الماتى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ەلميرا احمەتوۆانىڭ ايتۋىنشا, قازىر شەتىنەگەن ءسابيدىڭ مايىتىنە ساراپتاما جۇمىستارى جاسالىپ جاتىر. الدىن الا بولجام بويىنشا, بالادا اۋرۋ بەلگىلەرى ەرتە بىلىنگەنىمەن, قاجەتتى ەم-دوم جاساۋ مەرزىمى كەشىكتىرىلگەن.
- اتا-انا دەنە قىزۋى كوتەرىلگەن قىزدارىنا ءوز بەتىنشە ەم جاساپ, دەرتتى ودان ءارى اسقىندىرىپ العان. ۇيگە شاقىرعان «جەدەل جاردەم» دارىگەرلەرى دە ءسابيدى اۋرۋحانعا اكەتپەي, ناۋقاسقا تىنىشتاندىراتىن ەكپە عانا سالعان. ساراپتاما قورتىندىسىنان كەيىن, ناۋقاستىڭ ومىرىنە نەمقۇرايلى قاراعان دارىگەرلەرگە شارا قولدانامىز, - دەدى بىزگە ەلميرا احمەتوۆا.
جالپى بۇل وتكەن ەكى اي ارالىعىندا وبلىس بويىنشا مەنينگوكوكك ينفەكتسياسىنا شالدىعۋعا قاتىستى ورىن العان ءتورتىنشى جاعداي ەكەن. وكىنشكە قاراي, وبلىس دارىگەرلەرى مەنينگوكوكك ينفەكتسياسىنا شالدىققان ءسابيدىڭ ومىرىنە اراشا تۇرا المادى.
اۋرۋحاناعا 2 جاستان اسقان ايشا قابدوللا ەسىمدى قىز بالا اۋىر جاعدايدا جەتكىزىلدى. ءبىزدىڭ مامان دارىگەرلەر ناۋقاستان ينفەكتسيالىق-توكسيكالىق شوك بەلگىلەرىن انىقتاپ, مەنينگوكوكك ينفەكتسياسىنا شالدىعۋى مۇمكىن دەگەن ديوگنوز قويدى. وكىنىشتىسى, ءبىز ءسابيدىڭ ءومىرىن ساقتاپ قالا المادىق, - دەدى وقيعاعا وراي تۇسىنىكتەمە بەرگەن وبلىستىق جۇقپالى اۋرۋلار اۋرۋحاناسىنىڭ باس دارىگەرى باۋىرجان ساۋرانباەۆ.
قازىر وبلىس اۋماعىندا مەنينگوكوكك ينفەكتسياسىنىڭ وشاعىن انىقتاۋ جۇرگىزىلىپ, شەتىنەگەن سابيمەن قارىم-تانىستا بولعان ادامدار باقىلاۋعا الىنعان.شەتىنگەن ءسابي سوڭعى كۇندەرى اتا-اناسىمەن بىرگە الاكول اۋدانىنىڭ كولباي اۋىلىنا قوناققا بارعان ەكەن. قازىر بالامەن ءبىر داستارحان باسىنا جينالعان 66 ادامنىڭ بارلىعىنا تەكسەرۋ جاسالعان. ولاردان دەرتتىڭ بەلگىلەرى انىقتالمادى. ال مەنينگوكوكك ينفەكتسياسىنان شەتىنەگەن قىزدىڭ اتا-اناسى وبلىستىق ينفەكتسيالىق اۋرۋلار ديپانسەرىنە جاتقىزىلىپ, دارگەرلەردىڭ قاراۋىندا. وسى اۋرۋحانانىڭ باس دارىگەرى باۋىرجان ساۋرانباەۆ ناۋقاستاردىڭ جاعدايى قالىپتى ەكەنىن ايتادى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
