«تىڭ جوبادا سوتقا شاعىمدانۋشى ادامداردىڭ پسيحولوگيادىق جاعدايى جان-جاقتى ەسكەرىلىپ, كابينەت ءىشى اشىق ءتۇستى, كەلىسىم ۇستەلى دوڭگەلەك ەتىپ جاسالعان. ەندىگى ءىس اپەللياتسيالىق ساتىدا قارالماستان بۇرىن سۋديا تاراپتاردى تاتۋلاستىرۋعا تىرىسادى. بۇل ۇردىستەر ءبىرىنشى ساتىداعى سوتتاردا 5 كۇن, اپەلياتسيالىق سوتتاردا 10 كۇن ىشىندە قارالاتىن بولادى»,دەيدى وبلىستىق سوتتىڭ توراعاسى ەرلان ايتجانوۆ.
سۋديا, مەدياتور ساكەن تىلەگەنوۆ وزىنە زور جاۋاپكەرشىلىك جۇكتەلىپ وتىرعانىن جەتكىزدى. ونىڭ ايتۋىنشا مەدياتسيا — ءۇشىنشى, بەيتاراپ, ءادىل, جانجال ناتيجەسىنە مۇددەلى ەمەس تاراپتىڭ قاتىسۋىمەن وتەتىن, داۋلاردى رەتتەۋدىڭ بالامالى جاڭا ءتۇرى. ونى جۇرگىزۋ قاعيداتتارى ەرىكتىلىك, ءوزارا سىيلاسۋشىلىق, تاراپتاردىڭ تەڭ قۇقىلىعى, مەدياتوردىڭ بەيتاراپتىعى مەن ادىلدىگى, ءراسىمنىڭ اشىقتىعىنا نەگىزدەلەدى. سوت وندىرىسىنەن ايىرماشىلىعى «كانىلىلەر» مەن «كىناسىزدەر» دەگەن تاراپتار بولمايدى. داۋلاسۋشى ەكى جاق تاتۋلاستىرۋشى نەمەسە مەدياتوردى وزدەرى تاڭداۋعا تولىق قۇقىلى. وسى سەبەپتى بارلىق دەڭگەيدەگى سوتتاردا كەزەكشى مەدياتورلار جۇمىس ىستەيدى.
مەدياتسيا ازاماتتىق, ەڭبەككە قاتىستى, وتباسىلىق جانە باسقاداي قۇقىقتىق قاتىناستارعا بايلانىستى, سونداي-اق اۋىرلىعى شاعىن جانە ورتاشا قىلمىستىق ىستەر جونىندە تۋىنداعان داۋلاردا دا قولدانىلا الادى.
بۇگىنگى تاڭدا وبلىستىق سوتتا مەدياتسيانىڭ كومەگىمەن 14 داۋلى ءىس شەشىمىن تاپقان.
ءومىر ەسقالي,
«ەگەمەن قازاقستان».
