حالىقارالىق ەسترادالىق مۋزىكا فەستيۆالى شەڭبەرىندە ءۇش ۇلكەن شارا وتكىزۋ جوسپارلانعان. ولار: «Voice of Astana» ەسترادالىق مۋزىكا ورىنداۋشىلارىنىڭ I حالىقارالىق بايقاۋى, بايعالي سەركەباەۆتىڭ شىعارماشىلىق كەشى, باتىرحان شۇكەنوۆتى ەسكە الۋ كونتسەرتى.
«Voice of Astana» I حالىقارالىق بايقاۋىنىڭ ىرىكتەۋ جارىستارىنا 20 مەملەكەتتەن 500-دەن استام جاس ەسترادالىق مۋزىكا ورىنداۋشىلارىنىڭ ءوتىنىشى قابىلداندى. 15 ماۋسىمدا استانا قالاسىندا وتەتىن جارتىلاي فينالعا قحر ەسترادا جۇلدىزى باو لين, ءۇندىستان ونەرپازى شرەيا شارما, يزرايلدان كاتەرينا ماركو, يتاليادان Vinile توبى, ۇلىبريتانيادان Goldstone توبى, گرۋزيادان اۆتانديل ابەسلاميدزيا, ازەربايجاننان يلحام نازاروۆ, رەسەيدەن دۋلما سۋنراپوۆا, ەلەونورا نوسوۆا, بولگاريادان نيكولا چوچەۆ سياقتى 20 مەملەكەتتىڭ ونەر ساڭلاقتارى قاتىسادى. جارتىلاي فينالدا توپ جارىپ ۇزدىك شىققان ونەرپازدار 16 ماۋسىمدا وتەتىن «Voice of Astana» I حالىقارالىق ەسترادا مۋزىكاسى ورىنداۋشىلارى بايقاۋىنىڭ فينالدىق باسەكەسىندە باق سىناسادى.
وسى حالىقارالىق ونەر بايقاۋىنىڭ اياسىندا وتەتىن بايعالي سەركەباەۆتىڭ شىعارماشىلىق كەشى مەن باتىر شۇكەنوۆتى ەسكە الۋ كونتسەرتىنە ۆ.مەلادزە, ل.اگۋتين, ۆ.پرەسنياكوۆ, يۋ.كاراۋلوۆا, ر.رىمباەۆا, م.بەسپاەۆ جانە باسقا جۇلدىزدار ونەر كورسەتەدى. ەسترادالىق مۋزىكا ورىنداۋشىلارىنىڭ «Voice of Astana» I حالىقارالىق بايقاۋى ەلورداداعى «سارىارقا» ۆەلوترەگىندە وتەدى.
بوتاكوز امالبەك,
ل.ن.گۋميلەۆ اتىنداعى ەۇۋ 1-كۋرس ستۋدەنتى
