«ەلدەرىمىز اراسىنداعى ديپلوماتيالىق قارىم-قاتىناس ورناعان ساتتەن باستاپ جوعارى دەڭگەيدەگى بايلانىستار ورناپ, ساياسي ءوزارا سەنىم نىعايا تۇسۋدە. سونىمەن قاتار ء«بىر بەلدەۋ, ءبىر جول» جوباسىن جۇزەگە اسىرۋداعى ىنتىماقتاستىق تا ءتيىمدى جۇزەگە اسىرىلىپ, حالىقارالىق ارەناداعى ءوزارا ءىس-قيمىل دا جاندانىپ وتىر», - دەدى كەزدەسۋ بارىسىندا سي تسزينپين.
سي تسزينپين قازاقستان مەن قىتاي جان-جاقتى ستراتەگيالىق ىنتىماقتاستىقتى جانداندىرۋعا باسا نازار اۋداراتىندىعىن اتاپ ءوتتى.
«قازاقستان - ءبىزدىڭ ماڭىزدى كورشىمىز, سونداي-اق ىقپالدى وڭىرلىك دەرجاۆا. ءبىزدىڭ ەكىجاقتى قارىم-قاتىناسىمىز دوستاس كورشىلەر اراسىنداعى قاتىناستىڭ ۇلگىسىنە اينالىپ وتىر. ءبىز قازاقستانمەن ادامزاتتىڭ ورتاق تاعدىرىن قۇرۋ جولىندا العا قاراي بىرگە ىلگەرىلەۋگە دايىنبىز», - دەدى قحر توراعاسى.
ءوز كەزەگىندە قازاقستان پرەزيدەنتى مەملەكەتتىك ساپارمەن كەلۋگە شاقىرىپ, دوستىق پەيىلمەن قابىلداپ جاتقان قىتاي تاراپىنا ريزاشىلىعىن ءبىلدىردى.
«وسى مۇمكىنشىلىكتى پايدالانىپ, بۇكىلقىتايلىق حالىق وكىلدەرى جيىنىنىڭ ناۋرىزداعى سەسسياسىندا جوعارى مەملەكەتتىك لاۋازىمعا قايتا سايلانۋىڭىزبەن جانە قىتاي كوممۋنيستىك پارتياسىنىڭ 19 سەزىن تابىستى وتكىزۋىڭىزبەن تاعى ءبىر مارتە قۇتتىقتاعىم كەلەدى», - دەدى نۇرسۇلتان نازارباەۆ.
ايتا كەتەيىك, ەلباسى نۇرسۇلتان نازارباەۆ قىتايعا مەملەكەتتىك ساپارى اياسىندا 10 ماۋسىم كۇنى تسينداو قالاسىندا وتەتىن شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەسىنە قاتىسادى دەپ كۇتىلۋدە.
