كونفەرەنتسياعا ع.مۇسىرەپوۆ اتىنداعى بالالار مەن جاسوسپىرىمدەر تەاترىنىڭ ديرەكتورى ءسابيت ابدىحالىقوۆ, باس ۇيىمداستىرۋشى سۇلتان سرايلوۆ, بريتانيالىق سۋرەتشى الەكساندرا كوننور مەن جاپونيالىق قىلقالام شەبەرى اكيرا مۋراتا قاتىستى.
«بۇل ءىس-شاراعا اقش, برازيليا, ءۇندىستان, رەسەي, كورەيا, جاپونيا, ەۋروپا ەلدەرىنەن 250 سۋرەتشى وزدەرىنىڭ تۋىندىلارىن ۇسىندى. سونىڭ ىشىنەن 20 سۋرەتشى عانا تاڭدالىپ الىندى. ماۋسىمنىڭ 5 كۇنى سۋرەتشىلەر استاناعا كەلىپ, 6-سى كۇنى قالامىزدىڭ كوركەم جەرلەرىن ارالادى» , - دەدى, جوبا اۆتورى ءسابيت ابدىحالىقوۆ.
سۋرەتشىلەر ەلوردا جازىنىڭ شۋاقتى كۇندەرىندە قالامىزدىڭ كورىكتى جەرلەرىن, ارحيتەكتۋرالىق عيماراتتارىن, ونەر, ءبىلىم, مادەنيەت وشاقتارىن جانە كورىنىسى كوز تارتاتىن عاجاپ تابيعات اياسىن بەينەلەۋدى باستاپ كەتتى. قازىر استانا اكىمدىگىنىڭ ماڭايىن 1 سۋرەتشى, ەسىل وزەنىنىڭ جاعاسىن 2 سۋرەتشى قاعاز بەتىنە ءتۇسىرۋ ۇستىندە. مىسالى, يتاليا مەن كورەيا باتىس جانە شىعىس ءستيلى بوپ ەكىگە بولىنگەندىكتەن استانانى باسقا قىرلارىنان كورسەتپەك.
بريتانيادان كەلگەن شەبەر سۋرەتشى الەكساندرا كوننور: «مەن استاناعا ءبىرىنشى رەت كەلىپ تۇرمىن. قالانىڭ اسەمدىگى مەنى تاڭعالدىردى. ماعان وڭ جاعالاۋ قاتتى ۇنادى. سوندىقتان اق اعازعا بەينەلەپ جاتىرمىن. ال وعان دەيىن بۇركىت ۇستاپ تۇرعان ەر ادامنىڭ سۋرەتىن سالدىم» دەسە, توكيوداعى «Vasenoir» جەكە گالەرەياسىنىڭ يەگەرى, NDS Japan Fashion Illustration بايقاۋىنىڭ جەڭىمپازى اكيرا مۋراتا; « استانا مەن توكيو ۇقساس ەكەن. مەن استاناعا عاشىق بولدىم» دەپ ءسوزىن قىسقا قايىردى.
ءىس-شارا 12 ماۋسىم قورىتىندىلانىپ, ناتيجەسىندە كوركەمسۋرەت تۋىندىلارى قازاقستان رەسپۋبليكاسى ۇلتتىق مۋزەيى قورىنا تابىستالاتىن بولادى.
ازامات ماۋلەن ۇلى
