وتىرىستى اشقان مەملەكەتتىك حاتشى گ.ابدىقالىقوۆا شارانىڭ مەملەكەتتىك رامىزدەر كۇنىمەن تۇسپا-تۇس كەلگەنىن اتاپ ءوتىپ, قاتىسۋشىلاردى مەرەكەمەن قۇتتىقتادى. سونىمەن قاتار بيىل مەيرامنىڭ استانانىڭ 20 جىلدىق مەرەيتويى بەلەسىمەن قاتار كەلۋىنىڭ سيمۆولدىق ءمانى زور ەكەندىگىن اتاپ ءوتتى. «رامىزدەرىمىزدىڭ قوعامدىق ومىردە الار ورنى ەرەكشە. ول حالقىمىزدىڭ بىرلىگى مەن پاتريوتتىق سەزىمىن بىلدىرۋدە اسا ماڭىزدى ءرول اتقارادى. سوندىقتان ونىڭ ءمان-ماڭىزىن ناسيحاتتاۋ مەن قولدانىلۋىن رەتتەپ وتىرۋ – بارشامىزدىڭ ورتاق مىندەتىمىز», دەدى ول. مەملەكەتتىك حاتشى مەملەكەتتىك نىشانداردىڭ جەكەلەگەن ورتالىق جانە جەرگىلىكتى اتقارۋ ورگاندارىنداعى قولدانىسى مەن ولاردى دارىپتەۋ جۇمىسى زەرتتەلگەنىن ايتا كەلىپ, اقپارات جانە كوممۋنيكاتسيالار ءمينيسترى د.اباەۆتىڭ, استانا قالاسى اكىمىنىڭ ورىنباسارى ە.امانشاەۆتىڭ, قىزىلوردا جانە اقتوبە وبلىستارىنىڭ اكىمدەرى ق.كوشەرباەۆ پەن ب.ساپارباەۆتىڭ ەسەبىن تىڭدادى. قىزىلوردا وبلىسىنىڭ اكىمى قىرىمبەك كوشەرباەۆ سىر وڭىرىندە مەملەكەتتىك رامىزدەرگە دەگەن قۇرمەتتى قالىپتاستىرۋ, جاس ۇرپاقتىڭ ساناسىنا ءسىڭىرۋ باستى مىندەت ەكەنىن اتاپ ءوتتى. اكىم بۇل باعىتتا وبلىستا اۋقىمدى جۇمىستار اتقارىلىپ جاتقانىن, اتاپ ايتقاندا 2016 جىلى بيىكتىگى 60 مەتر بولاتىن تۋ تۇعىرىنىڭ, جالپى كولەمى 3 گەكتاردى قۇرايتىن مەملەكەتتىك رامىزدەر اللەياسى پايدالانۋعا بەرىلگەنىن جەتكىزدى. سونداي-اق وبلىس اكىمدىگىنىڭ جانىنداعى ارنايى كوميسسيانىڭ شەشىمىمەن ەندىگى كەزەكتە بارلىق اۋدان ورتالىقتارى مەن 46 ەلدى مەكەندە وسىنداي اللەيالار اشىلماق. ونىڭ ايتۋىنشا, وبلىستاعى بارلىق مەملەكەتتىك مەكەمەلەردە, ءبىلىم بەرۋ ۇيىمدارىندا مەملەكەتتىك نىشاندار تالاپقا ساي ورناتىلعان. دەگەنمەن, ق. كوشەرباەۆ بۇل سالادا پروبلەما بار ەكەنىن ايتىپ, ونى شەشۋ ماقساتىندا كوميسسيا قاراۋىنا ءوز ۇسىنىسىن ءبىلدىردى. «مەملەكەتتىك رامىزدەردى دايىندايتىن ليتسەنزياسى مەن سەرتيفيكاتتارى بار جەكە سەرىكتەستىك مەكەمەلەر مەملەكەتتىك رامىزدەر تۋرالى كونستيتۋتسيالىق زاڭعا سايكەس كەلمەيتىن مەملەكەتتىك رامىزدەردى پايدالانۋعا بەرۋدە. بۇل جاعدايلار قاراعاندى قالاسىندا ورنالاسقان «اق باستاۋ كز» جشس جانە استانا قالاسىندا ورنالاسقان «زۋم» جارناما اگەنتتىگى» جشس-دا كەزدەستى. بۇل جونىندە تەحنيكالىق رەتتەۋ جانە مەترولوگيا كوميتەتىنە ءتيىستى ۇسىنىس بەرىلدى», دەدى ول.
بۇدان سوڭ ءسوز العان اقتوبە وبلىسىنىڭ اكىمى ب.ساپارباەۆ وسى وبلىستاعى مەملەكەتتىك نىشاندار جاعدايىنان تولىق مالىمەت بەرە كەلىپ, قىزىلوردالىق ارىپتەسىمەن تولىق كەلىسەتىنىن ايتىپ, ۇسىنىستى قولدايتىنىن جەتكىزدى. «قازىرگى تاڭدا تۋدى, ەلتاڭبانى دايىندايتىن مەكەمەلەر كوپ. ولاردىڭ ارقايسىسى ءارتۇرلى دايىندايدى. ەشقانداي جاۋاپكەرشىلىك جوق. سوندىقتان, ولاردىڭ جاۋاپكەرشىلىگىن ارتتىرۋدى ۇسىنامىز. ەكىنشىدەن, ولاردان دايىندايتىن مەملەكەتتىك رامىزدەر مەملەكەتتىك ستاندارتتارعا سايكەس بولۋى كەرەكتىگىن تالاپ ەتۋ قاجەت. ەگەر ولاردىڭ ليتسەنزياسى بولسا, سوندا كورسەتىلگەن تالاپتاردى تولىعىمەن ورىنداۋى ءتيىس. سول كەزدە ەشقانداي كەمشىلىكتەر بولمايدى دەپ ويلايمىز», دەدى ول.
كوميسسيا جۇمىسىنىڭ قورىتىندىسى بويىنشا مەملەكەتتىك حاتشى گ.ابدىقالىقوۆا مەملەكەتتىك ورگاندار باسشىلارىنا مەملەكەتتىك رامىزدەردى پايدالانۋ جانە ناسيحاتتاۋ ماسەلەلەرى, سونىمەن قاتار وسى سالاداعى زاڭنامالاردى ساقتاۋ جونىندە بىرقاتار ناقتى تاپسىرمالار بەردى.
ۆەنەرا تۇگەلباي,
«ەگەمەن قازاقستان»
