ارينە ەكونوميكا قۇرىلىمىندا اۋىل شارۋاشىلىعىنىڭ وزىندىك ورنى ەرەكشە. ەڭ ماڭىزدى ەكى مىندەتتى: ازىق-ت ۇلىك قاۋىپسىزدىگىن قامتاماسىز ەتۋ جانە ءوندىرىستى ءارتاراپتاندىرۋ ماسەلەلەرىن شەشۋ ۇلكەن ماڭىزعا يە. وسى تۇرعىدان كەلگەندە وڭىردە ەلەكتروندى كارتالاردى ەنگىزۋ ۋاقىت تالابىنا اينالىپ وتىر. جاقسى اۋدانى اۋىلشارۋاشىلىق ءبولىمىنىڭ باس مامانى ەركەجان تولەگەننىڭ مالىمەتىنە قاراعاندا, اۋدان وبلىس بويىنشا ەلەكتروندى كارتالاردى ەنگىزۋدە 2-ورىندا تۇر. بۇگىنگى تاڭدا قامتىلعان كولەم 520 مىڭ گەكتار جەردى قۇراعان. رەتى كەلگەندە اعىمداعى جىلدىڭ اقپان ايىندا ەنگىزىلگەن بازا اگرونومدىق جۇمىستاردى باقىلاپ, قاداعالاۋعا مۇمكىندىك بەرگەندىگىن اتاپ كەتكەن ءجون. مىسالى, Minagro.kz سايتىندا ءاربىر تىركەلگەن شارۋا قوجالىقتارى جەكە كابينەتتەرى ارقىلى ەركىن كىرە الاتىنداي جاعداي جاسالعان. اتالعان پورتال ەگىستىكتىڭ كارتالارىن كورۋگە, اۋماعى مەن سۋرەتتەرىن قاراۋعا, وبلىس بويىنشا ستاتيستيكالىق كورسەتكىشتەردى سالىستىرۋعا جانە وزگە دە قاجەتتى اقپاراتتاردى تابۋعا وتە ىڭعايلى.
جالپى, جاقسى اۋدانىنا جاساعان ءباسپاسوز تۋرى بارىسىندا بىرنەشە شارۋا قوجالىعىن ارالاپ, جۇمىستارىمەن جاقىن تانىسۋدىڭ ءساتى ءتۇستى. وسىنداعى نوۆوكيەۆكا اۋىلدىق وكرۋگىندە بولعان كەزىمىزدە ەگىس القاپتارىنىڭ كوكتەمگى ەگىس جۇمىستارىنىڭ دايىندىعىنا كوز جەتكىزدىك. بۇگىنگى تاڭدا اۋىلدىق وكرۋگتىڭ اۋىلشارۋاشىلىق القابى 36 128 گەكتاردى قۇراسا, سونىڭ 27 234 گەكتارى ەگىستىك جەرلەر بولىپ تابىلادى. مىنە, وسى القاپتى يگەرۋدە, اسىرەسە وسىمدىك شارۋاشىلىعىن دوڭگەلەتىپ جۇرگەن بىرنەشە اۋىلشارۋاشىلىق كاسىپورىندارى دا جۇمىس ىستەۋدە. بۇل كاسىپورىندار اۋىلدىق وكرۋگتىڭ وركەندەۋىنە سۇبەلى ۇلەس قوسىپ كەلەدى. اتاپ كورسەتكەندەي, بىرنەشە شارۋا قوجالىعىنىڭ باسىن بىرىكتىرگەن «Gold Drine» جشس بىرلەسىپ ۇتىمدى ارەكەت ەتۋ قاجەتتىگى جونىندە وزىندىك جۇمىس ورنەگىن كورسەتىپ كەلەدى. سونىڭ ىشىندە گريگوري دىچوك باسقاراتىن «لۋچ» قوجالىعى دا بار. سەرىكتەستىك ارپا, بيداي, زىعىر ەگۋمەن اينالىسادى. تۇسكەن تابىستان شارۋاشىلىق باسشىلارى ءوز قىزمەتكەرلەرىنە بارىنشا جاعداي جاساپ, كومەكتەسىپ وتىرادى. بۇرىن كەڭشار ديرەكتورى بولعان, كومسومول بريگاداسىن دا باسقارعان سەرگەي بوريسەنكو اۋىلدىق مەتسەناتتاردىڭ ەڭ بەلسەندىسى ەكەن. ول وسىنداعى ارپا-بيداي وسىرۋمەن اينالىسىپ كەلە جاتقان «مەچتا» شارۋا قوجالىعىن باسقارادى. وننان استام ادامعا جۇمىس تاۋىپ بەرىپ وتىرعان ازامات مەكتەپتىڭ قۇرىلىس جۇمىستارىنا كومەكتەسىپ, وقۋشىلارعا شاڭعى سىيلاپتى. مەرەكەلىك ءىس-شارالارعا دا ۇنەمى دەمەۋشىلىك جاساپ كەلەدى.
ءوڭىردىڭ تىنىس-تىرشىلىگىمەن ارنايى تانىسۋ ءۇشىن كەلگەن باق وكىلدەرىنە بەرگەن جاۋابىندا نوۆوكيەۆكا سەلولىق وكرۋگىنىڭ اكىمى بولات سادىقوۆ بىلاي دەدى: «بىزدەگى قوجالىقتار ەلمەن بىرگە العا ۇمتىلىپ, دامىپ كەلەدى. سوڭعى ۋاقىتتاردا ەسكى تەحنيكالارمەن جۇمىس ىستەۋ قيىندادى. سوندىقتان قازىر ءبارى ليزينگكە نەمەسە مەملەكەتتىك باعدارلامالار ارقىلى قاجەتتى تەحنيكالارىن جاڭارتۋدا».
اسقار تۇراپباي ۇلى,
«ەگەمەن قازاقستان»
اقمولا وبلىسى
