بار ءۇمىت – بياتلونشىلار باسەكەسىندە

كەشە ۆانكۋۆەردە قار جاۋىپ, قاتتى جابىعىپ جۇرگەن جارىس قوجايىندارىنىڭ كوڭىل-كۇيى ءبىر كوتەرىلىپ قالدى. راسىندا دا قىسقى وليمپيا ويىندارىن قالىڭ قار مەن قاقاعان ايازسىز كوزگە ەلەستەتۋ قيىن ەكەن. ءبىزدى قويشى, بارىنەن دە جارىستى ۇيىمداستىرۋشىلار مەن سپورتشى­لارعا اۋىر. العاشقىلارى كانادانىڭ باسقا اۋماعىنان قار تاسىپ الەكتەنسە, سوڭعىلارى وزدەرىنىڭ شىنايى شەبەر­لىكتەرىن پاش ەتە الماي دىڭكەلەۋدە. ال كەشە اسپاننان اق ۇلپا ءتۇسىپ, كوپشىلىك كادىمگىدەي سەرپىلىپ قالدى. سوڭعى ەكى كۇننىڭ ىشىندە 12 مەدالدار جيىنتىعى ساراپقا سالىندى. بۇل رەتتە بارلىق سپورت تۇرلەرى بويىنشا باسەكەلەستىك بەلەڭ الىپ, ۆانكۋۆەر كەشەن­دەرىندە “ناعىز جان الىسىپ, جان بەرىسكەن” ايقاستار ءوتتى. بۇعان دەيىن ءالىپتىڭ ارتىن باعىپ كەلگەن گەرمانيا قۇراماسىنىڭ سوڭعى تاۋلىكتەردەگى قارقىنى كۇشتى بولدى. كەشە نەمىستەر بياتلون مەن شانا سپورتى بويىنشا باس جۇلدە ولجالادى. بۇل سايىستاردا ماگ­دالەنا نوينەر مەن تاتيانا حيۋف­نەر توپ جاردى. مىنە, وسىن­داي تاباندىلىق پەن جانكەش­تىلىكتىڭ ارقاسىندا گەرمانيا كوماندالىق ەسەپتە ەكىنشى ورىنعا شىقتى. ولاردىڭ ەنشىسىندە 3 التىن, 4 كۇمىس جانە 2 قولا مەدال. وڭتۇستىك كورەيا جانە شۆەي­تساريا كوش باسىن­داعى كومان­دالارمەن يىق تىرەسۋدە. ۆانكۋۆەردە اتالمىش مەملەكەت­تەردىڭ ءانۇراندارى ءۇش رەتتەن شىر­قالدى. الايدا باستى قار­سىلاستارىنان ولار كۇمىس پەن قولا مەدالدى الدەقايدا كەم جيدى. كانادا, فرانتسيا جانە شۆەتسيا سپورتشىلارى ەكى مارتە جەڭىس تۇعى­رىنىڭ ەڭ بيىك ساتىسىنا كو­تەرىل­دى. سونداي-اق, نورۆەگيا, قى­تاي, رەسەي, سلوۆاكيا, چەحيا جانە گوللانديا كوماندالارىنىڭ قور­جى­نىندا ءبىر التىننان بار. اۆستريا, پولشا, يتاليا, جاپو­نيا, اۆستراليا, جاپونيا, ەستو­نيا, سلوۆەنيا جانە حورۆاتيا قۇرا­مالارى دا جۇلدەلى ورىنداردى يەلەندى. وليمپيا ويىندارىندا مە­دال­عا قول جەتكىزۋ زور ناتيجە ەكەنى ەش داۋ تۋعىزبايدى. الايدا بۇكىل الەم جۇرتشىلىعى مىقتى­لىعىن تۇبەگەيلى مويىنداعان كەيبىر مەملەكەتتەردىڭ قارقىنى تىم باياۋ ەكەنىن ايتپاي كەتۋگە بولمايدى. ماسەلەن, قورجىنىندا كونكيشى يۆان سكوبورەۆ جەڭىپ العان جالعىز قولاسى بار رەسەي بەس كۇن بويى 19-ورىندى قاناعات تۇتىپ كەلدى. ال كەشە شاڭعىدان جەكە سپرينت باسەكەسىندە نيكيتا كريۋكوۆ پەن الەكساندر پانجين­سكي كومبەگە بىردەي جەتتى. بىرىنە – التىن, ەكىنشىسىنە – كۇمىس مەدال بۇيىردى. سونىڭ ارقا­سىندا ورىستاردىڭ ەڭسەسى كوتەرى­لىپ, بۇگىندەرى العاشقى وندىققا ەندى. سونداي-اق, تاماشا جەڭىستى ءداستۇرى بار نورۆەگيا قۇراماسى­نىڭ كورسەتكىشى كوڭىل كونشىتەرلىك ەمەس. ولار 1 التىن, 2 كۇمىس جانە 2 قولا جۇلدەنى يەلەنىپ, جالپى ەسەپتە سەگىزىنشى ورىندا تۇر. ال سكانديناۆيا تۇبەگىنىڭ تارلان­بوزدارى كەي وليمپيادالاردا دارا شىقسا, كەيبىرىندە ۇزدىكتەر قا­تارى­­نا ەركىن قوسىلىپ جۇرگەنىن ەستەن شىعارماعان ءجون. سول سەبەپ­تى رەسەي مەن نورۆەگيانىڭ بۇگىنگى مۇشكىل جاعدايى كوپشىلىكتىڭ تاڭدانىسىن تۋدىرۋدا. بىراق الدىن الا تون پىشپەي-اق قويايىق. ويتكەنى, جارىستىڭ قىزىعى مەن شىجىعى ءالى الدا. وليمپيادانىڭ الاۋى تەك 28 اقپاندا سونەدى. وعان دەيىن جارىس كەستەسىندە كوپتەگەن وزگەرىستەردىڭ بولاتىنى ءسوزسىز. بالكىم, ءالىپتىڭ ارتىن باققان مەملەكەتتەردىڭ ورەندەرى الداعى كۇن­دەرى سۋىرىلىپ شىعىپ, شەبەر­لىكتىڭ شىنايى ۇلگىسىن كورسەتەر. قازاقستان قۇراماسى مۇشەلەرى اراسىنان كەشە الەكسەي پول­­­­تورانين ءوزىن جاقسى قىرىنان كورسەتە ءبىلدى. قىسقا قاشىقتىققا جارىسقان شاڭعىشىلار باسە­كەسىندە شىعىس قازاقستان وبلى­سىنىڭ وكىلى جۇلدەگە سىنىق سۇيەم قالعاندا ءسۇرىنىپ, بەسىنشى ورىن الدى. دەگەنمەن دە جەرلەسىمىزدىڭ ونەرى مايتالمان ماماندار مەن بىلىكتى باپكەرلەر تاراپىنان جوعارى باعاعا يە بولدى. ءدال سول سايىستا نيكولاي چەباتكو 13- ورىندى يەلەندى. بياتلوننان ىلەسىپ جارىسۋدا ەلەنا حرۋستالەۆانىڭ دا جۇلدەلى ورىن ءۇشىن تالاسۋعا مۇمكىندىگى بولدى. 13 اقپاندا وتكەن سپرينت­تەگى ناتيجەلەر ەسەپكە الىنىپ, ول وليمپيادا چەمپيونى سلوۆا­كيالىق اناستاسيا كۋزمينادان 25 سەكوندتتەن كەيىن بەسىنشى بولىپ جارىس جولىنا شىقتى. الايدا نىسانانى كوزدەۋ بارىسىندا ءمۇلت كەتكەن ول جاعدايىن كۇرت ناشار­لاتىپ الدى. ناتيجەسىندە 11-ورىندى قاناعات تۇتتى. كونكيشىلەردىڭ 500 مەترلىك سايىسىندا ەل نامىسىن مارينا ايتوۆا قورعادى. ءوز قۇربىلارى اراسىندا دارا تالانتىمەن وقشاۋلانىپ جۇرگەن 18 جاسار ارۋ ايگىلى قارسىلاستارىمەن تەرەزەسى تەڭ ونەر كورسەتە المادى. بۇل جارىستى ول 18-ورىنمەن قورى­تىن­دىلاندى. جارىستىڭ بەسىنشى جانە التىنشى كۇندەرى باق سىناعان شاڭعىشىلار – سەرگەي چەرە­پانوۆ, ەۆگەني كوششەۆوي , وكسانا ياتسكايا, ەلەنا كولومينا, ەلەنا انتونوۆا, مارينا ماتروسوۆا, بياتلونشىلار – اننا لەبەدەۆا, يان ساۆيتسكي, الەكساندر چەرۆيا­كوۆ سىندى وتانداستارىمىز قالىڭ توپتىڭ اراسىندا قالىپ قويدى. مانەرلەپ سىرعاناۋدان ىرىكتەۋ باسەكەلەرى ءوتىپ, ءدۇيىم جۇرت دەنيس تەننىڭ شەبەرلىگىنە قۇلشىنا قول سوقتى. 17 جاسار ورەنىمىز مۇيىزدەرى قاراعايداي قارسىلاستارىمەن تەڭ دارەجەدە ايقاسىپ, اقتىق سىنعا جولداما الدى. بۇگىن ول فينالدا ونەر كورسەتەدى. وكىنىشكە وراي, تاعى ءبىر سىرعاناۋشىمىز ابزال راقىمعاليەۆتىڭ ۆانكۋۆەر مۇز ايدىنىندا جولى بولمادى. بۇگىن بياتلوننان ەرلەر 15 شاقىرىمدىق, ايەلدەر 10 شاقى­رىم­دىق جەكەلەگەن سايىستا كۇش سىناسادى. بۇل رەتتە قازاق­ستاننىڭ نامىسىن الەكساندر چەرۆياكوۆ, دياس كەنەشەۆ, الەك­ساندر تري­فونوۆ, نيكولاي براي­چەنكو, ەلەنا حرۋستالەۆا, ليۋبوۆ فيليمونوۆا جانە اننا مەن مارينا لەبەدەۆا قورعايدى. كونكيشى ەكاتەرينا ايدوۆا 1000 مەترگە جۇگىرەدى. ەرتەڭ جەرلەس­تەرىمىز تۇعىردان سەكىرۋ, تاۋ شاڭعىسى جانە شاڭعى (پۋرسيت) سپورتى بويىنشا شەبەرلىك بايقاسادى. كەشە 1000 مەترگە جۇگىرگەن كونكيشىلەر جارىسى ءوز مارەسىنە جەتتى. بۇل رەتتە شاني دەۆيس شاشاسىنا شاڭ جۇقتىرمادى. اقش سپورتشىسىنىڭ كورسەتكىشى – 1.08,92. ودان ءسال عانا قالىپ قويعان كورەيالىق مو تاە بۋم مەن امەريكالىق چاد حەدريك جۇلدەگەر اتاندى. قازاقستاندىق رومان كرەچ 28-ورىندا. وسى جەڭىستەن كەيىن اقش قۇراماسى كوماندالىق ەسەپتە كوش باستادى. ولاردىڭ ەنشىسىندە 5 التىن, 3 كۇمىس جانە 4 قولا بار. عالىم سۇلەيمەن, ارنايى “ەگەمەن قازاقستان” ءۇشىن – ۆانكۋۆەردەن. سپورتشىلارعا دەگەن ۇلكەن ءۇمىت جەر ءجانناتى جەتىسۋ جەرىندەگى قول جەتكەن تابىستار قاتارىندا وتكەن جىلى وڭتۇستىك كورەياداعى الەم چەمپيوناتىندا ەلىمىزدىڭ ابىرويىن اسقاقتاتقان زىلتەمىرشىلەر ۆلاديمير سەدوۆ, سۆەتلانا پودوبەدوۆا, مايا مانەزا مەن ءزۇلفيا چينشانلو ءتارىزدى سپورتشىلاردىڭ ەڭبەكتەرى دە بار. ارينە, ول ۇلكەن قۇرمەتكە لايىق. بۇل ءبىر جاعىنان ولاردىڭ ەرەن ەڭبەگى مەن بابىنا بايلانىستى دەسەك, ەكىنشى جاعىنان كورسەتىلگەن جان-جاقتى قامقورلىقتىڭ ناتيجەسى ەكەنى داۋسىز. وبلىس اكىمى سەرىك ۇمبەتوۆ وڭىردەگى دەنە شى­نىقتىرۋ مەن تۋريزم باسقارماسىنىڭ باسشىلا­رىن, جەتىسۋلىق سپورتشىلاردى جانە سالانى ناسيحاتتاپ, قالىڭ بۇقاراعا جارىسا جازىپ جەتكىزگەن بۇقارالىق اقپارات قۇرالدارىنىڭ جۋرناليستەرىن دە بىرگە قابىلدادى. باسشى وتكەن جىلعى جەتىستىكتەرگە جۇرتشىلىق نازارىن اۋ­دا­رىپ, الداعى مىندەتتەردى دە ەلەپ-ەكشەدى. سالانى دامىتۋدىڭ, كاسىبي سپورتشىلاردى جاتتىق­تى­رۋدىڭ جاۋاپكەرشىلىگى جايلى دا اڭگىمە قوزعادى. جالپى, مەملەكەت باسشىسىنىڭ سالاماتتى ءومىر سالتىن ۇستانۋى, سپورتتىڭ ءتۇر-تۇرىمەن اي­نا­لىسۋى بۇگىندە جاس ۇرپاقتىڭ جادىندا جات­تالۋى جانە وسى ءۇردىستى جالعاستىرۋى قاجەتتىگىنە دە ەكپىن بەردى. وڭىردەگى نامىستى قولدان بەرمەي جۇرگەن ساڭلاقتاردىڭ ەسىمىن ەرەكشە اتاپ, ءار كەزدە دە ەگەمەن ەلىمىزدىڭ مارتەبەسىن اسقاقتاتۋ جولىنداعى ەڭبەكتەرىن ەسەلەۋ قاجەتتىگىن ءسوز ەتتى. قول جەتكەن جەتىستىكتى ودان ءارى جالعاستىرۋ باعىتىندا وبلىستىق دەنە شىنىقتىرۋ جانە تۋريزم باسقارماسىنا جاۋاپكەرشىلىك جۇكتەپ, جاتتىقتىرۋشىلاردىڭ مىندەتتەرىن دە باسا ايتتى. وسىلايشا سالتاناتتى جاعدايدا وبلىس اكىمىنىڭ ارنايى ديپلومىمەن 100-150 مىڭ كولەمىندەگى اقشالاي سىيلىعىن تاپسىردى. مۇنداي قۇرمەتتى جاتتىقتىرۋشىلار, ۇزدىك سپورتشىلار يەلەندى. گىر تاسىن كوتەرۋدەن الەم مەن ەۋروپانىڭ بىرنەشە دۇركىن چەمپيونى, 73 جاستاعى ءامىرباي رىسقۇلوۆ وبلىس اكىمىنىڭ سپورتشىلارعا دەگەن قامقورلىعىن ءاردايىم سەزىنىپ جۇرگەندىگىن, ءالى دە باسەكەدە باق سىنايتىنىن ايتتى. مۇنداي ماراپاتتان اتالعان سالانى ۇزبەي ناسيحاتتاعان قالامگەرلەر دە قالىس قالمادى. كۇمىسجان بايجان,الماتى وبلىسى.