.
شيەلى اۋدانىندا اعىمداعى جىلدىڭ 1 مامىرىنا 4 658 شاعىن جانە ورتا بيزنەس سۋبەكتىلەرى تىركەلدى, ونىڭ ىشىندە بەلسەندى سۋبەكتىلەرىنىڭ سانى 3456. وتكەن جىلدىڭ ءتيىستى مەرزىمىمەن سالىستىرعاندا جۇمىس ىستەپ جاتقان شاعىن جانە ورتا بيزنەس سۋبەكتىلەرىنىڭ سانى 12,8 پايىزعا ارتتى. جىل باسىنان بەرى كونكۋرستىق كوميسسيا تاراپىنان جالپى قۇنى 15,3 ملن. تەڭگە 24 ستارتاپ-جوبا ماقۇلدانىپ, «وڭىرلىك ينۆەستيتسيالىق ورتالىعى» ۇيىمى ارقىلى جالپى قۇنى 117,1 ملن. تەڭگە 31 جوبا قارجىلاندىرىلدى.
جيىن قورىتىندىسىمەن وبلىس اكىمى اۋدانداردا شاعىن جانە ورتا بيزنەستى دامىتۋ بويىنشا جۇمىستى كۇشەيتىپ, قولدانىستاعى بارلىق قولداۋ تەتىكتەرىن ءتيىمدى پايدالانۋدى تاپسىردى.
سونداي-اق, شيەلى اۋدانىنىڭ تارتوعاي اۋىلىندا 90 ورىندىق «قۇلاگەر» بالاباقشاسى اشىلدى. بۇرىن بالاباقشا اۋىلدىق مەكتەپتىڭ ەسكى عيماراتىندا ورنالاسقان بولاتىن.
ەستەرىڭىزگە سالا كەتەيىك, قىزىلوردا وبلىسىندا 2018 جىل جاپپاي كاسىپكەرلىكتى قولداۋ جىلى دەپ جاريالانعان بولاتىن.
قىزىلوردا وبلىسىندا 40 مىڭعا جۋىق ناقتى جۇمىس ىستەيتىن شاعىن جانە ورتا بيزنەس سۋبەكتىلەرى تىركەلگەن, بۇل كورسەتكىش 2017 جىلدىڭ ءتيىستى كەزەڭىمەن سالىستىرعاندا 10,8 پايىزعا ارتتى.
شاعىن جانە ورتا بيزنەس كاسىپورىندارىندا جۇمىسپەن قامتىلعانداردىڭ سانى 2018 ج. 1 قاڭتارىنا 84250 ادام, ال شىعارىلعان ءونىم كولەمى 2017 جىلدىڭ قورىتىندىسىمەن 302,186 ملرد. تەڭگەنى قۇرادى. 2018 ج. قاڭتار-ءساۋىر ايلارىندا ايماقتا 2476 جەكە كاسىپكەر, 78 شارۋا قوجالىعى جانە 240 جشس قۇرىلدى.
سونداي-اق, وڭىردە «باستاۋ-بيزنەس» باعدارلاماسى اياسىندا 1600 ادامدى وقىتۋ جوسپارلانعان. قازىرگى تاڭدا قاتىسۋشىلاردىڭ العاشقى لەگى وقۋدى ءبىتىرىپ, بيزنەس-جوبالارىن وبلىستق كوميسسيا وتىرىسىندا قورعادى. 291 ادام وقۋ كۋرستارىن ءبىتىرىپ, 127-ءسى جوباسىن قورعاپ شىقتى. تاعى دا 800 جۋىق كاسىپكەر «بيزنەس-كەڭەسشى» جوباسى اياسىندا وقىتىلاتىن بولادى, بۇگىنگى كۇنى وبلىس بويىنشا 1171 ادام وقۋ ءبىتىردى.
