«قازاقستان رەسپۋبليكاسىنىڭ 2025 جىلعا دەيىنگى ءبىرىنشى كەزەكتەگى مىندەتتەرىنىڭ ءبىرى الەمدىك ستاندارتتارعا قول جەتكىزۋ جانە زەينەتاقىمەن قامسىزداندىرۋ جۇيەسىن دامىتۋ ارقىلى ازاماتتاردىڭ ءومىر ءسۇرۋ ساپاسىن, الەۋمەتتىك سالاماتتىلىعىن جاقسارتۋ بولىپ تابىلادى. الەۋمەتتىك قامسىزداندىرۋدىڭ كونستيتۋتسيالىق كەپىلدىكتەرىن ىسكە اسىرۋداعى ەرەكشە ورىندى زەينەتاقى جۇيەسى الىپ وتىر. مەملەكەت حالىقتىڭ تۇرمىس دەڭگەيىن قالىپتا ۇستاۋ جانە ارتتىرۋ ءۇشىن وزىنە العان مىندەتتەمەلەردى وزگەرىسسىز جانە تولىق كولەمدە ەكونوميكالىق جاعدايدا بولىپ جاتقان وزگەرىستەرگە قاراماستان ورىنداپ وتىر. مەملەكەت باسشىسىنىڭ زەينەتاقىمەن قامسىزداندىرۋ جۇيەسىن جاڭعىرتۋ جونىندەگى تاپسىرماسىن جۇزەگە اسىرۋ شەڭبەرىندە زەينەتكەرلىك جاسىندا لايىقتى ءومىر ءسۇرۋ ءۇشىن زەينەتاقى تولەمدەرىنىڭ بارابارلىعىن قامتاماسىز ەتۋگە باعىتتالعان قازاقستان رەسپۋبليكاسىنىڭ زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسى قابىلداندى. تۇجىرىمدامادا زەينەتاقى تولەمدەرى مولشەرىن ينفلياتسيا دەڭگەيىنەن ەكى پايىزعا ىلگەرىلەي جىل سايىن ارتتىرۋ كوزدەلگەن. مەملەكەت باسشىسى ءوزىنىڭ تاپسىرماسىندا 2018 جىلعى 1 شىلدەدەن بازالىق زەينەتاقى ەڭبەك وتىلىنە بايلانىستى ورتاشا 1,8 ەسە ۇلعايادى دەپ اتاپ ءوتتى. بيىلعى جىلدىڭ شىلدەسىنەن باستاپ بازالىق زەينەتاقىنى تاعايىنداۋ ءتارتىبى وزگەرەدى, بارلىق قارت ادامدارعا ەڭبەك ءوتىلى بولعانىنا نەمەسە بولماعانىنا بايلانىستى دەموگرانت قامتاماسىز ەتىلەدى», دەدى س.جاقىپوۆا.
سونىمەن قاتار ول بارلىق زەينەتكەرلىك جاسقا تولعان ازاماتتارعا مەملەكەت بيۋدجەتتەن تولەپ وتىرعان بازالىق زەينەتاقىنىڭ مولشەرى ەڭبەك وتىلىنە جانە زەينەتاقى جۇيەسىنە قاتىسۋ ۇزاقتىعىنا تاۋەلدى بولاتىنىن تىلگە تيەك ەتتى.
«ەگەر بۇگىن بارلىق زەينەتكەرلەر بىردەي ەڭ تومەن كۇنكورىس دەڭگەيىنىڭ 54 پايىز مولشەرىندە بازالىق زەينەتاقى نەمەسە 15 274 تەڭگە الىپ وتىرسا, وندا بيىلعى 1 شىلدەدەن باستاپ ونىڭ مولشەرى زەينەتاقى جۇيەسىنە قاتىسۋ ەڭبەك وتىلىنە بايلانىستى ارتتىرىلاتىن بولادى. ءوتىلى 10 جىلدان از نەمەسە مۇلدەم بولماعان ازاماتتارعا بازالىق زەينەتاقىنىڭ ەڭ تومەن كۇنكورىس دەڭگەيىنىڭ 54 پايىزى بەلگىلەنەدى, ال 10 جىلدان كەيىن ءاربىر جىل ءۇشىن بازالىق زەينەتاقى 2 پايىزعا ۇلعايادى. بازالىق زەينەتاقىنىڭ ەڭ تومەن كۇنكورىس دەڭگەيىنىڭ جوعارعى مولشەرى 100 پايىزى نەمەسە 28 284 تەڭگەنى ەڭبەك ءوتىلى 33 جىل جانە ودان كوپ بولعان ازاماتتار الادى. اتالعان جاڭالىقتار كەلەشەكتە زەينەتكە شىعاتىن جانە سانى 2 148 318 ادامدى (ا.ج. 1 مامىرىنا) قۇرايتىن بۇگىنگى كۇنگى زەينەتكەرلەرگە قولدانىلاتىن بولادى», دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى.
راۋان قايدار,
«ەگەمەن قازاقستان»
