جارىق دۇنيە ەسىگىن 17 مامىر كۇنى اشقان نارەستە, ارينە ازىرگە ەشتەڭەدەن حابارسىز. اتا-اناسى باستاپ, جاعىمدى حاباردان قۇلاعدار بولعان قالا تۇرعىندارى قۋانىپ جاتقاندا ول تىپ-تىنىش, ءتاپ-ءتاتتى ۇيقى قۇشاعىندا ەدى. ايسۇلۋ بۇل دۇنيەگە تاۋداي باق-بەرەكە, نەسىبەسىن الا كەلدى. ناقتىراق ايتساق, كەشە, ياعني سارسەنبىنىڭ ساتىندە ميلليونىنشى قالا تۇرعىنىنا قوس بولمەلى پاتەر كىلتى تابىس ەتىلدى. پاتەر كىلتىن سالتاناتتى تۇردە تابىس ەتكەن وبلىس اكىمى جانسەيىت تۇيمەباەۆ نارەستەنىڭ دەنى ساۋ, ەلىنە ەلەۋلى, حالقىنا قالاۋلى قىز بولىپ وسۋىنە تىلەكتەستىگىن جەتكىزدى.
– ەلباسى بۇكىل دۇنيە ءجۇزىنىڭ قايراتكەرلەرى قاتىسقان ەكونوميكالىق فورۋمدا شىمكەنت قالاسىن ميلليوندى قالا دەپ جاريالادى. ال شىمكەنتتىكتەر رەسپۋبليكالىق ستاتۋس يەلەنۋ باستاماسىن وتە قىزۋ قارقىنمەن قولدادى. وتكەن جىلدىڭ قورىتىندىسىنا سايكەس وبلىس ورتالىعىنىڭ تۇرعىندارى 39 مىڭ ادامعا ءوستى. مۇنىڭ 18 مىڭى ىشكى كوشى-قون ەسەبىنەن جۇزەگە اسقان. ال قالانىڭ ميلليونىنشى تۇرعىنى مامىر ايىندا دۇنيەگە كەلگەن بولاتىن. ول ازاماتشا – ايسۇلۋ ەلامانوۆا جاس وتباسىنىڭ ءبىرىنشى پەرزەنتى. شىمكەنتتىكتەردىڭ اتىنان وسى ايتۋلى وقيعامەن شىن جۇرەكتەن قۇتتىقتايمىن! – دەپ وبلىس اكىمى جۇرەكجاردى لەبىزىن ءبىلدىردى.
ايتا كەتەلىك, بۇل پاتەردى وڭىرگە بەلگىلى كاسىپكەر, مەتسەنات, وبلىستىق ءماسليحات دەپۋتاتى قايرات مولداسەيىتوۆ سىيعا تارتتى. «مەن شىمكەنتتىڭ جاناشىرىمىن. قالانىڭ بۇگىنى مەن ەرتەڭى مەنى ارقاشاندا تولعاندىرادى. ەستەرىڭىزدە بولسا, بۇعان دەيىن قالا اكىمى بولىپ قىزمەت تە ىستەدىم. قالا مارتەبەسىن اسقاقتاتقان وسى سابيگە ەكى بولمەلى پاتەر بەرسەم دەپ شەشتىم. نارەستە شىمكەنت قالاسىمەن بىرگە كوركەيىپ وسە بەرسىن دەپ تىلەيمىن. ال ءوزىم قالانىڭ قارقىندى تۇردە داميتىنىنا سەنىمدىمىن», دەدى «وتاۋ گرۋپپ» كومپانياسىنىڭ باسشىسى قايرات مولداسەيىتوۆ.
تۇڭعىشتارىنىڭ ارقاسىندا پاتەرلى بولعان جاس اتا-انا سامات ەلامانوۆ پەن ايجان احايبەكوۆانىڭ وسىنداي قۋانىش سىيلاعان وبلىس, قالا اكىمدىگى مەن مەتسەناتقا ايتار العىسى شەكسىز. «قىزىمىزبەن بىرگە الاڭسىز ءوسىپ جاتقانبىز. بىزگە ەڭ ءبىرىنشى ازاماتتىق حال اكتىلەرىن تىركەۋ ورنىنان حابارلاستى. ولار قىزىمىزدىڭ اتى-ءجونىن, سالماعىن, كۋالىگىن سۇرادى. باسىندا قىزىمىزدىڭ ميلليونىنشى تۇرعىن بولا قوياتىنىنا سەنبەي, ونشا ۇمىتتەنە قويمادىق. بىراق كەشە ولار ۇيگە كەلىپ, ءبىزدىڭ قىزىمىزدى ميلليونىنشى قالا تۇرعىنى بولۋىمەن قۇتتىقتادى. شىنى كەرەك, سوندا نە ىستەرىمىزدى بىلمەي ابدىراپ قالدىق. قۋانىشىمىزدى سوزبەن ايتىپ جەتكىزۋ مۇمكىن ەمەس», دەيدى وتاعاسى, قالاداعى جۇيكە اۋرۋلارى اۋرۋحاناسىندا مەيىرگەر بولىپ جۇمىس ىستەيتىن سامات. ال ايسۇلۋدىڭ اناسى ايجان «الفا بانكتىڭ» قىزمەتكەرى ەكەن.
وسىلايشا, قاسيەتتى رامازان ايىنىڭ ءبىرىنشى كۇنى تۋعان ايسۇلۋ شىمكەنت قالاسىنىڭ مارتەبەسىن وزگەرتۋگە تىكەلەي سەپتىگىن تيگىزىپ, اتا-اناسىن قۋانىشقا بولەدى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
