ءىس-شارانىڭ نەگىزگى ماقساتى – مەملەكەت باسشىسى ايقىنداعان مىندەتتەمەلەردى جۇزەگە اسىرۋ بارىسىندا اۋىلشارۋاشىلىق وندىرىسىنە IT-تەحنولوگيالاردى ەنگىزۋ, ەلىمىزدىڭ اگرارلىق سالاسىن يننوۆاتسيالىق باعىتتا كەشەندى دامىتۋ, عىلىمي جاڭالىقتاردى وندىرىستە پايدالانۋ, ينۆەستيتسيا تارتۋ جانە اۋىل شارۋاشىلىعىنا بىلىكتى ماماندار دايارلاۋ ءىسىن دامىتۋ.
جيىن بارىسىندا پارلامەنت ءماجىلىسىنىڭ اگرارلىق ماسەلەلەر كوميتەتىنىڭ توراعاسى ساپار وماروۆ, اۋىل شارۋاشىلىعى ۆيتسە-ءمينيسترى ەرلان نىسانباەۆ, قازۇاۋ رەكتورى تىلەكتەس ەسپولوۆ, «ۇلتتىق اگرارلىق عىلىمي ءبىلىم بەرۋ ورتالىعى» كوممەرتسيالىق ەمەس اكتسيونەرلىك قوعامىنىڭ باسقارما توراعاسى ۇلان تاجىباەۆ جانە ەكونوميكا عىلىمدارىنىڭ دوكتورى, ۇلتتىق عىلىم اكادەمياسىنىڭ اكادەميگى عاني قاليەۆ قاتىسىپ, وسى سالاداعى وزەكتى ماسەلەلەر تۋرالى وي قوزعادى.
ءماجىلىس دەپۋتاتى ساپار وماروۆ اگرارلىق سالا بويىنشا كاسىبي مامانداردىڭ جەتكىلىكسىز ەكەنىن ايتىپ, وسى ماسەلەنى وڭدى شەشۋ جولدارىن ۇسىنسا, ۆيتسە-مينيستر ەرلان نىسانباەۆ اۋىلشارۋاشىلىق وندىرىسىنە IT-تەحنولوگيالاردى ەنگىزۋدىڭ ماڭىزدىلىعىنا ايرىقشا ءمان بەردى. ال قازۇاۋ رەكتورى تىلەكتەس ەسپولوۆ ءبىلىم ورداسىنىڭ سوڭعى جىلداردا قول جەتكىزگەن تابىستارىنا توقتالا كەلە, بۇگىنگى تاڭدا ۋنيۆەرسيتەتتىڭ ۇستانعان باعىت-باعدارى مەن وسى جەردە اتقارىلىپ وتىرعان جۇمىستار جايىندا كەڭىنەن باياندادى.
– تەك اعىمداعى جىلدا 200 ستارتاپ جوبا ۇسىنىلدى. ونىڭ ىشىندەگى ەڭ ۇزدىكتەرىنە 150-1000 اقش دوللارى كولەمىندە قارجىلاي سىيلىقتار تابىستالدى. وتكەن جىلدىڭ ىشىندە ۋنيۆەرسيتەت عالىمدارى اۋىلشارۋاشىلىق وندىرىسىنە ەنگىزۋگە ارناپ 25 مونوگرافيا, 39 ۇسىنىس شىعارىپ, پاتەنت الۋعا 24 وڭ شەشىم بەرىلدى. كوپتەگەن جوعارى وقۋ ورىندارىندا مامانداردى دايىنداۋعا ءتيىستى ينفراقۇرىلىم مەن ءتيىستى عىلىمي مەكتەپ جوق. وسىنىڭ ءبارى ماماندار دايىنداۋ ساپاسىن تومەندەتەدى. قازىرگى تاڭدا ەلىمىزدىڭ اگروونەركاسىپ كەشەنىندە بىلىكتى ماماندارعا مۇقتاجدىق 80 پايىزعا جۋىقتايدى. بۇگىنگى كۇنى اۋىلدا اۋىل شارۋاشىلىعىن جاقسى بىلەتىن ەكونوميستەر, بۋحگالتەرلەر, مەنەدجەرلەر تاپشىلىعى سەزىلەدى. بۇل مامانداردى اگرارلىق جوو-دا دايىنداۋ كەرەك, – دەيدى ت.ەسپولوۆ.
كوشپەلى وتىرىسقا قاتىسۋشىلار وقۋ ورنى بازاسىنداعى ماماندار دايىنداۋعا ارنالعان وقۋ, عىلىمي-زەرتتەۋ زەرتحانالارىنىڭ, «ن.نازارباەۆ ءبىلىم جانە عىلىم ورتالىعىنىڭ» جۇمىسىمەن, ۋنيۆەرسيتەتتىڭ جالپى وقۋ-عىلىمي ينفراقۇرىلىمىمەن تانىستى. سونىمەن قاتار قازۇاۋ ۇستاز-عالىمدارىمەن, ءبىلىم الۋشى جاستارىمەن كەزدەسىپ, ءوزارا پىكىرلەستى.
جيىن قورىتىندىسى بويىنشا «اگروونەركاسىپتىك كەشەن سالاسىنا بىلىكتى مامان دايارلاۋ جانە اۋىلشارۋاشىلىق وندىرىسىنە IT-تەحنولوگيالاردى ەنگىزۋ» بويىنشا ناقتى ۇسىنىستار ازىرلەنىپ, ءتيىستى مەملەكەتتىك ورگاندارعا جولداناتىن بولادى.
كوشپەلى وتىرىستىڭ ۋنيۆەرسيتەتتەگى جيىنىنان سوڭ اگرارلىق ماسەلەلەر كوميتەتىنىڭ مۇشەلەرى مەن عالىمدار الماتى وبلىسى اۋماعىندا ورنالاسقان «Amiran» قازاق تاعامتانۋ اكادەمياسىنىڭ زاۋىتىنا, قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتىنا, قازاق كارتوپ جانە كوكونىس شارۋاشىلىعى عىلىمي-زەرتتەۋ ينستيتۋتىنا جانە باسقا دا شارۋاشىلىقتارعا ارنايى بارىپ, ماماندارمەن, اگروبيزنەس وكىلدەرىمەن كەزدەسىپ, ورتاق ماسەلەلەردى شەشۋدىڭ ءتيىمدى جولدارىن تالقىلاماق.
عالىم سۇلەيمەن,
«ەگەمەن قازاقستان»
الماتى
