قازاقستاننىڭ قازىرگى زامانعا لايىق جاڭا استاناسىن سالۋ يدەياسى مەملەكەت باسشىسى نۇرسۇلتان نازارباەۆقا تيەسىلى ەكەنى ءمالىم. 1994 جىلدىڭ 6 شىلدەسىندە قازاقستان رەسپۋبليكاسى جوعارعى كەڭەسى ەلوردانى الماتىدان اقمولاعا اۋىستىرۋ تۋرالى شەشىمدى قابىلدادى. كوشۋ پروتسەسى رەسمي تۇردە 1997 جىلعى 10 جەلتوقساندا جۇزەگە استى. ال 1998 جىلعى 6 مامىردا پرەزيدەنتتىڭ جارلىعىمەن اقمولانىڭ اتاۋى استانا بولىپ وزگەرتىلدى. مىنە, سودان بەرى زۋىلداپ 20 جىل ءوتتى...
قيىن-قىستاۋ كەزەڭدە ەلباسىنىڭ وسىنداي باتىل قادامعا بارۋىنا ءتۇرلى فاكتورلاردىڭ سەبەپ بولعانى انىق. ەڭ باستىسى ول قازاقستاننىڭ ەكونوميكالىق جانە گەوساياسي مۇددەسىنە بايلانىستى وسىنداي شەشىم قابىلدادى. استانا ەل اۋماعى ورتاسىندا ورنالاسىپ, ەۋروپا مەن ازيانى جالعاستىراتىن التىن كوپىر بولىپ تۇر. الايدا سول كەزدەگى جانە قازىرگى قالانى ەش سالىستىرۋعا بولمايدى. استانانى ەلىمىزدىڭ استاناسى ەتىپ قالىپتاستىرۋعا ءبىر ەمەس, بىرنەشە جىلدار كەتتى. كوپ قارجى قۇيىلىپ, كوپ كۇش جۇمسالدى. بۇگىندە استانا – جەدەل قارقىنمەن دامىپ كەلە جاتقان زاماناۋي قالا. بۇگىندە ونى بۇكىل الەم مويىنداپ وتىر. استانا – ەۋرازيانىڭ ءدال كىندىگىندە ورنالاسقان اسەم شاھارلاردىڭ ءبىرى ءارى بىرەگەيى.
استانانىڭ 20 جىلدىق مەرەيتويىنا وراي الماتىدا ۇيىمداستىرىلعان دوڭگەلەك ۇستەلگە ۇلتتىق مەملەكەتتىك كىتاپ پالاتاسىنىڭ ديرەكتورى الىبەك اسقاروۆ, قازاقستاننىڭ ەڭبەك سىڭىرگەن قايراتكەرى اسىلى وسمان, جۋرناليست-جازۋشى قانات ابىلقايىر جانە قالادا شوعىرلانعان ءتۇرلى كوللەدج وقۋشىلارى قاتىستى. ولار استانانىڭ وتكەن تاريحى, كەشەگىسى مەن بۇگىنگىسى جايىندا كەڭىنەن اڭگىمە قوزعاپ, اسەم شاھاردىڭ مەملەكەتىمىزدىڭ دامۋىنا, ءوسىپ-وركەندەۋىنە قوسقان ۇلەسى جانە وندا اتقارىلىپ جاتقان اۋقىمدى ىستەر تۋرالى باياندادى.
عالىم سۇلەيمەن,
«ەگەمەن قازاقستان»
الماتى
