جيىنعا «قازاقستان-فرانتسيا» پارلامەنتارالىق ىنتىماقتاستىق توبىنىڭ توراعاسى, ءماجىلىس دەپۋتاتى ومارحان وكسىكباەۆ, فرانتسيانىڭ ۇلتتىق اسسامبلەيا دەلەگاتسياسى, «فرانتسيا-قازاقستان» دوستىق توبىنىڭ توراعاسى پەر كابارە, «KATCO» جانە «Total» كومپانيالارىنىڭ وكىلدەرى, سونداي-اق «فرانتسۋز اليانسى» قاتىستى.
ءباسپاسوز كونفەرەنتسياسىندا العاش بولىپ ءسوز العان و.وكسىكباەۆ بىلتىر قازاقستان مەن فرانتسيا اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولعانىنا توقتالىپ, ەكىجاقتى ارىپتەستىكتىڭ قانات جايىپ كەلە جاتقانىن اتاپ ءوتتى. ون جىل بۇرىن ستراتەگيالىق سەرىكتەستىككە قول قويىلعاننان بەرى مەملەكەتتەر اراسىنداعى دوستىق ساپالى جاڭا دەڭگەيگە جەتكەنىن مالىمدەدى.
«ەكىجاقتى بايلانىستاردى دامىتۋعا ەلباسى نۇرسۇلتان نازارباەۆ 2015 جىلى قاراشادا پاريجگە رەسمي ساپارى بارىسىندا قول جەتكىزگەن ۋاعدالاستىقتار ۇلكەن سەرپىن بەردى دەپ نىق سەنىممەن ايتا الامىز. قازىرگى تاڭدا فرانتسيا كومپانيالارى ەلىمىزدەگى ءىرى ينۆەستورلار قاتارىنا كىرەدى. ساياسي تۇرعىدا ەكىجاقتى كۇن تارتىبىندەگى نەگىزگى ماسەلەلەر بويىنشا ءوزارا تۇسىنىستىكتىڭ جوعارى دەڭگەيىنە قول جەتكىزىلدى», دەدى و.وكسىكباەۆ.
بۇدان كەيىن «فرانتسيا-قازاقستان» دوستىق توبىنىڭ توراعاسى پ.كابارە ءسوز الىپ, ايتۋلى داتانى اتاپ وتۋگە ارنالعان جيىنعا شاقىرعانى ءۇشىن قازاقستان تاراپىنا العىسىن جەتكىزدى.
«قازاقستان قارىشتاپ دامۋىمەن الەمگە ۇلگى بولىپ وتىر. وسىدان از ۋاقىت بۇرىن عانا استانا شاعىن قالا ەدى, قازىرگى تاڭدا ءزاۋلىم عيماراتتار بوي كوتەرىپ, كورىكتى شاھارعا اينالىپ كەلەدى», دەدى پ.كابارە.
سونداي-اق فرانتسيادان كەلگەن وكىل ەكىجاقتى قارىم-قاتىناستىڭ نىعايۋىنا ءوز ەلىنىڭ دە مۇددەلى ەكەنىن جەتكىزدى.
«ستراتەگيالىق سەرىكتەستىكتىڭ ماڭىزدىلىعىنىڭ ءبىر سەبەبى – وسى كەلىسىم ارقىلى قازاقستانعا كەلەتىن شەتەلدىك ينۆەستورلاردىڭ سانى ارتادى. ونىڭ ۇستىنە, قازاقستان – ورتالىق ازياداعى ءبىزدىڭ ماڭىزدى ارىپتەسىمىز. وسى ون جىل ىشىندە ستراتەگيالىق سەرىكتەستىك جاڭا دەڭگەيگە كوتەرىلدى. بۇگىندە قازاقستان شىعىس پەن باتىستى بايلانىستىراتىن كوپىر ىسپەتتى», دەدى پ.كابارە.
سونىمەن قاتار جيىن بارىسىندا ىنتىماقتاستىقتى بۇدان ءارى دامىتا ءتۇسۋدىڭ مۇمكىندىكتەرى, ەلىمىزدەگى فرانتسۋز ينۆەستورلارىنىڭ الەۋەتى, قازاقستاندا بيزنەسكە جاسالعان قولايلى جاعداي ءسوز بولدى.
اباي اسانكەلدى ۇلى,
«ەگەمەن قازاقستان»
