مادەنيەت جانە سپورت مينيسترلىگى ۇيىمداستىرعان حالىقارالىق فەستيۆال وتاندىق جانە شەتەلدىك تانىمال سۋرەتشىلەردى قۇشاق جايا قارسى الدى. ولاردىڭ قاتارىندا ۇلىبريتانيانىڭ كورولدىك ونەر قاۋىمىنىڭ مۇشەسى الەكساندرا كوننور, جاپونيانىڭ اكۆارەلمەن بەينەلەۋ ونەرىنىڭ حاس شەبەرى اكيرا مۋراتا, برازيلياداعى پانامەريكا ونەر ورداسىنىڭ تالىمگەرى جيزەل ۋليسس, ءۇندىستاننىڭ زاماناۋي كوركەمونەر شەبەرى رام ۆيرانيان, اقش ۇلتتىق ونەر گرانتىنىڭ يەگەرى ارتەم ميرولەۆيچ, گوللاندينىڭ رەترو كوركەمونەر شەبەرى ديميتريس ۆويازوگلوۋ بار. سونىمەن قاتار, تىلەۋجان باتانوۆ, اينابەك وسپانوۆ, گۇلميرا تەلعوزيەۆا, باقتىگەرەي تەلەۋباي, امانگەلدى كەنەنباەۆ, نۇربازار قوجين, قايىر ورازعاليەۆ سىندى وتاندىق قىلقالام شەبەرلەرى دە كوز تارتار جۇمىستارىن ەلوردا تۇرعىندارى مەن قوناقتارىنىڭ نازارىنا ۇسىندى.
كوپتەن كۇتكەن كورمەنىڭ اشىلۋ سالتاناتىندا مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ فەستيۆالدىڭ اشىلۋىمەن جينالعان كوپشىلىكتى قۇتتىقتاپ, جىلى لەبىزىن ءبىلدىردى. «مادەني ىنتىماقتاستىقتى حالىقارالىق دەڭگەيدە قارىشتاۋدى كوزدەگەن «نۇر كەلبەتتى استانا» فەستيۆالىنىڭ اشىلۋىمەن بارشاڭىزدى قۇتتىقتايمىن. ءبىزدىڭ ۇلتتىق برەندىمىزگە اينالعان استانانىڭ 20 جىلدىعى قارساڭىندا وتكىزىلىپ وتىرعان بۇل شارا جەمىسىن بەرەدى دەپ ويلايمىن. سەبەبى, فەستيۆال استانانى الەمگە تانىتۋمەن قاتار, شەت ەلدەرمەن ىنتىماقتاستىق قارىم-قاتىناستى نىعايتا ءتۇسىپ, ايگىلى سۋرەتشىلەردىڭ قولتاڭباسىن قازاقستان تاريحىنا ەنگىزىپ, كەلەشەكتە مادەني بايلىعىمىزدىڭ ماڭىزىن ارتتىرۋعا سەپتىگىن تيگىزەدى», دەدى ق. ۋاليەۆ.
شەتەلدىك قوناقتاردى ەلوردانىڭ 20 جىلدىق تاريحى مەن شەجىرەسىمەن, مادەني جانە رۋحاني وشاقتارىمەن, قوناقجاي حالقىمەن تانىستىرۋعا باعىتتالعان سالتاناتتى مەرەكە اياسىندا سۋرەتشىلەر قالا تىنىسىمەن تانىسا وتىرىپ, شابىتىن قىلقالام ارقىلى قاعاز بەتىنە ءتۇسىردى. «بۇل ءىس-شاراعا الەمنىڭ 250 سۋرەتشىسى قاتىسۋعا نيەتتەرىن ءبىلدىرىپ, جۇمىستارىن ۇسىنعان بولاتىن. بارلىق جۇمىستار ىرىكتەلىپ, سونىڭ ىشىنەن تەك 20 سۋرەتشى ايقىندالىپ, بۇگىنگى كورمە زالىنا تۋىندىلارىن حالىق نازارىنا ۇسىندى. حالىقارالىق دەڭگەيدە وتكىزىلىپ وتىرعان شارا اياسىندا شەتەلدىك سۋرەتشىلەر قازاق ۇلتتىق ۋنيۆەرسيتەتىندە وقىتۋشىلار مەن ستۋدەنتتەرگە ارناپ شەبەرلىك ساباقتارىن وتكىزەدى» - دەپ, ءتۇسىندىردى جوبا اۆتورى ءسابيت ابدىحالىقوۆ.
استانانىڭ اسقاق بەينەسىن اسقان شەبەرلىكپەن سالعان 20 قاتىسۋشىعا ارنايى سەرتيفيكاتتار تابىس ەتىلىپ, ءسوز كەزەگى شەتەلدىك سۋرەتشىلەرگە بەرىلدى. فەستيۆال ماۋسىم ايىنىڭ سوڭىنا دەيىن جالعاسادى, ال كوز تارتار عالامات تۋىندىلار ۇلتتىق مۋزەي قورىنا تابىس ەتىلمەك.
الەكساندرا كوننور, سۋرەتشى, ۇلىبريتانيا كورولدىگى:
بۇل مەنىڭ استاناعا العاش كەلۋىم. قالا كەلبەتىنە قاراپ تۇرىپ نەبارى جيىرما جىلدىق قانا تاريحى بار ەكەنىنە سەنبەدىم. قازاق حالقى وتە قوناقجاي ەكەنىن بۇرىندارى ەستىگەن بولاتىنمىن. بىراق بۇل قوناقجايلىلىقتى ءوز كوزىممەن كورۋ جانە سەزىنۋ بولەك نارسە. كەلەشەكتە وسىنداي جوبالار قازاقستاندا وتكىزىلسە قۋانا قاتىسامىن.
دجوۆانني توماسسي فەرروني, سۋرەتشى, يتاليا:
مەن ءۇشىن «نۇر كەلبەتتى استانا» شىعارماشىلىق تاجىريبە الماسۋ مەن جاڭا كوزقاراستارمەن قوسا, جاڭا ارىپتەس, جاڭا دوستار تابۋ مۇمكىندىگىن سىيلادى. يتاليا ارحيتەكتۋراسىنىڭ تاريحى وتە باي, سوندىقتان دا عيماراتتاردىڭ كوبى جىلدار اعىمىنا ساي كونە بولىپ كەلەدى. ال استانا جاس قالا بولعاندىقتان, زاماناۋي ەسكەرتكىشتەر مەن ارحيتەكتۋرانىڭ جاڭا تۇرلەرىنە تولى عيماراتتار بار بولعاندىعى مەنى قۋانتادى. قالا وتە ادەمى ءارى تارتىمدى. وسىنداي تاماشا مۇمكىندىك سىيلاعاندارىڭىز ءۇشىن راحمەت!
بوتاكوز امالبەك,
ل.ن. گۋميلەۆ اتىنداعى ەۇۋ-ءنىڭ 1 كۋرس ستۋدەنتى
