سەمەي قالاسىنا قاراستى قاينار اۋىلىندا اسقاربەك سايلاۋعاليەۆ ەسىمدى جاس اقىن تۇرادى. بيىل وسى اۋىلداعى ساپارعالي بەگالين اتىنداعى ورتا مەكتەپتىڭ 3 سىنىبىن بىتىرگەن ول ءوزى ولەڭ عانا شىعارمايدى, اباي قۇنانباەۆ, مۇقاعالي ماقاتاەۆ سياقتى قازاقتىڭ اتاقتى اقىندارىنىڭ جىرلارىن جاتقا وقيدى. بولاشاعىنان زور ءۇمىت كۇتتىرەتىن بالعىن جاقىندا ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى نەگىزىندە جۇزەگە اسىرىلعان «100 جاڭا ەسىم» جوباسى اياسىندا جيناقتالعان «OZATTAR» قازاقستان ءبىلىم سالاسى ۇزدىكتەرىنىڭ ەنتسيكلوپەدياسىنا ەنىپ, «قازاقستان ءۇمىتى» توسبەلگىسىمەن ماراپاتتالىپتى.
«بالام ەڭ العاش 4 جاسىندا ابىرالى ءوڭىرىنىڭ تۋماسى, قازاقتىڭ تالانتتى اقىندارىنىڭ ءبىرى تولەۋجان ىسمايىلوۆتىڭ ولەڭدەرىن مانەرلەپ وقۋدان وتكەن سايىستا 1 ورىن يەلەنگەن بولاتىن. اسقاربەك نەگىزىنەن مۇقاعالي ماقاتاەۆتىڭ ولەڭدەرىن وقىعاندى جاقسى كورەدى. جۋىقتا «قارا ولەڭنىڭ قۇلاگەرى» اتتى ءىى رەسپۋبليكالىق مۇقاعالي ماقاتاەۆ وقۋلارىندا ءىىى ورىن الىپ, «مۇقاعالي مۇراگەرى» توسبەلگىسىنىڭ يەگەرى اتاندى», - دەيدى جاس اقىننىڭ اناسى اسىلگۇل باتىربەكوۆا.
اناسىنىڭ ايتۋىنشا, اسقاربەك قازىر قاينارداعى ورتالىقتاندىرىلعان كىتاپحانانىڭ تۇراقتى وقىرماندارىنىڭ بىرىنە اينالىپتى. كىتاپحانا ۇجىمى ولەڭقۇمار ورەندى 2017-2018 وقۋ جىلىندا «كىتاپتى ەڭ كوپ وقيتىن وقىرمان» نوميناتسياسىمەن ماراپاتتاپتى. توعىز جاستاعى اقىننىڭ وزىمەن تەلەفون ارقىلى سويلەسكەنىمىزدە كىتاپحانادان سۇلتانماحمۇت تورايعىروۆ ولەڭدەرى مەن بەيىمبەت مايلين اڭگىمەلەرىن وقىپ جۇرگەنىن ايتىپ بەردى.
ازامات قاسىم,
«ەگەمەن قازاقستان»
سەمەي قالاسى,
قاينار اۋىلى
