بيىلعى فورۋمدا تۇڭعىش مارتە «قازاق تىلىندەگى كوممۋنيكاتسيالار: جاڭا ۇستانىم» تاقىرىبىندا اۋقىمدى پانەلدىك پىكىرتالاس ءوتتى. قازاق تىلىندە ويلايتىن ورتا ەلىمىزدە كەڭىنەن دامىپ كەلەدى. ال ءبىز ول جايلى نە بىلەمىز؟ كوممۋنيكاتسيا جونىندەگى ماماندارعا قازاق تىلىندە ويلايتىن اۋديتوريامەن ءوزارا ارەكەتتەسۋدىڭ قىر-سىرى جايلى ويلاناتىن كەز كەلگەن جوق پا؟
بيىلعى فورۋم حالىقارالىق PR نارىعىنداعى سوڭعى الەمدىك ترەندتەرگە جانە ونىڭ الدىندا تۇرعان قيىن اسۋلارعا, سونداي-اق, ەلدىڭ جانە بيزنەستىڭ ءيميدجى مەن بەدەلىن باسقارۋ, حالىقارالىق برەندتەردى جاھانداندىرۋ جانە جەرگىلىكتەندىرۋ ماسەلەلەرىنە, جەرگىلىكتى ايماقتىڭ ەرەكشەلىكتەرىن ەسكەرە وتىرىپ ىلگەرىلەتۋگە ارنالعان ءتيىمدى قۇرالدارعا ارنالىپ وتىر.
«بۇگىنگى كۇنى كوممۋنيكاتسيالار نارىعى قارقىندى دامىپ قانا قويماي, سونىمەن بىرگە, پيارشىلاردىڭ كاسىبي داعدىلارىنا قويىلاتىن تالاپتىڭ دا كۇشەيۋدە. وسىدان ءبىر جىل بۇرىن جاڭا ءارى بىرەگەي بولىپ ەسەپتەلگەن دۇنيەلەر قازىر ەسكىرىپ ۇلگەردى. PR ماماندارىنان ەلدە ورىن الىپ جاتقان ساياسي جانە ەكونوميكالىق جاعدايلارعا قاتىستى شاپشاڭ تۇردە ارەكەت ەتۋ, جۇرتشىلىقپەن جۇمىس جۇرگىزۋگە ارنالعان ەڭ وزىق قۇرالداردى ءبىلۋ تالاپ ەتىلەدى. ءدال سوندىقتان دا بيىلعى فورۋم كوبىنەسە تاقىرىپتاردى تەرەڭىنەن زەرتتەپ, وتكىزىلۋ فورماتىن وزگەرتىپ, بۇرىنعىدان دا كوپ سپيكەرلەر مەن قاتىسۋشىلاردىڭ باسىن قوسىپ وتىر», دەيدى «PR-شى» كلۋبىنىڭ پرەزيدەنتى شىنار جانىبەكوۆا.
قالىپتاسقان داستۇرگە سايكەس فورۋم ءساۋىر ايىندا XVI «سيرەنەۆىي PRورىۆ» ستۋدەنتتەر حالىقارالىق كونفەرەنتسياسىنان جانە ستۋدەنتتەردىڭ PR جوبالارى بايقاۋىنان باستاۋ العان قازاقستانداعى PR كۇندەرىن جالعاستىرىپ وتىر. الماتى, استانا, قاراعاندى, قوستاناي, تارازدىڭ جوعارعى وقۋ ورىندارىنان 150-گە تارتا ستۋدەنت قاتىسقان بۇل كونفەرەنتسياعا 39 جۇمىس كەلىپ ءتۇسىپ, ولاردىڭ توعىزى جەڭىسكە جەتتى. جۇلدەلى ورىندارعا يە بولعان ستۋدەنتتەر ەندى PR-فورۋمعا قاتىسۋدا.
فورۋم شىمىلدىعىن «ەڭ ۇزدىك كورپوراتيۆتىك باسىلىم – 2018» اتاعى ءۇشىن جاريالانعان ورتالىق ازيانىڭ 11-ءشى كورپوراتيۆتىك باق بايقاۋىنىڭ جەڭىمپازدارىن ماراپاتتاۋ سالتاناتى اشتى. بۇل بايقاۋ دا PR كۇندەرى اياسىندا وتكىزىلىپ, PR-فورۋمنىڭ اجىراماس بولىگىنە اينالىپ ۇلگەرگەن. بيىل بايقاۋعا 18 كومپانيادان 22 جۇمىس كەلىپ ءتۇستى. قاتىسۋشىلار اراسىندا قىرعىزستان رەسپۋبليكاسىنان دا قاتىسۋشى بار. بايقاۋعا قاتىسقان كورپوراتيۆتىك باسىلىمداردىڭ بارلىعىن PR-فورۋمنىڭ ءبىرىنشى كۇنى اياسىندا ۇيىمداستىرىلعان كورمە كەزىندە تاماشالاۋعا بولادى.
بيىل قاتىسۋشىلاردىڭ نازارىنا تاعى دا «2017 جىلداعى PR-وقيعالاردىڭ رەيتينگى. قازنەتتە جانە ودان تىس ەڭ قىزۋ تالقىلانعان توپ-10 تاقىرىپ» رەيتينگى ۇسىنىلادى. قازاقستان مەن باسقا دا ەلدەردەگى جۇرتشىلىقتى ەلەڭ ەتكىزگەن وقيعالار مامانداردان تىزگىندى ۋىستان شىعارىپ الماۋدى تالاپ ەتىپ وتىر.
سونداي-اق, فورۋمنىڭ ءبىرىنشى كۇنى قاتىسۋشىلار, ەلىمىزدىڭ PR سالاسىنداعى جەتەكشى ماماندارى, قوعامدىق پىكىر كوشباسشىلارى, مەملەكەتتىك جانە بيزنەس-قۇرىلىمداردىڭ توپ-مەنەدجەرلەرى, ماركەتولوگتار مەن جۋرناليستەر CEO جانە بەدەلدى باسقارۋ, تاۋەكەلدەردى باسقارۋ جانە مەملەكەتىك ورگاندارمەن جۇمىس جۇرگىزۋ, الەۋمەتتىك سەزىمتال كوممۋنيكاتسيالار, Digital marketing سىندى ماڭىزدى تاقىرىپتاردى ورتاعا سالىسۋدا.
فورۋمنىڭ بەيرەسمي فورماتتا ۇيىمداستىرىلاتىن ەكىنشى كۇنى بۇكىل قازاقستانعا ايگىلى مەدەۋ شاتقالىنىڭ سۇلۋ بوكتەرىندە ءوتىپ, قاتىسۋشىلارعا اقپاراتتى ينتەكراكتيۆتىك فورماتتا الۋعا, برەندتەردى ىلگەرىلەتۋمەن اينالىساتىن مەملەكەتتىك جانە بيزنەس-قۇرىلىمدارعا ارناپ كەڭەستەردى دايىنداپ شىعارۋعا, شەشىمدەردى تالقىلاپ, ىزدەۋگە ارنالعان جاڭا قۇرالدارعا قول جەتكىزۋگە, ءوز ارىپتەستەرىمەن كەڭىنەن نەتۆوركينگ قۇرۋعا مۇمكىندىك بەرەدى.
ايناش ەسالي,
«ەگەمەن قازاقستان»
الماتى
