مەملەكەت باسشىسى قاسىم-جومارت توقاەۆ قازاقستاننىڭ تۋريستىك الەۋەتىن اشۋ جانە ونى ءتيىمدى پايدالانۋ ستراتەگيالىق ماڭىزدى مىندەت ءارى مەملەكەتتىك ساياساتتىڭ باسىم باعىتى ەكەنىن بىرنەشە مارتە اتاپ وتكەن بولاتىن. II ەلوردالىق فورۋم وتكەن جىلعى كاسىبي الاڭنىڭ زاڭدى جالعاسىنا اينالىپ, قابىلدانعان باستامالاردى كۇشەيتىپ, كاسىبي ءوزارا ءىس-قيمىل اياسىن كەڭەيتتى. ءىس-شارا استانا قالاسىنىڭ اكىمدىگىمەن جانە «Astana Tourism» ءتۋريزمدى دامىتۋ ورتالىعى» جشس-مەن جانە استانا گيدتەر كلۋبىمەن بىرلەسىپ ۇيىمداستىرىلىپ كەلەدى.
«پرەزيدەنتتىك ورتالىق ەكىنشى جىل قاتارىنان استانا قالاسىنىڭ اكىمدىگىمەن جانە «Kazakh Tourism» ۇلتتىق كومپانياسىمەن بىرلەسىپ, ءوز الاڭىندا كاسىبي قاۋىمداستىق وكىلدەرىن جيناپ وتىر. وتكەن جىلى ءدال وسى جەردە ەلوردالىق گيدتەر مەن ەكسكۋرسيا جۇرگىزۋشىلەرىنىڭ I فورۋمى باستاۋ العان بولاتىن. سوڭعى جىلدارى ەلىمىز تۋريزم سالاسىندا تۇراقتى ءارى سەرپىندى ءوسىم كورسەتىپ كەلەدى: جىل سايىن تۋريستەر سانى ارتىپ, ولاردىڭ گەوگرافياسى كەڭەيىپ, ينۆەستيتسيالار كولەمى ۇلعايىپ, جاڭا باعىتتار يگەرىلىپ, ينفراقۇرىلىم دامىپ جاتىر. بۇل – مەملەكەت باسشىسى قويعان سالانىڭ دامۋ قارقىنىن ەكى ەسەلەۋ جونىندەگى ستراتەگيالىق مىندەتكە سايكەس جۇرگىزىلىپ جاتقان جۇيەلى مەملەكەتتىك ساياساتتىڭ ناقتى ناتيجەسى», دەدى پرەزيدەنتتىك ورتالىقتىڭ ديرەكتورى باقىتجان تەمىربولات.
ب.تەمىربولاتتىڭ ايتۋىنشا, 2025 جىلعى 28 قاڭتاردا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى وسى باعىتتاعى بەرىك ۇستانىمىن تاعى دا راستادى جانە ءتۋريزمدى قازاقستان ەكونوميكاسىنىڭ ءوسۋ درايۆەرلەرىنىڭ ءبىرى رەتىندە ايقىندادى. وسىعان بايلانىستى تۋريستىك سالانىڭ ينۆەستيتسيالىق تارتىمدىلىعىن ارتتىرۋ, كولىك ينفراقۇرىلىمىن, سونىڭ ىشىندە اۋە باعىتتارىن دامىتۋ, تۋريستىك نىسانداردى ينجەنەرلىك ينفراقۇرىلىممەن قامتاماسىز ەتۋ, جاڭا تۋريستىك ايماقتاردى دامىتۋ سياقتى باسىم باعىتتار بەلگىلەندى.
«ناتيجەسىندە, 2025 جىلى وتاندىق تۋريزم سالاسىنا سالىنعان ينۆەستيتسيالار كولەمى 1,2 ترلن تەڭگەدەن اسىپ, 2024 جىلمەن سالىستىرعاندا 32%-عا ارتتى. ءوز كەزەگىندە, استانا قازاقستان عانا ەمەس, ورتالىق ازياداعى جەتەكشى تۋريستىك ورتالىقتاردىڭ ءبىرى رەتىندەگى پوزيتسياسىن سەنىمدى تۇردە نىعايتىپ كەلەدى. بۇعان ىقپال ەتەتىن بىرقاتار فاكتوردىڭ ىشىندە ەلوردالىق گيدتەر مەن ەكسكۋرسيا جۇرگىزۋشىلەرىنىڭ جوعارى دايارلىق دەڭگەيى مەن كاسىبي بىلىكتىلىگى نەگىزگى ءرول اتقارادى. گيد-ەكسكۋرسيا جۇرگىزۋشى – بۇل تەك تۋريستەردى الىپ جۇرەتىن ادام عانا ەمەس. ول – ەلدىڭ وكىلى, تاريحي مۇرا الەمىنە جول كورسەتۋشى, قوناقتاردىڭ قازاقستان تۋرالى كوزقاراسىن قالىپتاستىراتىن مادەني ەلشى. ونىڭ كاسىبيلىگىنە, بىلىمىنە, شەبەرلىگى مەن جەكە قاسيەتتەرىنە ساياحاتشىلاردىڭ اسەرى قانشالىقتى جارقىن ءارى ەستە قالارلىق بولاتىنى تىكەلەي بايلانىستى. قازىرگى ۋاقىتتا پرەزيدەنتتىك ورتالىق – ەلىمىزدەگى تاۋەلسىز قازاقستاننىڭ ساياسي تاريحىن پرەزيدەنتتىك ينستيتۋت پريزماسى ارقىلى زەردەلەۋمەن, جۇيەلەۋمەن جانە ناسيحاتتاۋمەن اينالىساتىن جالعىز تاريحي-مەموريالدىق مەكەمە. بۇل, اسىرەسە, تاۋەلسىزدىگىمىزدىڭ 35 جىلدىعى اتالىپ وتەتىن مەرەيتويلىق جىلى ايرىقشا سيمۆولدىق مانگە يە», دەدى ءوز سوزىندە باقىتجان تەمىربولات.
استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ ءوز پىكىرىن ءبىلدىردى.
ء«اربىر گيد-ەكسكۋرسيا جۇرگىزۋشىنىڭ ءرولى ەرەكشە: تۋريست ءۇشىن نىسانداردى جاي عانا كورۋ ەمەس, قالانىڭ دامۋ تاريحىن, ونىڭ بىرەگەيلىگى مەن قۇندىلىقتارىن ءبىلۋ ماڭىزدى. بۇل مىندەتتى تەك سىزدەر جۇزەگە اسىراسىزدار. حالىقارالىق تاجىريبەگە قاراساق, وندا «تابىستى قالالىق دەستيناتسيالار» گيدتەردىڭ كاسىبي قاۋىمداستىعىمەن جۇيەلى تۇردە جۇمىس جۇرگىزەتىنىن كورسەتەدى. ۆەنا, سينگاپۋر, بارسەلونا سياقتى ءىرى تۋريستىك ورتالىقتاردا گيد-ەكسكۋرسيا جۇرگىزۋشىلەرى تۋريستىك ساياساتتىڭ سەرىكتەستەرى جانە قالا برەندىسىنىڭ ماڭىزدى بولىگى رەتىندە قاراستىرىلادى. ولاردىڭ ۇسىنىستارى تۋريستىك ءونىمدى قالىپتاستىرۋ جانە تۋريستىك قىزمەت ساپاسىن باعالاۋ كەزىندە تىكەلەي ەسكەرىلەدى», دەدى ول.
فورۋمعا ەلوردانىڭ تۋريستىك قاۋىمداستىعىنىڭ, مەملەكەتتىك ورگانداردىڭ وكىلدەرى, وڭىرلىك جانە حالىقارالىق سالالىق ساراپشىلاردى قوسا العاندا 130-دان استام وكىل قاتىستى. پىكىرتالاس بارىسىندا ەكسكۋرسيالىق قىزمەتتى دامىتۋ مەن تۋريستىك سەرۆيستىڭ ساپاسىن ارتتىرۋ, سونداي-اق ىشكى ءتۋريزمدى ىنتالاندىرۋدىڭ جاڭا شەشىمدەرىن ىزدەستىرۋ ماسەلەلەرى تالقىلاندى. فورۋم باعدارلاماسى پلەنارلىق وتىرىس پەن تاقىرىپتىق پانەلدىك سەسسيالاردى قامتىدى.
«قوناقتارىمىزدى قارسى الىپ جۇرگەن گيدتەر مەن ەكسكۋرسيا جەتەكشىلەرى, ءدال سىزدەر ادامدارعا وسى جەرگە نە ءۇشىن كەلگەن اسەرلەردى سىيلايسىزدار. سىزدەردىڭ سوزدەرىڭىز, سىزدەردىڭ اڭگىمەلەرىڭىز قازاقستاننىڭ بەينەسىن قالىپتاستىرادى. وسىعان بايلانىستى گيد ماماندىعى – وتە جاۋاپتى ءارى وتە بەدەلدى كاسىپ. ويتكەنى ەلىمىز تۋرالى قالاي باياندايسىزدار, سوعان قاراي ادامدار بۇل جەردەن تەك سۋرەتتەرمەن عانا ەمەس, جۇرەكتەرىندە ساقتالاتىن, كەيىن وتباسىسىنا, دوستارىنا جانە وزگەلەرگە ايتىپ جەتكىزەتىن وقيعالارمەن قايتادى», دەدى «Kazakh Tourism» ۇك» اق باسقارما توراعاسى تالعات عازيزوۆ.
پلەنارلىق وتىرىستا تۋريزم جانە سپورت مينيسترلىگىنە قاراستى تۋريزم يندۋسترياسى كوميتەتى توراعاسىنىڭ مىندەتىن اتقارۋشى نۇربول بايجانوۆ, «Astana Tourism» ءتۋريزمدى دامىتۋ ورتالىعى» جشس باسقارما توراعاسى ارتەم كۆاشۋك, «اتامەكەن» قر ۇكپ تۋريزم دەپارتامەنتىنىڭ ديرەكتورى – باسقارۋشى ديرەكتور داميلا كۋنانوۆا ءسوز سويلەدى.
ءبىرىنشى پانەلدىك سەسسيا اياسىندا ەلوردالىق گيدتەرمەن, مۋزەي ەكسكۋرسيا جۇرگىزۋشىلەرىمەن جانە Visit-ورتالىقتار وكىلدەرىمەن وزەكتى تاقىرىپتار تالقىلاندى. اتاپ ايتقاندا, «مۋزەيلىك ەكسكۋرسيالىق تاجىريبەلەردەگى ادىستەمەلىك تاسىلدەر» سەكتسياسىندا پرەزيدەنتتىك ورتالىقتىڭ ەكسكۋرسيالىق باعدارلامالارى تانىستىرىلدى. قاتىسۋشىلار مۋزەيلىك ەكسكۋرسيالاردى ازىرلەۋ مەن وتكىزۋدىڭ زاماناۋي ادىستەمەلىك تاسىلدەرىمەن تانىسىپ, اۋديتوريامەن ءتيىمدى جۇمىس ىستەۋ قۇرالدارىن تالقىلاۋعا مۇمكىندىك الدى.
ەكىنشى پانەلدىك سەسسيادا سالانى زاڭنامالىق رەتتەۋ مەن مۇرانى ينتەرپرەتاتسيالاۋدىڭ حالىقارالىق تاسىلدەرى قاراستىرىلدى. ءوز تاجىريبەسىمەن جانە ساراپتامالىق بىلىمىمەن گرۋزيا ەكوتۋريزم قاۋىمداستىعى باسقارما توراعاسى ناتاليا باحتادزە-ەنگلەندەر, سونداي-اق «Interpret Europe» (گەرمانيا) ەۋروپالىق مادەني مۇرانى ينتەرپرەتاتسيالاۋ قاۋىمداستىعىنىڭ سىرتقى بايلانىستار جونىندەگى ۇيلەستىرۋشىسى دۋبراۆكو فياچكو ءبولىستى.
فورۋم قورىتىندىسى بويىنشا ەكسكۋرسيالىق سالانى ودان ءارى دامىتۋعا, تۋريستىك قىزمەتتەردىڭ ساپاسىن ارتتىرۋعا, قازاقستاننىڭ مادەني جانە تۋريستىك الەۋەتىن نىعايتۋعا باعىتتالعان ۇسىنىمدار ازىرلەندى.
پرەزيدەنتتىك ورتالىقتا ۇلتتىق قۇرىلتايدا كوتەرىلگەن ماسەلەلەر تالقىلاندى
