ەكى فريرايدەر ەسكەرتۋ بەلگىلەرىن ەلەمەي, قارى تاپتالىپ ارنايى دايىندالعان جولداردان تىس جەردە سىرعاناۋعا شىققان. ءاپ-ساتتە قار كوشكىنى جىلىستاپ, دەمالۋشىلاردىڭ ءبىرى قالىڭ قار استىندا قالىپ, شىعا الماي قالعان.
قۇتقارۋشىلاردىڭ ايتۋىنشا, سول كۇنى كۋرورت اۋماعىندا قار كوشكىنىنىڭ الدىن الۋ ماقساتىندا جاساندى جولمەن قار ءتۇسىرۋ جۇمىسى جۇرگىزىلگەن. الايدا كۋرورتتان تىس كەيبىر ۋچاسكەلەردە قالىڭ قاردىڭ كوبەسى سوگىلگەن.
«قوناقتاردىڭ كوپشىلىگى دايىندالعان تراسسالاردا سىرعاناپ, ەرەجەلەردى ساقتايدى. دەگەنمەن كوشكىن قاۋپى جوعارى كەزەڭدە بەلگىلەنگەن ايماقتاردان اسىپ, تيىم سالىنعان بەتكەيدە سىرعاناۋ قار كوشكىنى ءجۇرۋ ىقتيمالدىعىن ارتتىرادى. سوندىقتان بارىنشا قاۋىپسىزدىكتى كۇشەيتۋ ماقساتىندا بىرقاتار تراسسالاردا سىرعاناۋدى ۋاقىتشا شەكتەدىك», دەيدى شاڭعى ءپاترۋلى جانە كوشكىن قاۋىپسىزدىگى قىزمەتىنىڭ جەتەكشىسى ۆيكتور لۆوۆ.
كۋرورت اۋماعىنان تىس جەردە كوشكىن استىندا قالعان رايدەر تۋرالى اقپاراتتى زارداپ شەككەن ادامنىڭ سەرىگى حابارلاعان. ول وقيعا جونىندە دەرەۋ ارقانجول وپەراتورىنا جەتكىزگەن. مالىمەت بىردەن كۋرورتتىڭ جەدەل باسقارۋ ورتالىعىنا ءتۇسىپ, قۇتقارۋشىلار بەكىتىلگەن رەگلامەنتكە سايكەس جەدەل ارەكەتكە كوشىپ, دەر ۋاقىتىندا جەتتى.
زارداپ شەگۋشىنى قۇتقارۋ وپەراتسياسى بارىسىندا قار كوشكىنىنىڭ قايتا ءجۇرۋ قاۋپى دە بولدى. شاڭعى ءپاترۋلى جانە كوشكىن قاۋىپسىزدىگى قىزمەتىنىڭ جەتەكشىسى ۆيكتور لۆوۆ توپتىڭ ءىس-قيمىلىن باقىلاپ, جاعدايدى قاداعالاپ اسقان ابجىلدىكپەن ارەكەت ەتتى.
SOS سيگنالى اجالدان اراشالادى: الماتى تاۋلارىندا جارتاستا تۇرىپ قالعان ازامات قۇتقارىلدى
ومبى قاردىڭ استىندا قالعان 15 جىلدىق تاجىريبەسى بار رايدەر دەنيس بابكوۆ بولىپ شىقتى. ول سول كۇنى قاۋىپ-قاتەردى جەتە باعامداماي, ەسكەرتۋلەرگە سالعىرتتىقپەن قاراعانىنا وكىنىشىن دە ءبىلدىردى.
«بۇگىن مەن ءۇشىن ەكىنشى تۋعان كۇن. ون بەس جىل بويى سىرعاناپ ءجۇرىپ, ءدال بۇلاي بولادى دەپ ويلاماپپىن. اڭداۋسىزدا تراسسادان شىعىپ كەتىپ, جاڭا جاۋعان قالىڭ قارعا مەلدەكتەپ قالدىم. شاڭعىمدى اعىتىپ, ورنىمنان كوتەرىلە بەرگەنىمدە, ۇستىمنەن كوشكىن ءجۇردى. ادامداردى كورىپ تۇراسىڭ, بىراق ءبىر ساتتە قوزعالا دا, دەم الا دا الماي قالادى ەكەنسىڭ. بۇل – ءومىر مەن ءولىمنىڭ اراسىنداعى ساناۋلى سەكۋندتار. قۇتقارۋشىلاردى قۇشاقتاپ, ەرىكسىز جىلادىم», دەيدى جاپا شەككەن دەمالۋشى.
قازاقستان تمد-دا العاشقى: قۇتقارۋشىلاردىڭ بىرىڭعاي ۆەدومستۆوارالىق راديوجەلىسى ىسكە قوسىلدى
