ءىس-شارانىڭ نەگىزگى ماقساتى – ەلورداعا قۇرمەت پەن ماقتانىش سەزىمىن قالىپتاستىرۋ, ومىردە بەلگىلى تابىستارعا قول جەتكىزگەن جاس استانالىقتاردىڭ بەينەلەرى ارقىلى بەلسەندى ومىرلىك ۇستانىم مەن كوشباسشىلىق قاسيەتتەردى ناسيحاتتاۋ.
كەزدەسۋ قوڭاقتارى – استانانىڭ قۇرداستارى, 1998 جىلى تۋعان جاستار, ناعىز ەلوردالىقتار. ولاردىڭ ارقايسىسى وزدەرىنىڭ ءبىلىم الىپ جاتقان وقۋ ورىندارى, سونىمەن قاتار وزدەرىنىڭ تابىستارى مەن جەڭىستەرى تۋرالى باياندادى. ولاردىڭ ىشىندە گ. ءابدىراحمانوۆا, ا.ابدىعاليەۆ, ءا.ايماق, ا.بەيسوۆا, ا.بويكو, يا.كالينوۆسكي, ا.قاسەن, ە.سەيتجاعىپار ءسوز سويلەدى. ءوز ماماندىعىن ءسۇيىپ وقيتىن ەلوردانىڭ جاستارى ەلىمىزدىڭ دامۋىنا ءوز ۇلەستەرىن قوسقىسى كەلەدى.
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى ايكەرىم قاسەن فيلولوگيا ماماندىعى بويىنشا وقيدى. بولاشاقتا ول ءبىلىمىن ءارى قاراي جەتىلدىرىپ, ءوز ماماندىعى بويىنشا شەتەلدە تەرەڭىرەك وقۋدى ماقسات تۇتىپ وتىر. «وزگە ءتىلدىڭ ءبارىن بىلسەڭ دە, دامۋ, تىنىمسىز ەڭبەكتەنۋ ارقىلى باسەكەلەستىككە قابىلەتتىلىكتىڭ ارقاسىندا عانا ءوز ۇلتىڭدى, ءتىلىڭدى, ءدىنىڭدى, ءداستۇرىڭدى ساقتاپ قالا الاسىڭ», دەيدى ايكەرىم.
استانا گۋمانيتارلىق كوللەدجىنىڭ 2-كۋرس ستۋدەنتى ەلبارىس سەيتجاعىپار مۋزىكاعا بالا كۇنىنەن جاقىن بولعان. «ەلورداداعى №4 جامبىل جاباەۆ اتىنداعى مەكتەپ-گيمنازياسىندا وقي ءجۇرىپ, ساباقپەن قاتار ءتۇرلى مادەني شارالارعا بەلسەنە ارالاستىم. تالابىم مەن تالانتىمدى تانىعان اتا-انام مەنىڭ ونەر سالاسىنا باۋلىدى. سەبەبى انام دا, اكەم دە ونەرلى جاندار. وسىنداي ونەرلى وتباسىندا دۇنيەگە كەلگەن مەن استانا گۋمانيتارلىق كوللەدجىنىڭ مۋزىكالىق ءبىلىم بەرۋ ماماندىعىنا وقۋعا ءتۇستىم», دەيدى ەلبارىس.
يان كالينوۆسكي بالا كۇنىنەن سپورتقا جاقىن بولىپ وسكەن. «مەنىڭ سۇيىكتى سپورتىم – حوككەي. حوككەيمەن ءتورت جاسىمنان باستاپ اينالىسىپ كەلەمىن. مەن سپورتتاعى جەتىستىككە اتا-انامنىڭ ارقاسىندا جەتتىم دەپ بىلەمىن. الداعى ۋاقىتتا قازاقستاندا حوككەيدىڭ قارقىندى دامۋىنا ءوز ۇلەسىمدى قوسقىم كەلەدى». ەلوردانىڭ قۇرداسى ياننىڭ ارمانى وسىنداي.
سالتاناتتى ءىس-شاراعا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ قاتىسىپ, ەلوردانىڭ قۇرداستارىنا رەسەيلىك جازۋشى نيكولاي زەنكوۆيچتىڭ «يميا, ستاۆشەە ەپوحوي. نۋرسۋلتان نازارباەۆ: نوۆوە پروچتەنيە بيوگرافي» اتتى كىتابىن سىيعا تارتتى.
ميراجان ماحان,
ل.ن.گۋميلەۆ اتىنداعى ەۇۋ ستۋدەنتى
