سۋرەتتى تۇسىرگەن ەرلان ومار
القالى جيىندى اشقان الماتى قالاسى قازاقستان حالقى اسسامبلەياسى عىلىمي-ساراپشىلار توبىنىڭ توراعاسى, فيلوسوفيا, ساياساتتانۋ جانە ءدىنتانۋ ينستيتۋتىنىڭ ساياساتتانۋ ءبولىمىنىڭ مەڭگەرۋشىسى, فيلوسوفيا عىلىمدارىنىڭ دوكتورى مۇحتاربەك شايكەمەلەۆ: «توقسانىنشى جىلداردىڭ باسىندا وتاندىق ءبىلىم مەن عىلىم سالاسى قيىن كەزەڭگە تاپ بولعانى بارشاعا ءمالىم. ونىڭ وزىندىك سەبەپتەرى بولدى. ەلدەگى ەكونوميكالىق داعدارىس, فورماتسيا مەن يدەولوگيانىڭ وزگەرۋى جانە باسقا دا جايتتار كەرى اسەرىن تيگىزبەي قويمادى.
بەرتىن كەلە جاعداي بىرتە-بىرتە تۇزەلىپ, سول ولقىلىقتاردىڭ ورنىن تولتىرا باستادىق. سونداي يگى باستامالاردىڭ ءبىرى – «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىنىڭ قولعا الىنۋى. ونداعى ماقسات – گۋمانيتارلىق ءبىلىمنىڭ بارلىق باعىتتارى بويىنشا الەمدەگى ەڭ ۇزدىك 100 وقۋلىقتى ءارتۇرلى تىلدەردەن قازاق تىلىنە اۋدارىپ, جاستارعا دۇنيە جۇزىندەگى تاڭداۋلى ۇلگىلەردىڭ نەگىزىندە ءبىلىم الۋعا مۇمكىندىك جاساۋ. ءساۋىر ايىندا 18 كىتاپ جارىق كورىپ, استانادا تۇساۋكەسەر ءراسىمى ءوتتى. بۇل شاراعا ەلباسى نۇرسۇلتان نازارباەۆتىڭ ءوزى قاتىستى. ەندى بۇل كىتاپتار بيىلعى جىلدان باستاپ وقۋ باعدارلامالارىنا ەنەدى. الەمدەگى ەڭ وزىق وقۋلىقتاردان ءنار العان جاستاردىڭ كوپ نارسە ۇتاتىنى انىق», دەپ مالىمدەدى.
ەستەرىڭىزگە سالا كەتەيىك, «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى بويىنشا العاشقى 18 كىتاپ جارىق كورىپ, استانادا تۇساۋكەسەر ءراسىمى وتكەن كەزدە مەملەكەت باسشىسى نۇرسۇلتان نازارباەۆ قازاقستان ۇكىمەتى مەن ۇلتتىق اۋدارما بيۋروسىنا «بىرىنشىدەن, 2018 جىلعا جوسپارلانعان 30 كىتاپتىڭ ءارى قاراي ساپالى اۋدارىلۋىن جانە باسىلىپ شىعۋىن قامتاماسىز ەتۋ كەرەك. قارجىلاندىرۋ ۋاقتىلى ءارى تولىق بولىنۋگە ءتيىس. كەلەسى جىلى اۋدارىلادى دەپ جوسپارلانعان وقۋلىقتار ءوز ۋاقىتىندا ىرىكتەلىپ, تالداۋدان وتكىزىلۋى كەرەك. ەكىنشىدەن, بۇل وقۋلىقتاردى ءبىلىم بەرۋ ۇدەرىسىنە ءتيىمدى تۇردە ەنگىزۋ – ماڭىزدى مىندەتتەردىڭ ءبىرى. وسى وقۋلىقتار بويىنشا وقىتىلاتىن پاندەر جاڭا وقۋ جىلىنىڭ ءبىلىم بەرۋ باعدارلامالارىنا ەنگىزىلۋى قاجەت. ۇشىنشىدەن, عىلىمي تاجىريبەدە قولدانىلاتىن بارلىق تەرميندەردى جۇيەلەندىرىپ, گۋمانيتارلىق جانە ەكونوميكالىق لەكسيكانىڭ جاڭا تۇسىندىرمە سوزدىگىن شىعارۋدى تاپسىرامىن.
تورتىنشىدەن, وقۋلىقتار كادىمگى كىتاپتار سياقتى باسىلىپ شىعۋى كەرەك. سونىمەن قاتار ونلاين ءبىلىم بەرۋ ءىسىن دامىتۋ قاجەت. قازىر دامىعان ەلدەردە ۆيرتۋالدى ۋنيۆەرسيتەتتەر بار. «قازاقستاننىڭ اشىق ۋنيۆەرسيتەتى» جان-جاقتى قولداۋ تابۋى كەرەك. اشىق لەكتسيالار ۆيدەوتەكالارىنىڭ جانە سولاردىڭ نەگىزىندە دايىندالاتىن وقۋلىقتاردىڭ ساپاسىن قاداعالاۋعا ەرەكشە نازار اۋدارۋ قاجەت. بەسىنشىدەن, «100 جاڭا وقۋلىق» جوباسى عىلىمي اۋدارما مەكتەپتەرىن دامىتۋ ىسىندە ماڭىزدى ءرول اتقارادى. سوندىقتان اۋدارما سالاسىندا تاجىريبەنىڭ, ءبىلىمنىڭ جانە كاسىبي داعدىنىڭ جۇيەلى دامۋىن قامتاماسىز ەتۋ كەرەك», دەپ ناقتى تاپسىرمالار بەرگەن ەدى. مىنە, قازىرگى كەزدە سول تاپسىرمالار كەزەڭ-كەزەڭىمەن ورىندالۋدا.
الماتىدا وتكەن وتىرىستا مۇحتاربەك شايكەمەلەۆتەن بولەك, گۇلنار انناقۇليەۆا, ساعادي بولەكباەۆ, دينا ەشپانوۆا سىندى عالىمدارمەن قاتار, فيلوسوفيا, ساياساتتانۋ جانە ءدىنتانۋ ينستيتۋتىنىڭ 2 كۋرس ماگيسترانت-ساياساتتانۋشىسى ايعانىم قالدىباي قاتىستى.
عالىم سۇلەيمەن,
«ەگەمەن قازاقستان»
الماتى
