ءمينيستردىڭ ايتۋى بويىنشا بۇل شارا وسىدان ەكى جىل بۇرىن ەلباسى نۇرسۇلتان نازارباەۆتىڭ جاپونياعا ساپارى بارىسىندا ەلارالىق كەلىسىم نەگىزىندە قاراستىرىلىپ, اتالمىش مىندەتتى ورىنداپ شىعۋ وسى ۆەدومستۆوعا تاپسىرىلعان ەكەن.
«وسىدان 20 جىل بۇرىن مەملەكەت باسشىسى 31 مامىردى ساياسي قۋعىن-سۇرگىن قۇرباندارىن ەسكە الۋ كۇنى دەپ جاريالاپ, قازاق جەرىندە بولعان ساياسي قۋعىن-سۇرگىن وقيعالارى قازىرگى بارشا قازاقستاندىقتارعا ورتاق قاسىرەت ەكەنىن ايتقان بولاتىن. وسى ورايدا, ءبىز اۋىر تاعدىر ارقالاپ قازاق جەرىنە كەلگەن جاپوندىقتار جايلى قۇجاتتى ءوز وتانداستارىنا جولدادىق», دەدى ارىستانبەك مۇحامەدي ۇلى.
ءوز كەزەگىندە ءسوز العان كۇنشىعىس ەلىنىڭ ەلشىسى, قازاق جەرىندە تاعدىر جازۋىمەن تۇتقىندا بولىپ, ازاپ شەككەن ءبىزدىڭ باۋىرلارىمىزدى ەسكە الىپ, رەسمي شارا اياسىندا كورسەتىپ جاتقان قۇرمەتتەرىڭىز ءۇشىن راحمەت, دەي وتىرىپ, مىنا ءبىر دەرەكتەردى كەلتىردى. كەڭەس داۋىرىندە جالپى وداق اۋماعىندا 575 مىڭ جاپوندىق تۇتقىندا بولسا, وسىلاردىڭ 37-ءى مىڭى قازاقستان جەرىندە جازاسىن وتەپتى. بۇل ادامداردىڭ 1500-ىنە توپىراق وسى جەردەن بۇيىرعان ەكەن. ءتىپتى جازاسىن وتەپ بوستاندىققا شىققان سوڭ قازاق توپىراعىندا قالىپ قويعاندار دا بار.
وسىلاردىڭ ءبىرى – قارلاگتا جازاسىن وتەگەن احيكو تەتسۋرو. بۇل ادام تۋرالى ەكى جىلدىڭ الدىندا دراماتۋرگ ءمادينا وماروۆا پەسا جازىپ, ونى رەجيسسەر اسحات ماەمەروۆ ساحنالاعان بولاتىن. نەبارى 17 جاسىندا قارلاگ تۇتقىنى بولعان جىگىت سپاسسك لاگەرىندە 6 جىلىن وتكىزىپ, بوساپ شىققان سوڭ ول قاراعاندىنىڭ اقتاس دەگەن اۋىلىندا تۇراقتاپ قالادى. كەيىن شاحتاعا ورنالاسادى, زاۋىتتا دانەكەرلەۋشى بوپ جۇمىس جاسايدى. تەتسۋرو ۋكراين قىزى ەلەناعا ۇيلەنىپ, ودان 4 بالا سۇيگەن. 1989 جىلى تولىق اقتالىپ, جارتى عاسىردان سوڭ تۋعان ەلىنە بارىپ, تۋعاندارىمەن كورىسكەن. جاپونيا ۇكىمەتى وعان پاتەر سىيلاعان. الايدا, وندا ءۇش جىل تۇرعان سوڭ احيكو قاريا قازاقستانداعى ۇيىنە قايتىپ ورالعان.
شارا بارىسىندا ەلشى مىرزا يتيرو كاۆاباتا بۇل سپەكتاكل 2017 جىلدىڭ اياعىندا ءوز ەلىنىڭ ساحناسىندا قويىلىپ, جاپوندىق كورەرمەن تاراپىنان جوعارى باعا العانى جايلى ايتىپ ءوتتى.
بەكەن قايرات ۇلى,
«ەگەمەن قازاقستان»
