«نۇر وتان» پارتياسىنىڭ قىزمەتىن جاڭعىرتۋ اياسىندا جاڭا 22 جوبا قولعا الىنعان بولاتىن. ولاردىڭ قاتارىندا «تسيفرلى قازاقستان», «رۋحاني جاڭعىرۋ» باعدارلامالارىن جۇزەگە اسىرۋ مەن شاعىن جانە ورتا بيزنەستى قولداۋعا باعىتتالعان تىڭ باستامالار بار.
ەلباسى 1 ماۋسىمدا وتكەن پارتيا ساياسي كەڭەسىنىڭ كەڭەيتىلگەن وتىرىسىندا پارتيانىڭ بۇل جاڭا باستامالارىنا قولداۋ ءبىلدىرىپ, ولاردى تابىستى ورىنداۋ ءۇشىن ناقتى تاپسىرمالار بەردى. سوعان وراي بۇگىندە نۇروتاندىقتار اتالعان پارتيالىق جوبالاردى ىسكە اسىرۋ ماقساتىندا جۇيەلى جۇمىستار جۇرگىزۋدە.
«رۋحاني جاڭعىرۋ» باعدارلاماسى اياسىندا پارتيا تاراپىنان قولعا الىنعان جاڭا جوبالاردىڭ ءبىرى – وتاندىق كىتاپحانالاردى جاڭعىرتىپ, ولاردى قازىرگى زامانعى ءبىلىم ورتالىقتارىنا اينالدىرۋ. سول ارقىلى كىتاپحانالاردى جايلى دەمالىس ورىندارى رەتىندە قايتا قۇرىپ, ول جەرلەردە جاستارعان ارنالعان قىزىقتى لەكتسيالار مەن وزەكتى تاقىرىپتاردى تالقىلايتىن پىكىرتالاستاردى تۇراقتى وتكىزىپ تۇرۋ كوزدەلگەن. ودان بولەك, جوبا اياسىندا بىرىڭعاي ونلاين كىتاپحانا جۇيەسى قالىپتاسىپ, ەلىمىزدەگى بارلىق كىتاپ قورى ەلەكتروندى نۇسقاعا كوشىرىلمەك. بۇل جۇيەگە ەلىمىزدەگى مەكتەپ پەن ۋنيۆەرسيتەت كىتاپحانالارى دا قوسىلادى. وسىلايشا قازاقستاندىق كىتاپحانالار زاماناۋي باعىتتا قىزمەت كورسەتىپ, حالىقتىڭ ماڭىزدى, سۇرانىسقا يە كەز كەلگەن ادەبيەتتى وقۋىنا جول اشىلاتىن بولادى.
«نۇر وتان» پارتياسى توراعاسىنىڭ ءبىرىنشى ورىنباسارى قازىرگى زامانعى ءبىلىم ورتالىعى رەتىندە قايتا جاڭعىرعان جامبىل اتىنداعى كىتاپحانانىڭ جۇمىسىنا ايرىقشا ءمان بەرىپ, مۇنداي ۇتىمدى تاجىريبەنى ەلىمىزدىڭ باسقا قالالارىندا دا جۇزەگە اسىرۋ كەرەكتىگىن اتاپ ءوتتى. ويتكەنى ەلباسىنىڭ «رۋحاني جاڭعىرۋ» باعدارلاماسىنىڭ نەگىزگى باعىتتارىنىڭ ءبىرى – حالىقتىڭ بىلىمگە دەگەن قۇشتارلىعىن ودان ءارى ارتتىرۋ.
سونداي-اق پارتيا توراعاسىنىڭ ءبىرىنشى ورىنباسارى اتالعان پارتيالىق جوبا شالعايداعى اۋىلدىق كىتاپحانالار ءۇشىن اسا ماڭىزدى ەكەنىنە نازار اۋداردى.
– بۇل جوبا بويىنشا بىرىڭعاي ونلاين كىتاپحانالار جۇيەسى ىسكە قوسىلماق. سونىڭ اياسىندا ەلىمىزدەگى بارلىق كىتاپ قورىنىڭ تسيفرلى نۇسقالارى دايىندالادى. قازىردىڭ وزىندە بۇل جۇمىستار ءار وڭىردە جۇرگىزىلۋدە. ءبىز وسى باستامانى ءبىر ىزگە ءتۇسىرىپ, نەگىزگى تسيفلاندىرۋ جۇمىستارىن ەلىمىزدەگى ءىرى كىتاپحانالاردا جۇرگىزۋدى كوزدەپ وتىرمىز. ال وڭىرلىك كىتاپحانالار اتالعان وقۋلىقتاردى سول ورتالىقتاردان الىپ, وزدەرى ولكەتانۋعا قاتىستى, ءوڭىر ءۇشىن ماڭىزدى كىتاپتاردى تسيفرلاندىراتىن بولادى. بۇل قايتالاۋلاردىڭ, ارتىق شىعىن مەن جۇمىس كۇشىنىڭ الدىن الۋعا مول سەپتىگىن تيگىزەدى, – دەگەن ماۋلەن اشىمباەۆ وسىنداي يگى ءىستى ءساتتى جۇزەگە اسىرۋدا جامبىل اتىنداعى كىتاپحانانىڭ تاجىريبەسىن وزگە وڭىرلەرگە قولدانۋ كەرەكتىگىن تىلگە تيەك ەتتى.
شىن مانىندە جامبىل اتىنداعى كىتاپحانانىڭ قايتا جاڭعىرتىلۋى وتە جوعارى دەڭگەيدە جۇرگىزىلگەن. ياعني رۋحانيات ورداسى سوڭعى ۇلگىدە جابدىقتالىپ, بۇگىندە ەۋروپالىق كوۆوركينگ ورتالىقتارىنىڭ دەڭگەيىندە قىزمەت كورسەتۋدە. مۇندا جەكە جۇمىس ىستەۋ ءۇشىن بىرنەشە تىنىش ايماق جانە جاڭا جوبالاردى توپ بولىپ تالقىلاۋعا ارنالعان ءتيىستى ورىندار قاراستىرىلعان. ءبىلىم ورتالىعى قاجەتتى كومپيۋتەرلەرمەن جانە جىلدامدىعى جوعارى Wi-Fi ينتەرنەت جەلىسىمەن دە جابدىقتالعان. وسى رەتتە پارتيانىڭ وسى باعىتتاعى تىڭ باستاماسىنىڭ ناتيجەسىندە بۇگىندە ەلىمىزدىڭ التى بىردەي وڭىرىندە كىتاپحانالاردىڭ جۇمىسى اتالعان فورماتقا كوشىرىلىپ جاتقانىن اتاپ وتكەن ءجون.
سونىمەن قاتار ماۋلەن اشىمباەۆ الماتىعا ساپارى كەزىندە «ميلوسەرديە» ەرىكتى قوعامى» قوعامدىق قورى قامقورشىلار كەڭەسىنىڭ مۇشەسى رەتىندە اتالعان كەڭەستىڭ وتىرىسىنا قاتىستى. بۇل قور 2006 جىلدان بەرى جۇمىس ىستەپ كەلەدى. بەلسەندى قوعام قايراتكەرى ارۋجان ساين باسقاراتىن ۇيىم سودان بەرى بالالاردىڭ دەنساۋلىعىن جاقسارتۋ جولىندا ءۇش نەگىزگى جوبا بويىنشا اۋقىمدى جۇمىستار اتقاردى. اتاپ ايتقاندا:
– «بالالارعا ءومىر سىيلا» جوباسى بويىنشا ەلىمىزدەگى ەمدەلمەيتىن دەرتكە شالدىققان بالالارعا كومەك كورسەتىلەدى (بۇگىنگە دەيىن 1613 بالاعا كومەك كورسەتىلگەن);
– «جەتىمدەرسىز قازاقستان» جوباسى بويىنشا بالا اسىراپ الۋشىلارعا زاڭدىق كەڭەستەر بەرىلىپ, جەتىم جانە اتا-انا قامقورلىعىنسىز قالعان بالالاردى قازاقستاندىق وتباسىلارعا ورنالاستىرۋ باعىتىندا جۇمىستار جۇرگىزىلدى (جوبا قولعا الىنعالى بەرى بالالار ۇيلەرىندەگى بالا سانى 3,5 ەسەگە ازايعان);
– ء«اۋتيزمدى جەڭەمىز» جوباسى بويىنشا بالالارى اۋتيزم دەرتىنە شالدىققان وتباسىلارعا ناقتى كومەك كورسەتىلىپ كەلەدى (جوبا اياسىندا بۇگىنگە دەيىن 500-دەن استام وسىنداي قازاقستاندىق وتباسىنا كومەك كورسەتىلگەن).
قامقورشىلار كەڭەسىنىڭ وتىرىسىندا «نۇر وتان» پارتياسى توراعاسىنىڭ ءبىرىنشى ورىنباسارى قوردىڭ جۇمىسى ەلىمىزدىڭ جارقىن بولاشاعى ءۇشىن اسا ماڭىزدى ەكەنىن ايتتى.
– قوردىڭ ارقاسىندا ەلىمىزدەگى مىڭداعان بالا مەن اتا-انا, تۋعان-تۋىس ۇلكەن قۋانىشقا بولەنگەنىن كورىپ وتىرمىز. بالانىڭ دەنساۋلىعىنان ارتىق, ودان ماڭىزدى ەشنارسە جوق. سوندىقتان وسى جولدا تەر توگىپ جۇرگەن بارشا جانداردىڭ جۇمىسىنا تەك ساتتىلىك تىلەيمىن. الداعى ۋاقىتتا پارتيا تاراپىنان قوردىڭ جۇمىسىنا قاتىستى ماسەلەلەردىڭ وڭ شەشىلۋىنە ءتيىستى قولداۋ كورسەتىلىپ, قاجەتتى شارالار قولعا الىنادى. ويتكەنى مۇمكىندىگى شەكتەۋلى جاندارعا جان-جاقتى قولداۋ كورسەتۋ پارتيا باسىمدىقتارىنىڭ ءبىرى, – دەدى ماۋلەن اشىمباەۆ.
ساپارباي پارمانقۇل,
«ەگەمەن قازاقستان»
الماتى
