وبلىستىق مۋزىكالىق دراما تەاترىندا مەديتسينا قىزمەتكەرلەرىنىڭ كۇنىنە ارنالعان سالتاناتتى شارا وتكىزىلدى. قىزىلوردا وبلىسىنىڭ اكىمى قىرىمبەك كوشەرباەۆ دارىگەرلەردى كاسىبي مەرەكەلەرىمەن قۇتتىقتاپ, ايماقتا مەديتسينا سالاسىن دامىتۋ بويىنشا وتكىزىلىپ جاتقان جۇمىستار تۋرالى بايانداپ بەردى. اتاپ ايتقاندا, سوڭعى 3 جىلدان بەرى قاجەتتى مەديتسينالىق ماماندىقتار بويىنشا رەزيدەنتۋراعا گرانتتار ءبولىنىپ جاتىر, اعىمداعى جىلى دا 25 گرانت ءبولىندى.
«بيىلدان باستاپ ورتا مەكتەپتەر مەن مەديتسينا كوللەدجدەرىنىڭ ۇزدىك بىتىرۋشىلەرىنە وبلىس اكىمىنىڭ ارنايى گرانتى تاعايىندالىپ وتىر. گرانت ارقىلى ولارعا وقۋ بىتىرگەنشە قولداۋ كورسەتىلەتىن بولادى. وبلىس بويىنشا جەرگىلىكتى بيۋدجەت قاراجاتى ەسەبىنەن قاجەتتى ماماندىقتارعا قايتا دايارلاۋعا 2017 جىلى 68 ملن تەڭگە بولىنسە, 2018 جىلى 2 ەسەگە ۇلعايىپ, 130 ملن تەڭگە قاراستىرىلدى. ايتا كەتۋ كەرەك, بيىل ماماندارىمىز كورەيا مەملەكەتىندە جانە رەسەي, تاتارستان رەسپۋبليكاسىنىڭ قازان قالاسىندا ءبىلىمىن جەتىلدىرۋگە, قىتاي, اۆستريا, رەسەي ماماندارىمەن تاجىريبە الماسىپ, وزىق تەحنولوگيالاردى ەنگىزۋگە مۇمكىندىك الىپ وتىر», - دەدى ايماق باسشىسى.
جىل قورىتىندىسى بويىنشا ۇزدىك قىزمەتكەر اتانعان دارىگەرلەرگە 500 مىڭ تەڭگەگە سەرتيفيكاتتار تابىستالدى.
ءىس-شارا مەرەكەلىك كونتسەرتتىك باعدارلامامەن اياقتالدى.
ەستەرىڭىزگە سالا كەتەيىك, «تسيفرلى قازاقستان» مەملەكەتتىك باعدارلاماسىنا سايكەس سالا مەديتسينالىق اقپاراتتىق جۇيەمەن 100 پايىز قامتىلسا, تسيفرلىق تەحنولوگيالاردى ەنگىزۋگە, كومپيۋتەرلەندىرۋگە جەرگىلىكتى بيۋدجەتتەن اعىمداعى جىلعا 365 ملن تەڭگە قارجى ءبولىندى. ودان بولەك, دەنساۋلىق ساقتاۋ سالاسىندا مەملەكەتتىك-جەكەمەنشىك ارىپتەستىك تە قارقىندى دامۋدا. 2017 جىلى 4 جوبا ىسكە اسىرىلسا, 2018 جىلعا جالپى قۇنى 14,0 ملرد. تەڭگەنى قۇرايتىن 28 جوبانى ىسكە اسىرۋ جوسپارلانۋدا.
دەنساۋلىق ساقتاۋ سالاسىنىڭ ينفراقۇرىلىمىن جەتىلدىرۋ ماقساتىندا سوڭعى 5 جىل ىشىندە جالپى قۇنى 27,4 ملرد. تەڭگەگە 58 نىسان پايدالانۋعا بەرىلدى, ونىڭ ىشىندە 49-ى اپاتتىق جاعدايداعى نىساندار ورنىنا سالىندى.
اتقارىلعان شارالار جالپى ءولىم-ءجىتىمدى 4 پايىزعا, ونىڭ ىشىندە نارەستەلەر ءولىمىن 41,2 پايىزعا, قاتەرلى ىسىكتەن - 22,8 پايىزعا, تۋبەركۋلەزدەن - 2 ەسەگە ازايتۋعا مۇمكىندىك بەردى. ناتيجەسىندە, وبلىس حالقىنىڭ كۇتىلەتىن ءومىر ءسۇرۋ ۇزاقتىعى سوڭعى بەس جىلدا 2 جىل 6 ايعا ارتىپ, 72,2 جاستى قۇرادى.
اتاپ وتەيىك, ەندىگى كەزەكتە قازالى اۋداندىق اۋرۋحانا بازاسىندا ارال, قازالى, قارماقشى اۋداندارى مەن بايقوڭىر تۇرعىندارىنا كارديولوگيالىق ورتالىق اشۋ, ارال جانە شيەلى اۋداندارىندا 150 ورىندىق ورتالىق اۋرۋحانالاردىڭ جۇمىسىن اياقتاۋ, قازالى اۋدانىنداعى ايتەكە بي كەنتىندە 250 كەلۋشىگە, قىزىلوردا قالاسىنداعى تاسبوگەت كەنتىندە مەملەكەتتىك جەكەشەلىك ارىپتەستىك نەگىزىندە رەابيليتاتسيالىق ورتالىعى بار 250 كەلۋشىگە ارنالعان ەمحانا, سول جاعالاۋدا كوپبەيىندى 300 توسەك-ورىندىق اۋرۋحانا قۇرىلىسىن باستاۋ تۇر.
