قازاقستان حالقى اسسامبلەياسىنىڭ قولداۋىمەن, پرەزيدەنت جانىنداعى مەملەكەتتىك باسقارۋ اكادەمياسىنىڭ وبلىستىق فيليالىنىڭ ۇيىمداستىرۋىمەن ءوتىپ جاتقان شاراعا قاراعاندى, پاۆلودار جانە شىعىس قازاقستان وبلىستارىنىڭ مەملەكەتتىك قىزمەتشىلەرى قاتىسۋدا. سەمينار بارىسىندا ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋى, «رۋحاني جاڭعىرۋ» باعدارلاماسى مەن كوشى-قون ساياساتى تاقىرىپتارى بويىنشا وتاندىق عالىمدار مەن ساراپشىلار, قازاقستان حالقى اسسامبلەياسىنىڭ وكىلدەرى بايانداما جاساپ, ويلارىن ورتاعا سالاتىن بولادى.
«عۇلاما عالىم ءابۋ ناسىر ءال-فارابي: «ادامعا ەڭ ءبىرىنشى ءبىلىم ەمەس, تاربيە بەرىلۋى كەرەك, تاربيەسىز بەرىلگەن ءبىلىم – ادامزاتتىڭ قاس جاۋى», دەپ بەكەرگە ايتپاسا كەرەك. سول سەبەپتەن بالاعا تاربيە مەن ءبىلىم قاتار بەرىلۋى ءتيىس. وسىعان باسا نازار اۋدارعانىمىز ءلازىم. بىزگە كومپيۋتەر باستى ۇرپاق قاجەت ەمەس. كەيىنگى بۋىن مەيىرىمدى, اقىلدى, پاراساتتى بولىپ ءوسسىن دەسەك, ءبىز ولارعا دۇرىس ۇلگى-ونەگە كورسەتە ءبىلۋىمىز كەرەك. سوندا عانا كەلەشەكتە ەل ەرتەڭىن ويلايتىن بىلىكتى ماماندار قالىپتاستىرا الامىز», دەدى قازاقستان حالقى اسسامبلەياسى حاتشىلىعى مەڭگەرۋشىسىنىڭ ورىنباسارى ءنازيپا شاناي سەمينار-ترەنينگتىڭ اشىلۋىندا.
ءۇش كۇنگە سوزىلاتىن سەمينار-ترەنينگتە پرەزيدەنت جانىنداعى مەملەكەتتىك باسقارۋ اكادەمياسى ورتالىق ازيا وڭىرىندەگى ەتنوسارالىق جانە كونفەسسياارالىق قاتىناستاردى زەرتتەۋ ورتالىعى جەتەكشىسىنىڭ ورىنباسارى داستان كوشەرباەۆ, ورتالىق سايلاۋ كوميسسياسىنىڭ حاتشىسى سابيلا مۇستافينا, ۇلتتىق ەكونوميكا مينيسترلىگىنىڭ وكىلى اياۋلىم ساعىنباەۆا, تاريح عىلىمدارىنىڭ دوكتورى جامبىل ارتىقباەۆ مەملەكەتتىك قىزمەتكەرلەرگە ءدارىس وقيدى دەپ جوسپارلانعان.
ازامات قاسىم,
«ەگەمەن قازاقستان»
وسكەمەن
