قاسيەتتى قازىنا

ۇستىمىزدەگى جىلعى شىلدە ايىندا پار­لامەنت سەناتىنىڭ دەپۋتاتتارى قا­زاق­ستان رەسپۋبليكاسى تاۋەلسىزدىگىنىڭ 20 جىل­دى­عى دەكلاراتسياسىن قابىلداۋ تۋرالى باستاما كوتەردى. ەلباسى نۇرسۇلتان نازارباەۆ دەكلارا­تسيا­عا «ءبىزدىڭ قوعامىمىزدى توپتاس­تىرۋ­دىڭ ماڭىزدى قۇجاتى» دەپ باعا بەردى. ول قازاق­ستاننىڭ ەگەمەندىك جولىنداعى بارلىق جەتىستىكتەرى كورىنىس تاپقان اسا ماڭىزدى ساياسي-زاڭدىق قۇجات بولىپ تابىلادى. وسى ورايدا 2011 جىلعى 10 جەلتوقسان تاۋەل­سىز قا­زاقستاننىڭ جاسامپاز تاريحىنىڭ جارقىن پا­راق­تارىنىڭ ءبىرى بولىپ قالارى اقيقات. دەكلاراتسيادا تۇڭعىش پرەزيدەنت – ۇلت كوشباسشىسى نۇر­­سۇلتان نازارباەۆتىڭ جاڭا مەملەكەت – تاۋەل­سىز قازاق­ستاندى قۇرۋداعى, مەملەكەتتىلىگىن قالىپ­تاس­تى­رىپ, ەگەمەندىگىن نىعايتۋداعى تەڭدەسسىز ءرولى اتاپ كورسەتىلگەن. بۇل قۇجاتتا دەموكراتيالىق, زا­يىر­لى, قۇقىقتىق جانە الەۋمەتتىك مەملەكەت رەتىندە قا­رىشتاپ دامىپ كەلە جاتقان قازاقستاننىڭ ءاربىر قادامى كەزەڭدى كورىنىس تاپقان. ونىڭ ماتىنىندەگى ءاربىر جولدا ەلىمىزدىڭ الەۋمەتتىك-ساياسي, ەكونومي­كا­لىق, قوعامدىق ءوسۋ جانە جارقىن بولاشاعى باعى­تىن­داعى سوقپاعى سايراپ جاتىر. جاھاندىق كاتاكليزمدەرگە ۇرىنباي, الەمدىك داعدارىستان شارشاپ-شالدىقپاي شىعىپ, كەرىسىنشە, قارىشتى دامۋ جولىنا ءتۇسۋ ءۇشىن بۇكىل ەل بولىپ جۇمىلۋ كەرەك ەدى, ەلباسىنىڭ كەز كەلگەن جاسامپاز باستاماسىن قولداپ وتىرعان حالقىمىز تاس-ءتۇيىن جۇمىلا ءبىلدى. ۇلى شاكارىمنىڭ: «قۇ­بىل­عان الەم جارىسى – اقىلدى جاننىڭ تابى­سى», دەپ ايتقان قاعيداسىن قازاقستاندىقتار شىنايى تۇردە جۇزەگە اسىرا ءبىلدى. ۇلكەن كورەگەندىكپەن قا­بىلدانعان «قازاقستان-2030» ستراتەگياسى حالىق­تىڭ اۋقاتتى تۇرمىسىن قالىپتاستىرۋعا, سىرتتان كەلەتىن اۋىرتپالىقتارعا سەنىمدى تويتارىس بەرۋگە, ءسويتىپ, ەكونوميكالىق رەفورمالاردان وڭ ءناتي­جە­لەر الۋعا جاعداي جاسادى. تاۋەلسىزدىك جىل­دارىن­دا الەۋمەتتىك سالا بويىنشا كوپ دەڭگەيلى جۇيە قۇرىلدى. سوڭعى ون جىلدا زەينەتاقى 8 ەسە, سوڭعى ءۇش جىلدا ەڭبەكاقى 2 ەسە ارتتى. بۇل – يندۋستريالىق-يننوۆاتسيالىق دامۋ, الەۋ­مەت­تىك جاڭعىرۋ, حالىقتى جۇمىسپەن قامتۋ جانە باسقا دا مەملەكەتتىك ومىرشەڭ باعدارلامالاردى مەر­­زىمىندە ىسكە اسىرۋعا ۇيىتقى بولعان وكىلدى ءجا­نە ات­قارۋشى بيلىكتىڭ جەڭىسى. بۇل – «جاعالاسقانعا – جاۋ كوپ, اعالاسقانعا تاۋ كوپ», دەپ ىنتىماق پەن كەلى­سىمدى مۇرات ەتكەن بارشا قازاقستاندىقتاردىڭ جە­ڭىسى! بۇل – حالقىن اداستىرماي «قازاقستاندىق دا­مۋ­دىڭ» داڭعىل جولىنا سالا بىلگەن ەلباسىنىڭ جەڭىسى! * * * ەل تاۋەلسىزدىگىنىڭ 20 جىلدىعى قارساڭىندا سوناۋ بالا كەزدەن سانادا ساقتالىپ, جىلدار وتسە دە جادىمدا جاتتالىپ قالعان مىنا ءبىر اڭىز ويعا ورالا بەردى. ەرتە كەزدە سايىن دالادا ۇيالاس قاس­قىر­لار مىڭعىرعان كيىك تابىنىن قاۋمالاپ, قۇز­دان قۇلاتىپ, جەمتىك قىلۋعا قۋىپ كەلە جاتادى. باسىن العا سوزىپ جىبەرىپ, ۇركە قاشقان كيىك لەگى الدىنداعى قۇز-اجال­دى سەزبەسە كەرەك. وسى كورى­نىستى تاماشالاپ تۇرعان اڭشىلار كەنەتتەن ادام سەن­بەستەي كورىنىسكە تاپ بو­لا­دى. تابىندى ءيىرىپ العان قۇلجا-تەكە تەبىنىپ, الگى كوكجالدارعا قارسى تۇرا قالادى. ءسۇيىر ءمۇيىزى كۇنگە شاعىلىسقان قۇل­جا ەڭسەسىن تىكتەپ, ايبىن­دا­نىپ شى­عا كەلەدى. جا­لى كۇدىرەيگەن قۇلجانىڭ ومىراۋى ەسىك­تەي بولىپ, تۇلا بويى ايبات شاشادى. مۇنداي جانكەشتى قار­سىلىقتى كۇتپەگەن كوكجالدار قۇيرىق­تارىن باۋى­رىنا سالىپ, كەيىن شەگىنە بەرەدى دە بۇلك-بۇلك جەلىپ, ەندى قايتىپ ورالماستاي قىر اسادى. سايىن دالانىڭ ەركە جانۋارى­نىڭ مىناداي قايراتى مەن قايسارلىعىنا تاڭ-تاماشا قالعان ادامداردىڭ ساناسىندا ەشقانداي سىرتقى كۇشكە بوي الدىرمايتىن «رۋح» دەپ اتالاتىن كيەلى ۇعىم سول كەزدە پايدا بولعان ەكەن. وسى وقيعا اڭىز سيپاتىندا بولعانمەن, قازاق ەلىنىڭ تاع­دى­رى تارىزدەس بولىپ كورىنەدى. حالقىمىز نەبىر الماعايىپ كەزەڭدەردى باستان وتكەرگەنىن, جاۋگەرشىلىك زاماندا جويى­لىپ كەتۋ قاۋپى دە بولعانىن قايتالاپ جاتۋ ارتىق. بىراق, قانداي كەسىر زامان بولسا دا, حالقىمىزدىڭ رۋحى ءسونىپ كورگەن جوق. باسقا-باسقا ال قازاق ءۇشىن تاۋەلسىزدىكتىڭ قا­دىر-قاسيەتى دە, ءمان-مازمۇنى دا ەرەكشە. ءبىز بوس­تان­دىق, ازاتتىق, تەڭدىك جولىندا نايزا­مىز­دى قولدان ءتۇسىر­مەگەن حالىقپىز. اشىق كۇندە بەيبىتشىلىگىمىز بايان­دى بولسىن دەپ سول نايزاعا ۇكى تاققان ەلمىز. ءبىزدىڭ حالقىمىز بەيبىتشىلىك پەن تىنىش ءومىردىڭ باعاسىن جاقسى ۇعىنادى. سون­دىقتان قازىرگى قازاقستانداعى جاعدايدى «قوي ۇستىنە بوزتورعاي جۇمىرتقالاعان» زامانمەن سا­لىس­تىرۋعا بولادى. مۇنىڭ ءبارى دە ەلباسى نۇر­سۇلتان نازارباەۆتىڭ كونە داۋىردەگى كوك تۇركى­لەر­دىڭ قاعاندارى سەكىلدى «كۇندىز وتىر­ماي, تۇندە ۇيىقتاماي» اتقارعان قىزمەتىنىڭ اي­شىقتى ايعاعى. ول ەلدى قيىندىقتان شىعارامىن دەپ ەدى – شى­عاردى, داعدارىستى جەڭەمىن دەپ ەدى – جەڭدى, الەمگە ءسوزىمدى جۇرگىزەمىن دەپ ەدى – جۇرگىزدى. وزگەنىڭ كورپەسىن جامىلىپ, ءومىر كەشكەن كەزىمىز دە بولعان. تاۋبە, قازىر تاۋەلسىزبىز. بىراق, بوس­تان­دىقتا ءومىر سۇرە ءبىلۋ بوداندىقتا ءومىر سۇرۋدەن وڭاي ەمەس ەكەنىن دە ەستەن شىعارماۋ كەرەك. اتا-بابامىز ارمانداعان بۇگىنگىدەي كۇنگە جەتكەن سوڭ ۇلت كوشباسشىسى ن.نازارباەۆ: «ءبىز بۇگىنگى تىرلىگىمىز ءۇشىن, قازاقستان دەپ اتالاتىن رەسپۋب­لي­كا­نىڭ جەر بەتىندە بارلىعى ءۇشىن تاريحتىڭ ءار تۇ­سىن­دا وسى ەلدى, وسى جەردى قورعاعان قايسار جان­دار­دىڭ ارۋاعىنىڭ ال­دىندا قاشان دا قارىز­دارمىز» دەپ ايت­قا­نىن­­داي, ءتاۋ ەتكەن تاۋەل­­سىز­­دىگىمىزدى قىز­عىش­تاي قورعاپ, ساقتاي ءبىلۋىمىز قاجەت. مىنە, ەندى عاسىر­لار بويى ارمان-مۇرات­قا اي­نالعان ەگەمەندىككە قول جەتكەن داۋىردە تاۋەل­سىز­­­دىكپەن بىرگە ىشتەگى دە, سىرتتاعى دا قازاق­تىڭ رۋحى بيىكتەي ءتۇس­تى. قا­زىر «مەن – قا­زاق­پىن!», «مەن – قا­زاق­ستان­دىق­پىن!» دەپ الەم حا­لىق­تارىنىڭ ارا­­­سىن­دا ماق­تا­نىش­پەن اي­تىپ ءجۇ­رە­تىن ءدا­رە­جەگە جەتتىك. ءتۇرلى كەزەڭدەردە اتا­تۇرىك پەن رۋزۆەلت, شارل دە گولل مەن لي كۋان يۋ, دەن سياوپين سياقتى ءوز ۇلتى­نىڭ پەر­زەنتتەرى ءوز مەم­لە­كەت­تەرىن الەمنىڭ وزگە ەل­دەرىنىڭ كوش باسىنا شىعاردى. اۋمالى-توك­پە­لى ساتكە كەز بولعاندا دا تاۋەلسىزدىكتىڭ تار جول تايعاق كەشۋىنەن تارتىنباي, مەملەكەت تىزگىنىن قولعا العان مەملەكەت باسشىسى نۇر­سۇل­تان نازارباەۆ تا ۇلت رۋحىن توسكە ورلەتتى. وسى­دان جيىرما جىل ۋاقىت بۇرىن ءوزىنىڭ تۇڭعىش پرەزيدەنتىن سايلاپ العان ۇلت مۇ­را­تىنا جەتتى. ۇستىمىزدەگى جىلعى ساۋىردەگى پرەزيدەنت سايلاۋىندا دا بارشا قازاقستاندىقتار تاڭداۋىنان تاپجىلمادى. سول سياقتى قازاقستاندىق عاجايىپ دامۋ­دىڭ نەگىزىن قالاعان نۇرسۇلتان نازارباەۆ پوستكەڭەستىك كەڭىستىكتە ينتەگراتسيالىق ءۇردىس­تەردى قالىپتاس­تىر­دى. دەزينتەگراتسيالىق ۇدە­رىستەرگە تويتارىس بەرىپ, پراگماتيكالىق مۇرات­تار­دى جۇزەگە اسىردى. بىزدەگى يننوۆاتسيالىق-يندۋس­ت­ريالاندىرۋدىڭ جا­ڭا باعىتىن باسقا ەلدەر ءتاجى­ري­بەگە الا باستادى. بارشا الەم قازاقستانداعى پرەزيدەنتتىك ينس­تيتۋتتى – جۇيەلى رەفورما­لار­دىڭ لوكوموتيۆى, ساياسي ترانزيت تابىسىنىڭ نەگىزى دەپ باعا­لا­دى. وسىنداي تابىسقا جەتۋدىڭ, ۇزدىكسىز ىلگەرى­لەۋ­دىڭ كىلتى, باستى قوزعاۋشى كۇشى – ەلبا­سىمىز نۇر­سۇلتان ءابىش ۇلى نازارباەۆتىڭ كەمەل دە كەمەڭگەر باسشىلىعى, كورەگەندىگى مەن دانا­لى­عى, عاجايىپ ەرىك-جىگەرى مەن سارابدال ساياساتكەرلىگى. ەلىمىزدە وسىدان 20 جىل بۇرىن قۇرىلعان پرەزيدەنتتىك ينستيتۋت ءوزىن اقتاپ كەلەدى. ينتەگراتسيالانۋ ۇدەرىسىنىڭ باستى گەنەراتورى رەتىندە تانىل­عان ەلباسى مەرەيى مۇحيتتىڭ ارعى بەتىندە دە ءۇس­تەم بولىپ جۇرگەنىن ەل بىلەدى. تۇركى الەمى قازا­ق­ستاننىڭ ۇلت كوشباسشىسىن بارشا باۋىر حا­لىق­تىڭ رۋحاني مۇراگەرى دەپ تانىدى. جاقىندا مەن قازاقستان رەسپۋبليكاسى پارلامەنتى سەناتىنىڭ توراعاسى قايرات ءمامي باستاعان دەلەگاتسيا قۇرا­مىن­دا تۇركيادا بولعانىمدا سوعان كوزىم جەتتى. 75 ملن. حالقى بار, الەمدەگى الپاۋىت مەملە­كەت­تەردىڭ ءبىرى سانالاتىن وسى ەلدىڭ نەگىزىن كونە زاماندا حەتتەر قالاعان ەجەلگى نەۆشەحير قالاسىنىڭ ورتالىق كوشەلەرىنىڭ ءبىرى نۇرسۇلتان نازار­باەۆ­تىڭ ەسىمىمەن اتالادى. انكارادا ەلباسىنا ەڭسەلى ەسكەرتكىش ورناتىلعان. وسى ساپاردا نەۆشەحيردىڭ تۋريستەر كوپتەپ كەلەتىن اۋدانىندا «قازاقستان» بۋلۆارى اشىلىپ, سونىڭ تۇساۋكەسەرىنە قاتىستىق. سول كۇندەردە تۇرىك مەملەكەتىنىڭ, ونىڭ حالقىنىڭ ءبىزدىڭ ەلىمىزگە, ۇلت كوشباسشىسى نۇرسۇلتان نازارباەۆقا, بارشا قازاقستاندىقتارعا دەگەن ىس­تىق ءىلتيپاتى مەن جۇرەكجاردى جارقىن نيەتتەرىن ايقىن سەزىندىك. ەلىم دەپ ەمىرەنىپ, حالقىم دەپ تەبىرەنىپ قىزمەت ەتكەن ەلباسىڭ, ونى قوشتاپ, قول­­داعان جۇرتىڭ بولسا, عالامشاردىڭ قاي تۇك­پىرىندە دە ءجۇزىڭ جارقىن, ايدارىڭنان جەل ەسىپ جۇرەتىنى راس. حاكىم اباي ءوزىنىڭ «قارا سوزدەرىندە» بۇرىنعى اتا-بابالارىمىزدىڭ ەكى مىنەزىن اشىپ كورسەتەدى. بىرىنشىدەن, «... ەل باسى مەن توپ باسىلارى قالاي قىلسا, قالاي بىتىرسە, حالىقتا ونى سىناماق, بىردەن-بىرگە جۇرگىزبەك بولمايدى ەكەن». «ەكىنشى مىنەزى – نامىسقورلىق ەكەن. ات اتالىپ, ارۋاق شا­قى­رىلعان جەردە اعايىنعا وكپە, ارازدىققا قا­را­مايدى ەكەن, جانىن سالادى ەكەن». دانىشپان اباي وسىلايشا, مەملەكەتتىك ۇلتتى ساقتاۋ مەن كۇ­شەيتۋگە, قازىر الەم تانىعان تاۋەلسىز قازاق­ستان­نىڭ ابىرويىن اسىرۋعا بارشا جۇرتىمىزدى جۇمىلدىرۋدىڭ جولىن كورسەتىپ كەتكەن. ... كوپ شۋىلداق نە تابار, بيلەمەسە ءبىر كەمەل؟ بەرەكەلى بولسا ەل – جاعاسى جايلاۋ ول ءبىر كول! – دەپ ۇلى اباي ايتقانداي, كوشباسشىسىن قولداعان حالقىمىز وسىدان 20 جىل بۇرىن تاۋەكەل تۇلپارىنا اياق ارتسا, بۇگىنگى كۇنى بولاشاقتىڭ سەنىم پىراعىن قۇرىقتاپ, ەرتتەپ ءمىندى. قازاق ەلى ارعى-بەرگى زاماندا ءدال بۇگىنگىدەي ەڭسە تىكتەي الماعان, ءدال قازىرگىدەي باعى جانباعان. قازاقستان رەسپۋبليكاسى تاۋەلسىزدىگىنىڭ 20 جىل­دىعى ارالىعىندا عاسىرلاردا كەتكەن ەسەمىزدى ەڭ­سەر­دىك. تاۋەلسىزدىكتىڭ ءار جىلى وزىنشە ەرەكشە, ءار جىل­دىڭ ەنشىسى ءبىر عاسىرعا تاتيدى. بۇرىن الەم دەشتى قىپشاق دالاسىن دانا ءال-فارابي جانە داڭقى جەر جارعان اتيللامەن تانىعان بولسا, ەندى سول قاتارعا نۇرسۇلتان نازارباەۆتىڭ ەسىمى قوسىلدى. سوڭعى بىرەر جىلدىڭ وزىندە عانا اسا بەدەلدى دۇنيە­جۇزىلىك ۇيىمدارعا تابىستى توراعالىق ەتكەن ەلى­مىزدىڭ, ەلباسىنىڭ الەمدىك ارەناداعى ابىرويى مەن بەدەلى ودان بەتەر اسقاقتاي ءتۇستى. جاڭا قا­زاقستان ەۋرازيا كە­ڭىس­تىگىندەگى بەيبىتشىلىك پەن تۇراقتىلىقتىڭ سيم­ۆو­لى­نا اينالدى. كەڭەستىك يمپەريا كە­زىندە ۇزاق جىلدار بو­يى ادامزات ومىرىنە قا­ھارىن توگىپ, اجال شاش­قان سەمەيدەگى يادرولىق سىناق الاڭىن جاپقان قازاق ەلى­نىڭ باستاما­سىن دۇنيە جۇزىندەگى بەيبىتقۇمار مەملەكەتتەر مەن قاۋىم­داس­تىق­تار, اۋزى دۋالى قايرات­كەرلەر مەن ساياساتكەرلەر قۋانا قول­دا­دى. بۇ­رىن-سوڭدى يادرو­لىق قا­رۋ­دان ءوز بەتىنشە باس تارتۋ ەشبىر مەملەكەتتە بول­ماعان جاعداي. سول سەمەي پو­ليگونىن تۇن­شىقتىرعان 29 تا­مىز – بىرىككەن ۇلت­تار ۇيى­مى­نىڭ شەشىمىمەن يادرولىق سىناقتارعا قار­سى ءىس-قيمىلدىڭ حا­لىق­ارا­لىق كۇنى بولىپ جاريالاندى. ەلباسىنىڭ وسىدان ون جەتى جىل بۇرىن ءماس­كەۋدە كوتەرگەن ەۋرازيا­لىق مۇراتى جاقىندا عا­نا رەسەي استاناسىندا جۇزەگە استى. ەۋرازياداعى حا­لىقارالىق جانە وڭىرلىك ينتەگراتسيالىق ءبىر­لەس­تىكتىڭ ومىرشەڭدىگىنە وعان قاتىسۋشى مەم­لە­كەت­تەردىڭ كوزى جەتتى. جاڭا جىلدان باستاپ ءبىرتۇتاس ەكونوميكالىق كەڭىستىك جۇمىسىن باستايدى. ول ەۋرازيالىق ينتەگرا­تسيا­نىڭ مودەلىن قالىپتاستىرا وتىرىپ, ميل­ليون­داعان قاراپايىم ادامنىڭ ءمۇد­دەسىن كوزدەيدى. وتكەن جىلى عانا قازاقستان, رەسەي جانە بەلارۋس ەلدەرىنىڭ بەلسەندى ءىس-قيمىلىنىڭ ناتيجەسىندە قۇرىلعان كەدەن وداعى قارىم-قاتىناستىڭ نى­عايۋى­نا جول اشىپ, ورىنسىز سەنىمسىزدىك پەردەسىن ءتۇرىپ تاستادى. مەملەكەتارالىق جانە ۇكىمە­ت­ارا­لىق كەلىسىمدەر جەدەل جۇزەگە اسىرىلا باستادى. ەلىمىزدە قوعامدىق-ساياسي ينستيتۋت قۇرۋدىڭ باعا جەتپەس جەمىسى – قازاقستان حالقى اس­سامب­لەيا­سى ەت­نوس­ارالىق ءوزارا ءىس-قيمىلدىڭ ەڭ باستى تەتىگى بولىپ تا­بىلادى. وسى باعىتتا جۇمىس جاساپ جاتقان ەتنو­ما­دەني بىرلەستىكتەر, قاۋىم­داس­تىقتار – ءبارى دە تەڭ تۇرعىدا وزدەرىنىڭ ءتىلى مەن ءدىلى, مادەنيەتى مەن سالتىنداعى ۇزدىك پىشىندەردى مەملەكەتىمىزدەگى بىرلىك ساياساتىنا جۇمىلدىرىپ كەلەدى. ءبىر مەملەكەتتىڭ شاڭىراعىنىڭ استىندا بىرنەشە ونداعان ۇلتتار مەن ۇلىستاردىڭ تاتۋ-ءتاتتى, تىعىز ارالاسىپ, ورتاق وتانىمىز – قازاق­ستاننىڭ يگىلىگى ءۇشىن جۇمىلا ەڭ­بەك ەتىپ جاتقانىنا الىس-جاقىن شەت ەلدەردەگى كور­نەك­تى قايراتكەرلەر مەن ساياساتكەرلەر ەرەكشە قى­زى­عىپ, وزدەرىنە ۇلگى ەتىپ ۇسىنۋدا. مىنە, وسىنداي پراگ­ما­تيكالىق ءىس-قي­مىل­داردىڭ باسىندا ءبىزدىڭ ەلباسى نۇرسۇلتان نازارباەۆ ءجۇر. ەلباسىنىڭ باستاماسىمەن ەلوردانى قارت الا­­تاۋدىڭ باۋرايىنان سارىارقانىڭ توسىنە كوشى­رۋ ەلى­مىزدىڭ گەوساياسي, الەۋمەتتىك-ەكو­نو­مي­كا­لىق, ءما­دە­ني جانە رۋحاني دامۋىنا جاڭا بەت­بۇ­رىستار اكەل­دى. تاڭعالارلىق قىسقا مەرزىم ىشىندە ەۋرازيا كىندىگىندە, ەسىلدىڭ سول جاعالاۋىندا ەرتەگىدەگىدەي, كوز­دىڭ جاۋىن العان جاھۇت قالا ەڭسە كوتەردى. الەمدىك ءساۋ­لەت ونەرىنىڭ ءىنجۋ-مار­جان­دارىن كوركى مەن كەلبەتىندە ايشىقتاعان بۇگىنگى استانا تاۋەل­سىز ەلىمىز­دىڭ دامۋى مەن گۇلدەنۋىنىڭ ايقىن نى­شان­دارىن كوز ال­دىمىزعا اكەلەدى. ەلوردا ەلى­مىز­دىڭ ەڭسەسىن, حال­قى­مىزدىڭ رۋحىن كوتەردى. ەلى­مىز­دىڭ تۇكپىر-تۇكپىرىنەن وسى قالاعا قونىس اۋدارۋعا نيەت بىلدىرۋشىلەر كو­بە­يىپ كەلەدى. قازاقستاننىڭ استانا­سى­نان باستاۋ العان ءىرى-ءىرى قۇرىلىس كەشەندەرى قالا­لاردا, ءتىپتى اۋىلدىق جەرلەردە دە كورىنىس تاپتى. ءال-فارابي بابامىز: «مارتەبەسى, رۋحى بيىك شاھار – ادامداردى ءبىر-بىرىنە جاقسىلىق جاساۋعا قۇشتار, وزدەرىنىڭ تاماشا قادىر-قاسيەتتەرىن باعالاپ, وزگە جۇرتتى ىنتىزار ەتەتىن قالا» دەگەن ەكەن. ەلباسىنىڭ استانانى 2030 جىلعا قاراي الەمدەگى ەڭ وزىق وتىز قالانىڭ قاتارىنا ەنگىزۋ تۋرالى العا قويعان مىندەتى دانىشپان بابا­مىز­دىڭ وسى ۇلاعاتىنا جاۋاپ بەرگەندەي. ءبىزدىڭ ۇر­پا­عىمىز, بۇگىنگى جاستار وعان قول جەتكىزەرى ءسوزسىز. ەلوردانىڭ اسەم كەلبەتى ءاربىر قازاقتىڭ دا, ءاربىر قوناقتىڭ دا جۇرەگىنە شۋاق, جانىنا جىلىلىق قۇيادى. ەلباسى ىرگەتاسىن قالاعان, اسان بابا جەلمايامەن ىزدەگەن جەرۇيىعىڭ وسى ەمەس پە؟! بۇل – تاعدىردىڭ تەڭدەسى جوق سىي-سيا­پا­تى. ەل تاۋەلسىزدىگىنىڭ 20 جىلدىعى ۇلتى­مىز­عا ۇتىمدى, ۇلىسىمىزعا ۇلىق­تى, بار­شا قا­زاق­ستاندىقتارعا قۇتتى بولعاي! ەلەۋسىن ساعىندىقوۆ, پارلامەنت سەناتىنىڭ دەپۋتاتى.