اتالعان كورمە مەن سايىس استانانىڭ 20 جىلدىعى مەن «نۇرسۇلتان نازارباەۆتىڭ ءبىلىم بەرۋ قورى» قوعامدىق قورىنىڭ 20 جىلدىعىنا ارنالعان.
كورمەنىڭ اشىلۋىندا ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ ايتقانداي, ەل پرەزيدەنتى سومداعان بۇگىنگى استانا جاي عانا ەلوردا, مەگاپوليس ەمەس, بۇگىنگى استانا رەسپۋبليكانىڭ كيەلى قۇندىلىعى, بەيبىتشىلىك قالاسى. «نۇرسۇلتان نازارباەۆتىڭ ءبىلىم بەرۋ قورى» قوعامدىق قورىن تالانتتارعا قامقورشى قوعامدىق قور دەپ اتار ەدىم. ويتكەنى ەلباسىمىز جاريالاعان «قازاقستان-2050» ستراتەگياسىندا كوزدەلگەن باسەكەگە قابىلەتتىلىگى دامىعان مەملەكەت بولۋدى بولاشاقتا ىسكە اسىراتىن الدىڭعى قاتارلى جاستارىمىز. مىنە, بۇگىنگى كورمەمىز – وسىنداي يگى ىستەردىڭ ايعاعى ىسپەتتەس», دەدى ول.
«نۇرسۇلتان نازارباەۆتىڭ ءبىلىم بەرۋ قورى» قوعامدىق قورى توراعاسىنىڭ ورىنباسارى عايشا سىزدىقوۆا قوردىڭ 20 جىل بۇرىن پرەزيدەنتتىڭ باستاماسىمەن اشىلعانىن اتاپ ءوتتى.
«بەيبىتشىلىك جانە مەيىرىمدىلىك سيمفونياسى» كورمەسىنە قور فيليالدارى مەن ستۋدەنتتەردىڭ, الماتى قالاسىنداعى №1 بالالار ءۇيى تاربيەلەنۋشىلەرىنىڭ ءتورت جۇزدەن استام جۇمىسى ۇسىنىلعان. جاس جەتكىنشەكتەر شىعارمالارىن كەسكىندەمە, كوللاج, موزايكا, شىنىعا جازۋ, كۆيللينگ,
باتيك سەكىلدى ءتۇرلى ارالاس, كوركەم جانە قولدانبالى تەحنيكالاردا ورىنداعان. بايقاۋعا ۇسىنىلعان جۇمىستارعا ەلباسى كىتاپحاناسىنىڭ قىزمەتكەرلەرى, استانا قالاسىنداعى يۋنەسكو كلۋبى – بالالار كوركەمسۋرەت مەكتەبىنىڭ ونەرتانۋشىلارى باعا بەردى. وسىنىڭ ناتيجەسىندە 3-18 جاس ارالىعىنداعى بالالاردىڭ 140 تۋىندىسى تاڭدالىپ الىنعان. شارا بارىسىندا ەڭبەكتەرى ۇزدىك دەپ تانىلعان جاس سۋرەتشىلەر ءارتۇرلى اتالىمدار بويىنشا ماراپاتتالدى.
جاس سۋرەتشىلەردىڭ ايتۋىنشا, شىعارماشىلىق جۇمىستارى ولاردىڭ ىشكى جان دۇنيەسىن, ومىرگە دەگەن كوزقاراستارىن بەينەلەپ, ەلىمىزدەگى بىرلىك پەن كەلىسىمدى, باس قالامىز استاناعا دەگەن ماقتانىش سەزىمىن سۋرەتتەيدى.
ەلباسى كىتاپحاناسى مەن ءبىلىم بەرۋ قورىنىڭ سەرىكتەستىك تۋرالى مەموراندۋمى اياسىندا وتكەن بۇل كورمە العاشقى شارا ەكەنىن ايتا كەتۋىمىز كەرەك.
كورمە اعىمداعى جىلدىڭ 12 تامىزىنا دەيىن جالعاسادى.
ميراس اسان,
«ەگەمەن قازاقستان»
