تاياۋدا بەيجىڭ قالاسىندا قازاقستاننىڭ اۋىل شارۋاشىلىعى مينيسترلىگى مەن قىتاي حالىق رەسپۋبليكاسىنىڭ باس كەدەن باسقارماسى اراسىندا ەلىمىزدەن ەكسپورتتالاتىن سيىر ەتىنە ارنالعان ينسپەكتسيا, كارانتيندىك جانە ۆەتەرينارلىق-سانيتارلىق تالاپتار تۋرالى حاتتاماعا قول قويىلدى. مەملەكەت باسشىسى ن.نازارباەۆتىڭ كورشى ەلگە جاساعان ساپارى اياسىندا راسىمدەلگەن قۇجات وسى ەكسپورتتىق الەۋەتتى ارتتىرۋ ءۇشىن جاسالىپ وتىرعان ماڭىزدى قادام بولىپ وتىر. بۇل حاتتاما مۇزداتىلعان, سۇيەكسىز سيىر ەتىن قىتايعا ەكسپورتتاۋعا مۇمكىندىك بەرەدى. ەندىگى كەزەكتە كورشى ەلدىڭ نارىعىنا قازاقستاندىق سالقىنداتىلعان سيىر ەتى مەن ءتىرى مالدى ەكسپورتتاۋعا كەلىسسوزدەر جۇرگىزىلمەك.
جالپى, ەلىمىزدە ەتتى مال شارۋاشىلىعىن دامىتۋدىڭ جاڭا باعدارلاماسىندا كورسەتىلگەن باسىمدىقتار مەن تەتىكتەر ەكسپورتتىق الەۋەتتى كۇشەيتۋ, ەڭبەك ونىمدىلىگى مەن وڭدەلگەن اۋىل شارۋاشىلىعى ونىمدەرىنىڭ كولەمىن كەمىندە 2,5 ەسە ۇلعايتۋعا باعىتتالعانىن ايتا كەتەيىك. سول سەبەپتى مينيسترلىك جاڭا نارىقتاردى اشۋعا تىرىسۋدا.
ەت جانە ەت ونىمدەرىن ەكسپورتتاۋدىڭ حالىقارالىق تالاپتارى, بەكىتىلگەن ساپا ستاندارتتارى بار. سول ءۇشىن بۇعان دەيىن شىعىس قازاقستان, الماتى, جامبىل, قىزىلوردا جانە وڭتۇستىك قازاقستان وبلىستارى ۆاكتسيناتسيالاۋ ارقىلى اۋسىلدان بوساتىلعان تازا ايماق مارتەبەسىن الدى. وسىنىڭ ارقاسىندا ۆەتەرينارلىق سەرتيفيكاتتار بويىنشا قىتايعا مال ونىمدەرىن جانە ءتىرى جانۋارلاردى جەتكىزۋ مۇمكىندىگى تۋدى.
جۇيەلى جۇرگىزىلگەن جۇمىستاردىڭ ناتيجەسىندە كورشى ەلدىڭ نارىعىنا ءونىم شىعارۋ جۇمىستارى جىل ساناپ قارقىن الىپ كەلە جاتىر دەۋگە بولادى. مەملەكەتتىك كىرىستەر كوميتەتىنىڭ دەرەكتەرىنە سۇيەنسەك, وتكەن جىلى قازاقستان مەن قىتاي اراسىندا اۋىلشارۋاشىلىق ونىمدەرىنىڭ تاۋار اينالىمى 345,0 ملن اقش دوللارىن قۇراپ, 2016 جىلمەن سالىستىرعاندا 32%-عا ارتقانى وسىنى كورسەتەدى. باسقا دا دەرەكتەردى تىلگە تيەك ەتەر بولساق, وتكەن جىلى قىتايعا 306,9 مىڭ توننا نەمەسە قۇنى 57,5 ملن اقش دوللارىنا تەك بيداي ەكسپورتتالىپتى. الدىڭعى جىلمەن سالىستىرعاندا مۇزداتىلعان بالىق ەكسپورتىنىڭ كولەمى 2,2 ەسەگە (1301 توننادان 2883 تونناعا), كۇنباعىس تۇقىمدارى 1,7 ەسەگە (73,8 مىڭ توننادان 123,7 مىڭ تونناعا) ۇلعايعان.
ارنۇر اسقار,
«ەگەمەن قازاقستان»
