تەرگەۋ مالىمەتىنشە, 2025 جىلدىڭ اقپان ايىندا ايىپتالۋشى Telegram جەلىسىندە بۇيرەگىن ساتۋ تۋرالى حابارلاندىرۋ جاريالاعان. كەيىن ول جالعان ەسىمدى ساتىپ الۋشىمەن كەزدەسكەن. تاراپتار 13 ميلليون تەڭگەگە مامىلە جاساۋعا كەلىسكەن.
قۇقىق قورعاۋ ورگاندارى ەر ادامدى 5 ميلليون تەڭگەنى قولما-قول الۋ كەزىندە ۇستادى.
حابارلامادا ايتىلعانداي, ايىپتالۋشىنى بۇل قادامعا اۋىر ماتەريالدىق جاعدايى مەن قارجىعا مۇقتاجدىعى يتەرمەلەگەن. سول سەبەپتى ول ءوز اعزاسىن ساتۋعا بارعان.
وعان قازاقستان رەسپۋبليكاسى قىلمىستىق كودەكسىنىڭ 116 جانە 24-باپتارى بويىنشا ء«تىرى ادامنىڭ اعزالارىن ترانسپلانتاتسيالاۋ نەمەسە وزگە دە ماقساتتا زاڭسىز مامىلە جاساۋعا وقتالۋ» ايىبى تاعىلدى. سوت وتىرىسى بارىسىندا ەر ادام كىناسىن تولىق مويىندادى.
قىلمىستىڭ ورتاشا اۋىرلىقتاعى ساناتقا جاتاتىنىن جانە ناقتى زيان كەلتىرىلمەگەنىن ەسكەرە وتىرىپ, امنيستيا تۋرالى زاڭعا سايكەس ول قىلمىستىق جاۋاپكەرشىلىكتەن بوساتىلىپ, ءىس ءوندىرىسى توقتاتىلدى. قاۋلى زاڭدى كۇشىنە ەنگەن جوق.
ايتا كەتەيىك, پاۆلوداردا شەتەل ازاماتى بۇيرەگىن 50 مىڭ دوللارعا ساتپاق بولعان.
