كاسىپكەرلەر پالاتاسىنىڭ اقتوبەدە وتكىزىلگەن كەڭەيتىلگەن ماجىلىسىندە ۇلتتىق كاسىپكەرلەر پالاتاسى تورالقا توراعاسى تيمۋر ق ۇلىباەۆ ءسوز تيەگىن وسى ارنادان ساباقتادى. سونىمەن بىرگە ونىڭ ايتۋىنشا, ۇلتتىق پالاتانىڭ قاتىسۋىمەن جاڭا سالىق كودەكسى ازىرلەنگەن. سونىڭ ىشىندە وندا شاعىن جانە ورتا بيزنەس ءۇشىن ارنايى سالىق رەجىمدەرى ەنگىزىلگەن. ءارى قوسىمشا قۇن سالىعىنىڭ بەلگىلى ءبىر شەگى ساقتالعان. ەڭ باستىسى, مەملەكەت-جەكەمەنشىك ارىپتەستىگى جوبالارى ەداۋىر جەڭىلدەتىلگەن. ءوز كەزەگىندە مۇنىڭ ءوزى ۇزاق مەرزىمگە لايىقتالعان قاناتقاقتى جوبالاردى جۇزەگە اسىرۋعا العىشارت قالادى. وسى ورايدا «اتامەكەن» ۇكپ-نىڭ باستاماسىنا سايكەس اقتوبە وبلىسىندا «باستاۋ» جوباسى جۇزەگە اسىرىلدى. اتالعان باعدارلاما اياسىندا ءوڭىر تۇرعىندارى ءوزىن ءوزى جۇمىسپەن قامتۋعا مۇمكىندىك الا باستادى. بۇل ءىس بيزنەس جۇرگىزۋدى مەڭگەرۋ ىسىنەن باستاۋ الادى. وڭىردە اتالعان جوبا جاقسى ناتيجەلەر بەرىپ, وعان مىڭداعان جۇمىسسىزدار مەن ءوزىن ءوزى جۇمىسپەن قامتىعان جاندار قاتىستى. وسى ارقىلى جوبالار وبلىستىق كوميسسيا الدىندا قورعالدى. تۇتاستاي العاندا رەسپۋبليكا وڭىرلەرى اراسىندا تۇڭعىش رەت قولعا الىنعان «باستاۋ» جوباسى نە بەردى دەگەن ماسەلەگە كەلسەك, بۇعان قايتارىلار جاۋاپ بىرەۋ عانا. ياعني العاشقىدا سىناق رەتىندە بەلگىلەنگەن «باستاۋدىڭ» وڭىردە كورسەتكەن وڭ ناتيجەلەرىنە وراي قاناتقاقتى باستاما 2017-2021 جىلدارعا ارنالعان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنا ەنگىزىلدى. «باستاۋدىڭ» اقتوبە ايماعىنا تيگىزگەن شاپاعاتى تۋرالى ايتار بولساق, وبلىستا وسى جوبا اياسىندا مىڭداعان تۇرعىن جەڭىلدىكتى نەسيەگە قول جەتكىزىپتى. تۇرعىنداردىڭ تاعى ءبىر قالىڭ توبى جوبالاردى ءوز قاراجاتتارىمەن قارجىلاندىرىپتى. قاناتقاقتى جوبا وبلىس ورتالىعى مەن وعان ىرگەلەس ەلدى مەكەندەردە ەمەس, كەرىسىنشە ويىل, تەمىر, ىرعىز جانە شالقار سەكىلدى شالعاي اۋدانداردا جۇرگىزىلۋى ونىڭ مارتەبەسىن بيىكتەتە تۇسەدى.
بيىل وبلىستا «باستاۋدان» باستالعان جول ءوزىنىڭ ءورىسىن ودان ءارى وسىرە تۇسپەك. وسى ارقىلى ءوڭىر تۇرعىندارىنىڭ جوبا شەڭبەرى مەن قامتىلۋ دەڭگەيى 2-3 ەسەگە دەيىن ۇلعايماق. بۇل ءۇشىن ءونىمدى ەڭبەكپەن قامتۋمەن جاپپاي كاسىپكەرلىكتى دامىتۋ باعدارلاماسىن ودان ءارى جالعاستىرۋ ءۇشىن قاجەتتى قاراجات بولىنگەن. ءبىر سوزبەن ايتقاندا, بۇل جوبا اۋىلدىق جەردە بيزنەستى دامىتۋدىڭ جولباستار ۇلگىسى بولا العانى انىق. وسى ورايدا اقتوبەدە بيزنەستى جاڭادان باستاعان جانداردىڭ قادامدارىن قولداۋ ءۇشىن تاعى ءبىر قاناتقاقتى جوبا ازىرلەنگەنىن ايتا كەتكەن ءجون. ونىڭ باستى ءبىر ەرەكشەلىگى, جوباعا قاتىسۋشىلار بۇعان دەيىن ابدەن قالىپتاسقان, بيزنەستىڭ جىلىك مايىن شاعىپ ىشكەن بىلىكتى دە بەلسەندى ءارى تاجىريبەلى كاسىپكەرلەرگە بەكىتىلۋىندە. وسى ارقىلى ولار «بيزنەستىڭ جول كارتاسى-2020» باعدارلاماسى اياسىنداعى بيزنەستى دامىتۋ مەن ۇيىمداستىرۋ گرانتىنا قاتىسا الادى. ۇلتتىق كاسىپكەرلەر پالاتاسى تورالقا توراعاسى تيمۋر ق ۇلىباەۆتىڭ مالىمدەۋىنشە, اقتوبە وبلىسىندا وڭ ناتيجە كورسەتكەن «باستاۋ» جوباسى بيىل ەلىمىزدىڭ بارلىق 160 اۋدانىن قامتىماق. سونىڭ ىشىندە وسى باعدارلاما اياسىندا جۇمىسسىزدار مەن ءوزىن ءوزى جۇمىسپەن قامتۋعا قول جەتكىزگەندەر كاسىپكەرلىك قىرلارىن ۇيرەنۋ مەن مەڭگەرۋ كۋرستارىنا تارتىلماق.
«اتامەكەن» ۇكپ-نىڭ اقتوبەدە وتكىزىلگەن كەڭەيتىلگەن ماجىلىسىندە ىسكەر ايەلدەر كەڭەسىنىڭ ءتورايىمى ءلاززات رامازانوۆا ايەلدەر قاۋىمداستىعى بيزنەسىنە ءتيىستى قولداۋ كەرەكتىگىن ايتا كەلىپ, اۋىل ايەلدەرى وسى ىسكە كوبىرەك تارتىلۋى قاجەتتىگىنە توقتالدى. ءارى ول بۇل رەتتە وبلىستىڭ ەڭ شالعاي اۋداندارىنىڭ ءبىرى ىرعىزدا تۋريستىك بيزنەستى دامىتۋ ىسىنە ايەلدەر لايىقتى ۇلەسىن قوسا الاتىنى جونىندە وي ساباقتادى.
تۇيىندەي ايتقاندا, بۇگىنگى كەزدە «اتامەكەن» ۇكپ-نىڭ الدىندا ءوز شەشىمىن كۇتىپ تۇرعان ماسەلەلەر دە جوق ەمەس. بۇل رەتتە العاشقى كەزەكتە وڭىرلىك دامۋ ينستيتۋتتارىنىڭ ءرولىن كۇشەيتۋ قاجەتتىگى تۋىندايدى. بۇگىندە نە كوپ, تاۋەلدى ەنشىلەس, سالالاس قۇرىلىمدار كوپ. ونىڭ سانىن قىسقارتۋ قاجەتتىگى دە ۋاقىت كۇتتىرمەيدى. اكتيۆتەر قۇرىلىمىن قايتا وزگەرتۋ ىسىندە دە شەشىمىن تاۋىپ ۇلگەرمەگەن ماسەلەلەر جەتكىلىكتى. ءوڭىر كاسىپكەرلەرىنىڭ وسىنداي جۇيەلى شەشىمدەرىن تالاپ ەتەتىن پروبلەمالىق ماسەلەلەرى پالاتا تورالقاسى تاراپىنان قولداۋ تاپسا يگى.
تەمىر قۇسايىن,
«ەگەمەن قازاقستان»
اقتوبە
